以西结书 8章1节 到 8章6节   背景资料  上一笔  下一笔
Tùi第八章开始到第十章22节,这是先知以西结所看见ê第二异象。Tī chit段落中,先知以西结描述所看见ê异象,说明上帝ê荣耀已经无koh出现tī犹大人民看做siōng尊贵ê耶路撒冷圣殿中,因为犹大人民拜偶像神明ê行为大大地得罪了上帝。当上帝无koh出现tī耶路撒冷圣殿ê时,ná mā teh表示上帝已经远离耶路撒冷,这隐喻tio̍h hit-ê城会遇tio̍h极大ê灾难。Chit种观念mā是kui本圣经ê思想中心—有上帝同在,必定安稳;相对ê,无上帝同在ê所在,必定纷乱不安。

先知以西结ê异象siōng-kài特别ê所在,就是神魂出窍四界去旅行,这mā构成了以西结书ê特色。因为án-ne,tio̍h了解以西结书,就m̄是tùi文字面来看,而是beh看文字背后所beh表达ê信息。

Chit段经文讲述先知以西结hō͘上帝ê灵提起耶路撒冷圣殿北门ê入口所在,看见ê第一个景象,就是民众teh拜偶像ê情景。这表示上帝beh对耶路撒冷ê犹大人民进行惩罚,并m̄是无缘无故,却是有凭有据,先知以西结就是siōng好ê证人。因为伊亲目看tio̍h hiah-ê偶像神明存在tī耶路撒冷圣殿中。

第1节,讲出了确实ê日期就是「流亡ê第六年,六月初五日」,kā chit时间对照第一章2节ê「约雅斤王受掠后第五年」,约雅斤王是tī主前598年继任王位,m̄-koh chiah kan-taⁿ继位三个月,就因为巴比伦帝国围困耶路撒冷城而受掠(参考列王记下廿四:8—12)。因为án-ne,chit-ê时间应该是主前592年9月17日。

「tùi犹大流亡来ê众长老」,chit群长老应该是kah先知以西结仝款,lóng是hō͘掠到巴比伦ê迦巴鲁(参考一:3),in 做伙去拜访先知以西结。Tùi chia thang mā知影先知以西结已经lóng受民众kah众长老尊崇,确认伊是先知ê角色。Koh讲,这mā显示出in虽然被掠到巴比伦ê集中营区内,m̄-koh却ē-tàng自由行动。就tī chiah-ê长老来拜访ê时chūn,「至高上主ê能力忽然临到」先知以西结ê身上。

第2节,thang参考第一章4节、26到27节。

这是用拟人笔法来描述上主ê灵。这描述ê方式真特别,讲「一个kah-ná是人ê形像」出现tī先知以西结面前,而这「形像」呈现出来ê光亮ná亲像「火」、像「铜发光」一般。根据马太福音第廿八章2到3节ê描述,天使ê容貌ná亲像「sìh-nà」一般ê亮光。

第3节,chit-ê以人形像出现ê上帝ê灵,「伸出一只像手」,掠tio̍h先知以西结ê「头毛」,然后就kā伊带到「耶路撒冷」ê「圣殿北门内院ê进口处」。这表示先知以西结是kui个人被提起来。上帝ê灵kā伊带到耶路撒冷城圣殿ê北门;这是tùi圣殿外院通往内院ê门,而就tī「hia有一尊触怒上帝ê偶像」,这是此异象ê中心信息,thang看出上帝ê忿怒并m̄是无原因,就是犹大人民已经kā偶像立tī圣殿外院进入内院ê门口处,án-ne,任何tio̍h进入圣殿内院敬拜上帝ê民众lóng会看见这尊偶像,有ê甚至会先对偶像祭拜了后chiah进入内院敬拜上帝,这表示in变成看见甚么就拜甚么,已经bē记得上帝是独一ê,m̄准有任何其它神明kah他并列ê教导。

上帝hō͘先知以西结看见这景象,án-ne伊就ē-tàng举证说明上帝忿怒、惩罚ê原因。换句话讲,先知以西结传出ê信息是有凭据ê,并m̄是凭空捏造。

第4节,「我看见以色列上帝ê荣耀」,圣经中谈起「上帝ê荣耀」ê时,lóng teh表示上帝ê权能、奇妙ê作为。

第5节,特别tio̍h注意ê是chia讲「行廊进口ê祭坛边á有一尊触怒上帝ê偶像」,表示这偶像所在ê位置比第3节提起ê koh khah内面,是khǹg tī祭坛边á了,án-ne,犹大人民是beh献祭hō͘上帝neh,iáu是beh献祭hō͘亚舍拉?换句话讲,犹大人民tī敬拜上帝ê事顶面根本就搞无清楚。

Chit节讲先知以西结向圣殿北pêng ê门看,这门出去就是王宫所在地,君王tio̍h进入圣殿ê时,通常lóng会用chit-ê门,有时mā被称做「祭坛门」。Chia mā是宰杀tio̍h献祭ê羊羔ê所在(参考利未记一:11)。因为án-ne,mā是非常重要ê地点,只要有带cheng-seⁿ tio̍h献祭hō͘上帝ê民众,lóng会经过此门。M̄-koh就tī chit所在看tio̍h「一尊触怒上帝ê偶像」,这真正是非常严重,mā说明君王、祭司等lóng tī拜偶像à。

第6节,真清楚说明上帝决定远离耶路撒冷,m̄是他欢喜án-ne,却是犹大人民用真chē方式侮辱上帝,来「逼」上帝远离圣殿。

Chia用「jōa-ni̍h-á 可恶」、「比这koh khah 可恶」等句话,lóng teh表达犹大人民拜偶像神明ê热情,并bē输敬拜上帝。

重新查询 专卷研经 以西结书系列
错误回报,请联系comm[@]fhl.net