以西结书 44章1节 到 44章14节   背景资料  上一笔  下一笔
Tùi chit章开始,谈起有关祭司ê规矩。主要用意是提醒in绝对无法度koh再像过去hit种做出污秽家己神圣职责ê事。因为án-ne,tùi第四十四到四十五chit两章,lóng是谈起有关圣殿内ê人事规矩。

Chit段经文谈起上帝带领先知以西结进入圣殿内后,hō͘伊看见上帝ê荣耀充满tio̍h整座圣殿,并且ài伊知影外族人bē-tàng参与圣殿祭祀礼仪,然后谈起利未人过去所犯ê严重错误,最后是讲tio̍h祭司阶层。Chit段经文mā提起关系利未族人被降级,以及被禁止当祭司ê原因。

第1到3节,chia一开始讲带领先知以西结tńg来到「圣殿外院ê东门」处,伊看见「门关闭tio̍h」,而且讲以后chit-ê东门会「永远关闭」。并且强调讲「任何人lóng m̄准用这门」进入圣殿,m̄-koh君王thang tùi东门进入到上帝祭坛ê面前,是因为旧约时代ê君王,lóng hō͘人认为是上帝在世间所任命ê代表(参考撒母耳记上廿四:6、廿六:9),而且君王lóng会tī祭祀礼仪中扮演tio̍h重要角色。

第4节,先知以西结被带领tùi「北门」来到圣殿头前,chit时伊「看见上帝ê荣耀充满tio̍h伊ê圣殿」,这表示上帝显现在圣殿内面,先知以西结看见上帝chit种荣耀,真自然tek就「坦覆 (thán-phak)tī土脚」。

第5节,上帝beh先知以西结「留意」伊所「看见」kah所「听tio̍h ê一切」。上帝beh kā所有关系圣殿ê规则,就是「注意toh种人thang进入圣殿、toh种人bē-tàng进入圣殿」,免得影响tio̍h圣殿ê圣洁。

第6到9节,chit段经文真清楚说明toh种人thang进入圣殿,toh一kóa人应该被拒绝。Chia讲上帝绝对m̄准、mā「无koh容忍」过去「悖逆ê以色列人民」,继续in过去所做「一切可恶ê事」,这是teh指过去in tī圣殿里拜偶像ê事(参考以西结书第八章、耶利米书七:30、三十二:34)。现在真清楚表示无受过割礼,以及被逆上帝旨意ê异族人lóng bē-tàng进入圣殿内献祭。

第10到14节,chit段经文谈起有关利未人m̄准当祭司,是因为有「利未支族ê人随从其他以色列人弃sak」上帝,跟tòe去「拜偶像」,这是非常严重ê错误行为。因为án-ne,上帝无koh hō͘ in继续tī「圣殿工作」,换句话讲,上帝解除in当「祭司事奉」ê资格,m̄-nā án-ne,连beh「接近」上帝ê「圣物」kah「至圣所」mā lóng tī禁止ê范围。In只有ē-tàng tī「圣殿内当杂役」,丧失过去当祭司ê荣誉。

重新查询 专卷研经 以西结书系列
错误回报,请联系comm[@]fhl.net