以西结书 4章1节 到 4章17节   背景资料  上一笔  下一笔
Tùi chit章开始直到第廿四章止,lóng是tī预言南国iáu大将会tú-tio̍h ê困境,直到灭亡,人民hông掳去巴比伦做奴隶ê情景。

以西结书ê特色之一,就是上帝beh先知以西结使用身躯ê动作传达上帝ê信息,ná亲像第二章8节到第三章3节,先知以西结用食下一本册来表说明传达上帝ê话,嘴唇确实会像食了甜蜜仝款地甜,ē-sái讲是食进腹肚了后ná亲像启示录第十章10节所讲ê,腹肚就真正感觉tio̍h苦。

现在第四章记载上帝beh先知以西结,kā家己围困tī画出来ê耶路撒冷城中,用来teh象徵hit-ê城被围困,而伊就teh代表以色列人民,然后,上帝beh先知用侧睡ê方式,表达他忿怒ê惩罚。

续落来第二个身躯语言,是用大麦、小麦、豆子等农作物,揉成面团做成饼,每工只有ē-tàng食一点点á,kah lim两杯水,而且tio̍h用人ê粪便做燃料烘chiah-ê饼来食,用chit种方式表达hiah-ê饼是无清气ê。

类似chit种身躯语言表达出ê意义,除非有专心注意看kah思考,若无,beh会明白,却m̄是容易ê事。

第1到3节,上帝beh先知以西结the̍h一块「砖á角khǹg tī」家己ê面前,然后Tī顶面画一座「teh代表耶路撒冷」ê城市,有真好ê围城景象出现,表示耶路撒冷被敌军围困tio̍h。然后ài先知以西结用铁片当做隔墙,hō͘伊kah hit-ê城之间隔开。Án-ne,先知以西结khiā tī墙外,面对tio̍h城墙内,表示hit-ê城被包围、攻击,用chit种方式来表明巴比伦帝国会围困耶路撒冷城。

注意chit句「你ài面对chit座城」,chit句话tī天主教《思高圣经学会版本》译成「朝ǹg城板起面孔」,而《吕振中教授版本》翻译做「kā你ê面khiā在无振动向(ǹg)它」,中文《和合本》用「你对面攻击chit-ê城」,chiah-ê用句lóng teh表明攻击者bē心存怜悯,却是会板起面孔怒目相视ê款,并且会严厉攻击ê意思。

第4到6节,这是第二个象徵性ê动作,上帝beh先知以西结用侧睡ê方式来表示痛苦,用索á捆缚来表示受掠、失去自由。

上帝beh先知以西结「ǹg倒pêng侧卧」,chia续落来讲是为tio̍h「以色列ê罪孽」,而tī第6节是讲「ǹg正pêng侧卧」,则「为犹大ê罪受苦」。换句话讲,kui个以色列民族lóng得罪上帝,上帝用chit种方式来表明他ê艰苦心。

Án-ne tio̍h「倒三百九十工」,然后koh讲「一工等于一年」,án-ne,这「三百九十工」就是整整390年ê时间。

对tī chit-ê时间有真chē种讲法,其中之一种看法是比较khah接近chit-ê时间ê,he就是tùi所罗门王死后王国分裂,这是大约tī主前930年,一直到主前538年以色列人民tùi巴比伦帝国被释放tńg去故乡,这是一个概略性ê时间。Á chit段时间iáu包括南国犹大ê「四十年」在内。因为南国犹大是tùi 586年灭亡,而kui个以色列民族回乡是tī巴比伦帝国被波斯帝国消灭开始,这是538年,波斯皇帝塞鲁士下令,释放境内所有以色列人民回乡。

无论是北国以色列,á是南国ê犹大,先知以西结lóng传出一个共同点,就是in lóng会因为罪ê缘故而受苦。Chit种罪,就是弃sak上帝,对上帝无忠实,chit点差不多就是kui个先知运动中ê主轴信息,为tio̍h是beh修正以色列人民偏离上帝旨意ê行为。M̄-koh先知ê信息往往hō͘人民拒绝,而带头做chit种弃sak上帝ê罪ê人,是君王、贵族kah有权势者,包括hiah-ê社会领袖、先知kah祭司等。

第7到8节,chit两节又koh是另外一种肢体语言动作。上帝beh先知以西结「挥拳」来表达上帝beh对耶路撒冷忿怒采取攻击ê方式。Chit句话mā是tī回应第1到3节所提起ê,攻击耶路撒冷ê事。上帝讲ài kā先知以西结「捆起来」,「直到围城ê日期满」,这是tī回应第4到6节所讲ê,先知以西结需要用「侧卧」ê方式,这就ná同被索á捆缚起来仝款无法度动弹。

第9到12节,现在上帝beh先知以西结用混合小麦kah大麦,以及一kóa杂粮「揉成面团,做成饼」,用来当做伊「侧卧」tī土脚ê「三百九十工所beh食ê食物」,而且规定「每工只thang食两百三十公克」,是「ta̍k工按定量食」,买天只有ē-tàng lim「两杯」ê水,koh khah严肃ê是「tī民众面前,用人粪做燃料烘chit种饼来食」。

以色列人民通常只食「小麦」制细麦粉做成ê饼,而「大麦」制成ê大麦饼,是用养饲家畜动物ê,chiah-ê「豆子、豌豆、粟米」等lóng是副食品。「粗麦」,这是hō͘动物ê食物,除非粮荒,若无,bē食用,koh khah无法度用来做做献祭ê礼物。M̄-koh现在是hō͘掠到异邦去做奴隶,主人kā chiah-ê养饲动物ê粟á kah hō͘人食ê麦á搅拌做伙制成饼,hō͘ chiah-ê受掠来ê以色列人民食,这teh暗示俘掳in ê人无kā in当「人」看,而且分配给in ê食物kah水lóng无够用,甚至是极尽所ē-tàng ê侮辱in。Ài in留落来家己ê粪便曝干当做燃料,表示看in远比动物iáu不如。另外有一种看法,认为是缺乏燃料之故,chiah需要用chit种方式。

第13节,「食律法所禁止ê无清气物件」,这是teh指利未记第十一章所记载ê规定,摩西律法有明确记载,toh一kóa食物是属tī洁净,toh一kóa是无清气ê。这说明被掠到他国做奴隶ê人民,已经无法度照家己ê风俗、宗教信仰过日子,只祈求ē-tàng生存落来。

第14节,先知以西结向上帝表示伊从来无「食自然死ê á是被野兽撕碎ê动物」,mā「无食过无清气ê食物」来「玷污」家己ê身躯,因为án-ne,上帝chit种命令hō͘伊非常为难。

第15节,上帝改变原先ê计画,允准先知以西结用「牛粪代替人粪做燃料」来烘饼。Chit种用牛粪、马粪等做燃料ê风俗,tī中东地带真普遍。

第16到17节,chit两节是tī回应第10到11节。

上帝讲他「beh hō͘耶路撒冷绝粮」,这是上帝对犹大人民ê严厉惩罚。耶利米哀歌有真chē诗歌,lóng teh描述当时耶路撒冷城粮荒确实非常严重(参考耶利米哀歌一:11、19、二:12、19、20、四:4、5、9、10、五:9、10)。上帝讲会致使chit种结果,lóng是因为以色列人「家己ê罪」所带来ê结果。其实chit种绝粮ê景况,m̄-nā发生tī耶路撒冷,北国以色列ê首都撒马利亚城mā有过chit种惨境(参考列王记下六:24—29)。

重新查询 专卷研经 以西结书系列
错误回报,请联系comm[@]fhl.net