Chit段经文看起来是过去已经发生ê事，虽然无明指巴比伦帝国，m̄-koh其实就是讲巴比伦帝国。因为tī先知以西结chìn前后，上帝ê仆人就bat传出上帝警告ê信息hō͘以色列人民讲，上帝beh差派强大ê势力入侵以色列，来惩罚以色列人民。问题是以色列人民m̄听，chiah会致使国家沦亡，人民被掠到异国去做奴隶。

第18到19节，这有两个层面thang看，一是teh指上帝无欢喜歌革ê军队入侵以色列。因为án-ne，上帝tī伊ê军队入侵ê时，非常受气。二是teh指以色列人民一直m̄听警告，结果引发上帝大怒。M̄-koh tī续接ê下文来看，是第一种情形，指歌革ná亲像抢匪仝款，是上帝所无欢喜ê对象。

第20节，chit节讲上帝的确是受气à，致使连「水里ê鱼、空中ê鸟、地上ê大细动物，以及人」等等，lóng会因为听tio̍h上帝震怒ê声音而「战栗pi̍h-pi̍h-chhoah」，连「高山峻岭」lóng会「崩裂」，而且「城墙倒落来」，chiah-ê现象lóng teh说明上帝确实非常忿怒。

第21到22节，上帝beh用「各种灾难hō͘歌革惊惶」，chia描述上帝所用ê方式是：hō͘伊ê军队起「内哄，彼此残杀」，án-ne就会hō͘联盟瓦解。另外koh hō͘「瘟疫kah流血」、「豪雨、冰雹、大火、硫磺」等等chiah-ê来自大自然ê灾害降临在这看起来lóng是精锐部队ê「联军身上」，hō͘联军真紧to̍h被摧毁瓦解。这ná亲像主前701年亚述皇帝西拿基立率兵攻打耶路撒冷ê时，tī半暝hō͘上帝ê天使刣死，死亡人数chē kah十八万五千人仝款（参考列王记下十九：35）。

第23节，上帝用chit种方式beh向chiah-ê自认真伟大ê国家领导者表明，他chiah是「神圣ê上帝」，而列国chiah知影真正上帝是甚么人，人绝对无法度高过上帝。