以西结书 36章16节 到 36章38节   背景资料  上一笔  下一笔
Chit段经文是上帝透过历史ê回顾,重新beh建立以色列民族,hō͘ in成做新而且是圣洁ê以色列民族。

第16到18节,chia提起过去以色列人民(意思是teh指南北二国)因为去「拜偶像」神明,「生活行为lóng玷污了hit块土地」,致使in tī上帝眼中ná亲像「无清气」ê妇女仝款(参考利未记十五:19—24)。In mā犯「刣人」ê恶质行为,因为án-ne引起上帝「piàⁿ落大受气」当做惩罚ê方式。

第19到21节,上帝惩罚ê方式就是kā in「放ta̍k到外国去」,只要看见in ê人,lóng知影以色列民族是上帝ê选民,却án-ne潦倒、落魄,讥笑in ê时chūn,mā同时侮辱上帝ê「圣名」。

第22到24节,chit两节真重要,说明并m̄是以色列人民有甚么值得提ê优点,hō͘ in ē-tàng tńg去故乡,却是上帝为tio̍h beh保全「家己ê圣名」。过去以色列人民hō͘上帝ê名「蒙羞受辱」,taⁿ上帝beh证明他是神圣bē-tàng侵犯ê,因为án-ne,上帝beh kā以色列民族带tńg来故乡,证明上帝绝对ê神圣。

第25到28节,Tī chit段经文中,上帝有表示几个重要行动来说明他kah以色列民族之间ê特殊关系:一是上帝beh重新改造以色列民族,洗荡in一切ê污秽。二是kā in赐福换上一粒「新ê心、新ê灵」,hō͘ in知影「服从」上帝ê旨意。三是kah in重新立约,in beh重新做上帝ê子民。

第29到30节,chia讲beh hō͘以色列人民重回故乡了后,tī上帝赏赐kā in赐福khiā起ê土地顶面「无koh有饥荒」,所掖种ê「五谷丰收」,hō͘ in ê「果子树结实累累,田园增产」,chiah-ê lóng是当时世界看做siōng珍贵ê性命财产。Tī chit种环境之下bē有「饥荒」,mā bē被「列国侮辱」。

第31到32节,chit两节thang参考第六章9节、第十六章63节、第二十章43节等等。

当以色列人民重回家乡了后,发现上帝是án-ne恩待in,chit时in就会醒悟起来,知影过去所做ê事真是荒唐至极,而知影「痛恨」万分。上帝koh一pái强调他会án-ne做,并m̄是因为以色列人民有甚么优点,却是上帝beh维护家己ê圣名ê缘故。因为án-ne,上帝beh以色列人民知影悔改,知影「为家己所做ê感觉惭愧见笑」。

第33到36节,chit段经文说明上帝洗荡了以色列人民ê罪,mā就是赦免了in,并且赐福in,hō͘ in过去荒废ê土地重新得tio̍h赐福而ē-tàng生出一股全新ê气力,种作ê田园ná亲像伊甸园hit种ê美,无koh是废墟,却是「人口稠密,koh有巩固ê堡垒」thang安全khiā起ê城镇。

Chit句「iáu未灭亡ê邻国」,表示hiah-ê侥幸生存落来ê族群,lóng会看tio̍h上帝怎样保护以色列残存ê人民,带领in tńg去故乡,而且hō͘ chiah-ê人民ē-tàng「重建废墟重耕荒地」。这既然是上帝是用他永恒性命chiù-chōa ê话,就一定会实现。

第37到38节,chit两节koh一pái说明回乡后ê以色列人民,已经显示出全新ê气象,除了清楚知影,in siōng好ê,mā是唯一ê óa靠者,就是bat带领in tùi奴隶之地tńg去故乡ê上帝,而他beh赐福kā in赐福「人口像羊群仝款增chē」,真是siōng大ê赐福。Án-ne,in除了过去tī战争中死亡惨重外,hông掳去做奴隶ê mā有真chē是操劳过度来死亡,chhun落来ê就是所谓残存ê人民。现在tńg去故乡了后,上帝赏赐kā in赐福ê,就是按时降雨,hō͘ in ê土地肥而生产丰富ê五谷、果子,hō͘ in无iau饿ê危险,hō͘ in thang因为án-ne生湠chē-chē遍满大地,重建起来ê城镇,会像过去繁荣、人口真kheh ê耶路撒冷城仝款,充满tio̍h性命活力,mā会知影献上感恩ê祭。

重新查询 专卷研经 以西结书系列
错误回报,请联系comm[@]fhl.net