Chit段经文是上帝审判ê宣告，就是区分好kah pháiⁿ、善kah恶，说明第16节所讲ê公道。Chit段经文mā是kā第25节提起ê新约所带来之景象呈现出来，he是一个非常thang期待ê新世界，是一个性命受tio̍h尊重、无受威胁ê所在。

第17节，chit节马太福音第廿五章31到46节，耶稣基督所譬喻中天国ê审判。

Chia用「绵羊kah山羊」来表示beh「分开」羊群中「好ê kah pháiⁿ ê」，这并m̄是讲「绵羊」khah好，而「山羊」比较khah pháiⁿ，主要teh说明会有所区别。

「个别审判」，这表示上帝ê审判绝对是清楚公道，绝对bē用「包裹」方式来判定是非、轻重，而产生善恶不分。这mā是先知文献中一再提起ê，每一个人会因家己ê罪受报应（参考以西结书三十三：20b）。

第18到19节，chit两节真清楚讲出上帝审判ê时，对hiah-ê贪婪无度ê贵族、有权势者，绝对bē宽待。因为chiah-ê人是「食上等ê草料iáu m̄知足」，koh khah恶质ê是故意用脚去「踩踏」hiah-ê chhun落来ê草，hō͘ hiah-ê贫困ê人民连beh食清气ê草mā得bē-tio̍h，想beh lim清气ê水mā bē-tàng得，只有ē-tàng lim「搅浑了ê水」，chit种行为是非常可恶ê。上帝ê审判一到，chiah-ê帐lóng会算得非常清楚。

第20节，koh一pái强调上帝ê「公道」特性。

「肥壮kah瘦弱ê羊」，譬喻着有权势者kah贫困ê人民，上帝tī chit二个之间会有「公道」ê审判。

第21到22节，chit两节讲tio̍h chiah-ê恶质ê羊，会用in有力ê「肩膀排挤，用角抵虚弱ê」羊，iáu会「Kā in赶散到各地」，这就ná同是一阵有权势者，利用in手上拥有ê势力欺压贫困者仝款。M̄-koh上帝绝对不阔容chit种行为，伊会kā chiah-ê被赶散ê羊「抢救」tńg来，hō͘ chiah-ê被欺负ê羊无koh「被虐待」。上帝ê做法真清楚，就是kā「好ê kah pháiⁿ ê分开」来审判，hō͘恶质ê无法度遁形。

第23到25节，chit三节mā是kui本圣经ê中心信息。

上帝beh赐hō͘他ê羊群有一个像他一般ê「君王做in ê牧者，牧养in」，chit点一直是以色列人民所期待ê。

注意chit句「上主beh做in ê上帝」，这是典型ê立约句话。因为án-ne，接落去就是上帝「beh kah in立约，保证in安全」，hō͘ chiah-ê会威胁羊群安全之「境内凶猛ê野兽」无koh出现，hō͘羊群「ē-tàng安全地」生活。Chit种安全ê约ê特质是，永远ê，bē改变ê，表示上帝ê疼永远bē止息，这就是永远ê约ê意思（参考以赛亚书五十四：10）。

第26到28节，chit三节thang参考弥迦书第四章1到4节。

Chia讲tio̍h上帝beh赐福hō͘ chiah-ê kah他重新立约ê子民。当上帝kā tùi四散到世界各地ê子民带tńg来后，beh hō͘原本荒废ê土地koh一pái「按时降雨」，án-ne「果子树会结果子，田园会出五谷」，因为有雨水、五谷，生活无缺无虑，chit时「人人lóng kā tī家己ê土地顶面安居」，这是一个全新ê生活景象，是人人所ǹg望ê生活世界。因为无人会hō͘锁链捆缚，mā bē有人被「奴役」，mā bē有人受tio̍h「恐吓」。因为上帝就是in ê牧者、领袖。

第29到30节，「Kā肥ê土地赐kā in赐福」，原本上帝赏赐hō͘以色列人民ê，就是肥、流奶kah蜜之地。是因为以色列人民背叛上帝，致使in国家灭亡、人民受掠，土地荒废成做野兽khiā起ê所在。现在上帝重新带领in tńg来khiā起，而且beh照时落雨，hō͘ in ê土地thang得tio̍h雨水kah甘露ê滋润，chit时chūn，土地会koh一pái生产丰富ê五谷，人民就bē受tio̍h「饥荒」ê威胁，mā bē koh再有别ê国家来「侮辱in」，án-ne，而且上帝iáu beh kā siōng好「肥ê土地赐kā in赐福」，hō͘ in thang「安居乐业」地过生活。非常重要ê是上帝beh kah in同在，而in就是上帝ê子民。

第31节，chit节用立约ê句型做结语。表明chit位上帝，就是以色列人民siōng好ê牧者。「Lín是我ê子民，我是lín ê上帝。」chit句话mā是立约siōng典型ê句话。