以西结书 33章21节 到 33章33节   背景资料  上一笔  下一笔
Chit段经文真清楚讲tio̍h耶路撒冷沦陷à。先知以西结传达上帝hō͘伊ê信息hō͘犹大人民知影。Tī chit段信息中mā凸显了一个重要问题:甚么人chiah是上帝真正子民?是hiah-ê无hông掳去做奴隶ê?á是hiah-ê受掠ê人mā是?m̄-koh真正ê问题并m̄是tī甚么人受掠,却是有无听从上帝ê仆人先知传达ê信息,án-ne chiah是真正ê问题所在。就算hiah-ê kah先知以西结仝款被掠到巴比伦ê人,mā无想beh听,koh khah免讲留tī故乡耶路撒冷ê犹大人民mā仝款,大家就算听,mā无动tī衷。

第21节,chia讲时间是tī「流亡ê第十二年十月初五日」,这是主前585年1月8日。

「有一个tùi耶路撒冷逃出ê难民」,chit-ê人对先知以西结讲「耶路撒冷城已经陷落了」,chit-ê逃走出来ê人算是好字运ê,因为当时以东人bat堵tī城门口协助巴比伦军队掠人、刣人(参考俄巴底亚书第14节)。Chit-ê消息对受掠tī巴比伦ê犹大人民ē-sái讲是非常大ê震撼,m̄-koh对先知以西结来讲并m̄是新鲜事,因为早tī以前,上帝已经启示伊,hō͘伊知影巴比伦军队围困耶路撒冷城ê事(参考以西结书廿四:1—2)。

第22节,tī chiah-ê逃难出来向伊报告chit-ê消息ê人来ê「前一晚」,先知以西结koh一pái得tio̍h「上主ê灵临到」伊ê身上,并且「恢复」了伊「讲话ê能力」,因为chìn前上帝hō͘伊失去讲话ê能力(参考廿四:27)。现在上帝beh先知以西结传出信息hō͘犹大人民。

第23到24节,「以色列境内hiah-ê荒城ê居民」,这是teh指hiah-ê无被掠到巴比伦去,留落来ê hiah-ê「siōng穷苦ê人」(参考列王记下廿四:14、廿五:12)。Chiah-ê留落来ê人就认为in「应该得chit块土地」,意思是in想beh占有hông掳去ê人所留落来ê土地产业。Chit种态度早tī上帝对先知以西结ê启示中就有提过(参考以西结书十一:14—15)。看起来in原本是弱势ê一阵,现在却反tńg变成强势一阵。其实,in无hông掳去巴比伦做奴隶,并m̄是因为in比较khah洁净、忠实tī上帝,却是因为in比较khah衰弱无做奴隶ê生产能力。现在in m̄-nā无怜悯hiah-ê受掠ê人ê心,koh khah无因为亲友受掠而哀伤,反却是心中沾沾自喜,认为ē-tàng藉这占领荒废落来ê土地。

第25到26节,先知以西结tùi上帝得tio̍h启示,回应chit群想beh占有别人产业ê人ê话,一一地指出in ê罪状包括有:「食带血ê肉」,这是摩西律法所严格禁止ê事(参考利未记三:17、七:26—27、十七:10);「拜偶像」,这koh khah严重,因为这是所有罪中siōng严重ê一件,mā是十诫第一到二诫ê禁令;「刣人」,这是违背第六诫ê诫命;「做hō͘人憎恶ê事」,kah拜偶ná亲像仝款ê行为;「ta̍k个奸污厝边ê bó͘」,这是teh指in被巴比伦占领后,大部分ê cha-po͘人lóng被掠到巴比伦去做奴隶,留落来ê chiah-ê人并无好好á彼此互相照应,却奸污了hiah-ê失去丈夫ê妇女。Á这mā是犯第七条诫命。以上chiah-ê lóng是严重败坏ê行踏,而且lóng是违背摩西律法ê行为,「凭甚么iáu敢讲chit块土地」是in ê?这是先知以西结提出ê质疑地。

第27到29节,chit段是上帝做出ê审判。包括有:

一是tī城内ê会「死tī刀下」,这是teh指战争中死亡。

二是「野外ê」会「被野兽食掉」,这表示饥荒严重,饿死mā无人埋葬。

三是「bih tī山顶á是洞穴里ê人会病死」,这是teh指瘟疫会肆虐猖獗,死亡iáu-koh会继续落去,而且是严重。

因为上帝beh「彻底荒废」kui个迦南地,因为土地ê荒废,mā就「无人会经过」该地,这是因为上帝「惩罚」所带来ê结果。

第30到33节,chit段经文讲出犹大人民lóng知影先知以西结是上帝ê仆人,是真正先知。In「聚集做伙ê时lóng tī谈论」tio̍h先知以西结ê事,m̄-koh「in听,却无实行」,而且是「一句mā不实行」,然后kā先知以西结所传达ê信息「当耳á边风」,这kah先知耶利米所tú-tio̍h ê情况仝款(参考耶利米书二十:8b)。其实,in会有今á日chit种落场,就是因为无kā上帝ê信息当做一回事。Tī in眼中,先知以西结只不过像是一个娱乐别人ê「歌手」,而且是「kan-taⁿ会唱唱情歌、弹弹竖琴」ê艺人而已。

这kah耶稣teh谴责当时ê犹太人领袖是仝款ê,in「kan-taⁿ会讲,bē做」(参考马太福音廿三:3)。耶稣勉励他ê众门徒,ài kā听tio̍h伊ê话而去实行,chiah会像kā厝起tī石磐顶,永远坚固、bē摇动;若是听m̄去实行,就ná同kā厝起tī沙土上仝款脆弱(参考马太福音七:24—27)。

第33节,上帝koh一pái对先知以西结保证ài伊去传ê信息,「一定会实现」,到ê时犹大ê以色列人民就会知影in「bat有一位先知tī in中间」,m̄-koh为ê时已晚。

重新查询 专卷研经 以西结书系列
错误回报,请联系comm[@]fhl.net