以西结书 3章4节 到 3章15节   背景资料  上一笔  下一笔
Chit段经文继续第二章3节所讲ê,上帝拣选先知以西结ê目的,就是beh差派伊向以色列人民传达上帝ê信息。其实以色列人民并m̄是因为听m̄-bat,却是拒绝听从上帝ê话语,因为in ê心固执刚硬。M̄-koh上帝beh先知以西结m̄-thang为tio̍h án-ne担忧。他beh hō͘先知以西结坚硬ná亲像钻石,chit种鼓励ná亲像呼召先知耶利米仝款(参考耶利米书一:18)。

第4到5节,上帝beh先知以西结去以色列人民hia,kā他ê「话转告in」,chit句话真清楚讲tio̍h就是beh传讲他ê信息。上帝mā特别强调并m̄是派先知以西结「到讲话难bat ê外国人hia」,kā chit句话对照第10节,就thang看出上帝beh先知以西结去向家己ê同胞以色列人民传信息,只要有人愿意听,绝对无语言上ê隔阂。

第6到7节,chit两节是相对句型。

Chia强调上帝并m̄是派先知以西结去「hiah-ê大国」、「到hiah-ê讲难bat ê外国话ê人hia」;相对tī hiah-ê大国、听m̄-bat ê人,以色列算是一个小国(参考申命记七:7),而且又koh是先知以西结家己ê同胞,lóng听bat,m̄-koh却是「连一个mā m̄肯听」上帝ê仆人先知以西结传达ê信息,án-ne chiah是真正ê问题所在。原因是「in真是koh固执koh刚硬」,tùi祖先开始到现在一直都无改变(参考以西结书二:3—4,耶利米书十一:7—8)。 

第8到9节,chia讲上帝beh hō͘先知以西结kah以色列人民「仝款固执刚硬」,m̄-koh chia ê「固执刚硬」一词,kah第9节所提起ê「坚硬」,kah先知以西结ê名之含意仝款,表示立场坚定,m̄惊别人ê要胁,因为有上帝做伊ê砥柱,chit种态度kah上帝hō͘先知耶利米表达出来ê态度仝款(参考耶利米书一:18)。

Chit两节mā讲出一个重要区别,以色列人民ê心刚硬,是因为人拒绝上帝透过他仆人传出ê信息,而先知是上帝ê仆人,上帝为tio̍h beh hō͘他ê仆人ē-tàng tī以色列人民威胁杀害ê环境下,iáu-koh bē因惊惶而放弃上帝ê信息,á是因为tú-tio̍h严重挫折就m̄知如何是好,á是会继续传扬上帝ê信息,chit种心是一种坚忍ê心,因为án-ne,第9节chia用「像钻石仝款坚硬」,就是beh hō͘先知以西结「m̄免惊」chiah-ê来自人ê恐吓、威胁力量。

第10到11节,上帝beh先知以西结「侧耳听」他ê话,「并且记tī心里」,然后ài伊「到流亡ê同胞hia」,「不管in听m̄听」,lóng tio̍h kā上帝ê信息传达出来。即使知影以色列人民m̄听先知以西结传达ê信息,上帝iáu是beh他ê仆人照样去传讲。这mā说明传达上帝ê信息siōng重要ê所在,并m̄是在tī对方听m̄听,却是上帝ê仆人是m̄是:听从上帝ê命令、旨意去传达上帝ê信息。

第12节,「上帝ê灵kā我举起来」,这表示现在ê先知以西结完全是tī上帝ê带领之下,m̄是伊家己有甚么能力。就tī chia ê时,先知以西结听tio̍h身后有「隆隆ê声音」teh讲话,这表示上帝就出现tī伊ê身边。伊听tio̍h「tio̍h颂赞天顶上主ê荣耀」chit种声音,chit句话mā说明一个基本信仰认知:无论人ê有甚么力量,á是任何才华等,chiah-ê lóng是tùi上帝来ê赏赐,是上帝ê灵kah人同在chiah有ê。因为án-ne tio̍h用上帝赏赐ê chiah-ê能力所得tio̍h ê成果来荣耀上帝。

第13节,thang参考第一章23到24节。

Chit节讲tio̍h四活物tī「空中飞翔」,mā说明坐tī四活物顶面宝座顶ê hit位主宰,已经发出命令,因为这四活物是beh听从坐tī宝座顶面hit位ê命令(参考一:26—28)。

第14到15节,「上主ê能力大大地充满我」,chit句话koh一pái出现tī第22节。

这「上主ê能力」,表示上帝ê灵、力量。上帝用他ê灵kā先知以西结「提行」,意思是kā伊举起离开地面。意思是伊被提起来像一只鸟ê款,án-ne就ē-tàng tùi空中鸟瞰地面,看tio̍h kui个俘虏区里ê以色列人民之状况。当时伊ê感觉是「艰苦心koh气愤」,这是因为真正hō͘上帝ê灵充满ê人,已经失去自我,完全hō͘上帝使用。Á上帝beh用伊去传达会hō͘人拒绝ê信息,而且是hō͘家己ê同胞拒绝,这是一种hō͘人心灵郁卒ê事。换句话讲,伊想beh拒绝,却bē-tàng为力。想tio̍h去传达koh bē有结果,就会感觉非常挫折。上帝kā先知以西结提起「迦巴鲁河边ê提勒亚笔」,hō͘伊「tī hia停留七工」,因为「所看tio̍h kah所听见ê事」,hō͘伊tī hia发呆到「m̄知如何是好」,这必定kah tī俘虏营中看见凄惨ê生活状态有关。

重新查询 专卷研经 以西结书系列
错误回报,请联系comm[@]fhl.net