以西结书 3章16节 到 3章27节   背景资料  上一笔  下一笔
以西结书一再提起上帝ê仆人真重要ê工作之一,就是成做国家、民族ê「守望者」,这守望者ê主要工作,就是beh提醒家己ê同胞、国家,是m̄是有危险来侵犯。Tī本册ê第三十三章1到9节有真清楚说明守望者ê角色kah使命。

Chit段经文mā说明先知以西结koh一pái hō͘上帝ê灵充满了后ê现象,就是先知以西结第二个身躯语言ê动作,伊kā家己关tī厝宅里,上帝beh hō͘伊成做哑口,无法度讲任何信息,直到上帝重新开启伊ê嘴巴,伊chiah ē-tàng继续传达上帝beh伊讲ê话。

第16到17节,chia讲经过了「七工以后」,表示经过了一段含有上帝特殊旨意ê时间了后。上帝派先知以西结「做以色列国ê守望者」,这是心灵ê守望者,替上帝看守他ê子民,kā上帝ê话语传达hō͘被拣选ê子民,hō͘ in时刻注意是m̄是有违背上帝ê旨意(参考耶利米书六:17),先知哈巴谷mā是án-ne(参考哈巴谷书二:1)。

第18到19节,chit两节是相对句型,thang参考以西结书第三十三章1到9节。

「邪恶ê人」chit-ê词tī圣经内面通常是teh指弃sak上帝而拜偶像为神ê人,特别是teh指上帝子民去做chit种事,是上帝所无法度容忍ê事。上帝beh先知以西结去劝勉in「改邪归正」,悔改归向上帝。如果先知以西结确实是传讲,án-ne伊确实是尽到守望者之责任者,bē受tio̍h上帝ê惩罚。M̄-koh若以色列人民不听从上帝ê话,「iáu-koh作恶」,in就beh「因家己ê罪」受罚「死亡」。

第20到21节,chit两节mā是相对句型。

Chia所谓「好人」,意思是teh指有照上帝ê话去行ê人,若是「开始作恶」,chit种人必定会「tú-tio̍h危险」,被诱惑而失迷性命ê方向。先知以西结tio̍h亲像一个守望者仝款,去警告伊,若无,「伊一定会死」。Á上帝mā「不记念伊做过ê好事」若是守望者无去警告,上帝beh向伊「追究责任」。因为伊ê疏忽á是怠慢应该尽ê责任。相对ê,若是守望者确实做到à伊该做ê事,「警告」chiah-ê原本是「好人」ê人,hō͘ in因为「接受」听tio̍h ê「警告」而知影悔改「无koh犯罪」,án-ne,这「好人」kah守望者lóng会「活teh」,ē-tàng「bē死」。

第22到24节,chia讲上帝「能力大大地充满」tī先知以西结身上,然后伊听tio̍h上帝beh伊到「山谷」去,tī hia会听tio̍h上帝ê声音。结果伊看见ê是kah chìn前tī「迦巴鲁河边」ê提勒亚笔(参考第15节)仝款,lóng是「看tio̍h上主ê荣耀」,这荣耀hō͘先知以西结只有「坦覆 (thán-phak)tī土脚」,m̄敢看tio̍h上帝ê面。Chit pái上帝beh先知以西结kā「家己关tī厝宅里」,这是继第三章2到3节记载上帝beh伊食下一书卷了后ê第二个奇特动作。
第25到26节,当先知以西结kā家己关tī厝宅里ê时chūn,上帝讲「人tio̍h用索á」kā伊「捆起来」,而这除了先知以西结外,并无其他ê人tī chia。Chit时上帝ē-sái先知以西结「变成哑口」,无法度去「警告chiah-ê叛逆ê人民」,án-ne in就无法度听tio̍h上帝ê信息。

Kā chit两节合并来看,thang讲当先知以西结想beh传达上帝ê信息ê时,当时ê人kā伊禁锢起来,m̄准伊tī公共场合传扬上帝ê信息,m̄-nā án-ne,iáu限制伊只有ē-tàng tī厝内,ná亲像kā伊软禁仝款,m̄准伊kah外界ê人接触,án-ne,伊就ná同哑口一般,无法度传出任何信息。

第27节,「后来」,上帝koh一pái开启先知以西结ê口,hō͘伊「恢复」讲话ê能力,伊就会kā上帝ê信息传达出去。M̄-koh结果是「有ê肯听,有ê m̄肯听」

重新查询 专卷研经 以西结书系列
错误回报,请联系comm[@]fhl.net