以西结书 29章1节 到 29章21节   背景资料  上一笔  下一笔
Tùi第廿九开始直到到三十二章,chit段lóng是论到埃及ê问题。Tī chit段长到四章ê经文中,除了第三十章1到19节无标明日期外,其余ê段落lóng有明确ê日期(参考廿九:1、17、三十:20、三十一:1、三十:1、17)。就án-ne ē-tàng看出,先知以西结就是beh hō͘读者知影伊所论到ê事lóng是事实。

先知真清楚ê说明:以色列民族既然是上帝ê选民,因为án-ne,无论tú-tio̍h jōa大ê危险,siōng重要ê,就是beh óa靠上帝ê带领,却m̄是óa靠强权ê势力。Koh讲,上帝siōng m̄准ê一件事,就是当人á是国家得tio̍h气力ê时,就kā家己神化了,认为家己ē-tàng kah上帝相比,甚至想beh对抗上帝,chit种心态kah念头kan-taⁿ会带来上帝严厉ê惩罚。Chit章经文就真清楚讲tio̍h上帝为甚么beh严厉惩罚埃及国王kah伊ê人民,原因是in像泰尔国王仝款,自比为神而且自认ē-tàng掌控上帝所创造ê尼罗河。Chit种态度就是kā上帝所创造ê万物,当做家己ê私人财产仝款,koh khah严重ê是iáu kā家己神化,这是上帝所讨厌ê行为。因为án-ne,上帝用巴比伦来惩罚埃及。

第1节,时间是犹大人民流亡ê「第十年十月十二日」,chit-ê日期就tī主前587年正月,是tī第廿四章1节所记载耶路撒冷被巴比伦帝国围困ê一年后。

第2到3节,chit两节连续用了三pái「责备埃及」,表示上帝非常受气一定会严厉惩罚埃及。上帝beh成做埃及王以及伊ê人民ê「对敌」者,表示上帝beh惩罚ê对象。原因是因为伊太骄傲了,竟然讲埃及ê「尼罗河」是伊「造ê」,是伊ê。伊根本无kā上帝khǹg tī眼内,却是kā家己当做神仝款,这ná亲像泰尔自称做「神」(参考以西结书廿八:2)仝款狂妄。

Chia用「潜伏tī河里ê大鳄鱼」来形容埃及王,chit句话有两个意思,一是in óa靠这河域过生活,二是in不时攻击靠近河边ê动物。

第4到5节,因为埃及王自喻是河中ê大鳄鱼,因为án-ne,上帝就beh用「钩子」来钩它ê鳃。「鳃」被钩tòa,表示chit只大鳄鱼已经被掠tiâu,走不掉。上帝mā tio̍h kā「贴tiâu tòa」tī chit只大鳄鱼「鳞甲」上ê「鱼mā同齐khiú出来」,chiah-ê贴tiâu tī鳞甲上ê鱼,指ê就是埃及ê附庸国家á是族群。Án-ne,受惩罚ê m̄-nā是埃及,mā包含其附近óa靠它耀武扬威ê小国、族群。然后kā它「hiat-ka̍k tī旷野」、「横尸荒地,无人收埋」,这表示境遇真凄惨,kan-taⁿ会沦落成做野兽ê食物。因为上帝beh用它ê「尸体来喂飞鸟行兽」。

第6到7节,只有tī chiah-ni̍h严厉之惩罚下,埃及国王kah人民chiah会醒悟过来,原来in ê君王并m̄是神,尼罗河mā m̄是神,m̄是in赖以生存ê气力。Chit时chūn,以色列民族chiah会明白in所óa靠ê埃及,只不过ná亲像「一条脆弱ê拐á」,m̄-nā无作用,靠近伊iáu会受伤害,这lóng是teh说明埃及根本就是靠不住ê一个国家。

第8到9节,chit两节讲出了上帝ê惩罚确实真严厉。原因是第9节所讲ê,埃及国王骄傲地自称是创造者,自认为尼罗河是伊「造ê」。

第10到12节,chit段经文继续讲tio̍h上帝对埃及ê惩罚。上帝m̄-nā tio̍h kah埃及国王「做对」,mā tio̍h kah尼罗河「做对」,后者表示上帝bē koh再hō͘尼罗河有水thang饮用kah灌溉,kui个埃及地「全部荒芜废弃」,无任何人kah动物会khiā起其中。

第13到15节,经过「四十年后」,上帝beh重新带领埃及人tńg来故乡,m̄-koh kan-taⁿ有「南部」ē-tàng khiā起而已,无koh像过去hit种强壮,in只有ē-tàng「组成一个小国」,而且是「世界上siōng小ê王国」,因为án-ne,in无法度koh再「统治别ê国家」,chit点kah上帝应允hō͘以色列人民ê cheng差真大(参考以西结书廿八:25—26)。

第16节,「以色列绝无koh óa靠in」,表示以色列人民因为看见埃及受tio̍h严厉惩罚而醒悟过来,知影「óa靠人是jōa-ni̍h-á ê错误」,而且清楚知影创造万物ê上帝chiah是「至koân ê上主」。

第17节,「流亡ê第廿七年正月初一」,这是主前571年4月26日。

第18节,「巴比伦王尼布甲尼撒攻打泰尔」,这表示巴比伦军队bat猛攻泰尔,这是tùi主前587年开始攻打,直到574年,长到13年时间,因为泰尔ê防守真坚固,巴比伦军队ê攻击无想像中ê顺利,致使巴比伦军队则严重损兵折kā。Chia用「军队背负重荷,soah致使头秃肩破」来形容巴比伦军队因为久攻不下泰尔ê倦tah-tah状态。

「ē-sái讲是王kah军队都无得tio̍h报酬」,chit句话表示经过十三年ê攻打,了后虽然成功,m̄-koh ē-tàng掠夺得tio̍h ê物件,却khah输这十三年所付出ê战争经费。

第19到20节,chit两节thang看出巴比伦军队看tio̍h攻打泰尔得不偿失了后,决定转向攻打埃及,án-ne巴比伦国王就ē-tàng用phah败埃及所得tio̍h ê「战利品」,来做补偿攻打泰尔损失ê「军饷」。

第21节,「hit时」,表示上帝审判ê时刻。上帝beh koh一pái赐福以色列,这表示惩罚埃及是对以色列有利。上帝beh hō͘全体以色列人民注意听先知以西结传讲ê信息。

重新查询 专卷研经 以西结书系列
错误回报,请联系comm[@]fhl.net