Chit段经文是描述上帝beh惩罚西顿chit-ê城。通常只要讲到泰尔，就会连结西顿。因为chit两个城市ná亲像兄弟之邦仝款。Mā thang án-ne了解，只要是泰尔有做ê恶质行踏，西顿必定mā会发生。

最后一段话是关系以色列民族ê复兴。Chit段结语siōng大ê特点，就是突显出上帝对他ê子民ê看顾kah爱。泰尔是永远灭亡，m̄-koh相对tī以色列民族，上帝却beh hō͘伊重新复兴起来。

第20到21节，chia讲上帝beh先知以西结用「责备」ê严厉语气之方式对西顿人讲话。

第22到23节，chia讲上帝beh成做西顿人ê「对敌」者，当众人看见上帝惩罚西顿ê时，lóng会「称颂」上帝，因为大家lóng认为he是西顿人ê报应，mā是上帝公义ê审判，这mā显示了上帝ê「神圣」，chiah会「施行惩罚」tī he作恶多端ê人ê身上。Á上帝惩罚ê方式，就是用「瘟疫」惩罚西顿城内ê人民，而城外则有来自「四面八方」ê敌人威胁会「刣灭」hit-ê城ê居民。

第24节，chit节提起以色列民族ê复兴，过去hiah-ê看bē起、轻视伊ê国家、民族，taⁿ lóng m̄敢koh再「轻视以色列」à。

第25节，上帝teh-beh伸手kā被「放ta̍k」到各国去ê以色列人民「领tńg来」到上帝赐hō͘「仆人雅各ê土地」，这清楚表明上帝kah以色列民族之间有特别ê关系。

第26节，以色列人民kā ē-tàng「安居乐业，建造房屋，开垦葡萄园」有安定ê生活，bē koh受到外族入侵ê威胁。因为上帝伸手「惩罚轻视以色列ê邻国」，án-ne，以色列人民就ē-tàng teh过「安全」无虑ê生活。