Tùi第廿五章开始直到第三十二章，是一个新ê段落。Tī chit段落中，lóng是论到有关上帝审判围tī以色列人民四周ê国家、民族，包括有亚扪、摩押、以东、非利士、泰尔、西顿，kah埃及等。Tī chit段经文中，有几个特色，一是用「至koân ê上主讲」词句，二是lóng会先说明上帝为甚么审判chiah-ê国家á是族群，三是论述上帝ài怎样惩罚，四是以「án-ne，lín就会知影我是上主」chit句话做结尾。

Chit章论到了四个族群，包括第1到7节ê亚扪；第8到11节ê摩押；第12到14节ê以东，kah第15到17节ê非利士等。

第1到2节，「beh责备亚扪人」，chit-ê族群是现在约旦王国ê一部分， tī犹大东边ê隔壁。早tī士师ê时代，就是hō͘以色列人民siōng感头壳痛ê族群之一（参考士师记十：7—9、十一：4）。一直到主前597年，亚扪人藉tio̍h巴比伦帝国入侵耶路撒冷ê机会，趁火来phah劫（参考列王记下廿四：2），而且tī背后策划杀害巴比伦帝国任命ê总督基大利（参考耶利米书四十：13—四十一：18）。

第3节，指出亚扪人看见犹大遇tio̍h洗劫，圣殿被毁ê时，却tī边á拍手、跺脚，而且用正khau倒削ê话语讥笑以色列人民。

第4到5节，因为in幸灾乐祸ê行为，上帝beh hō͘「东边旷野来ê部族」，入侵tī in ê「土地顶面扎营、定居」，而且beh「食lín ê土产，lim lín ê奶」，chit句话真清楚teh表示亚扪一定tio̍h按时向占领in ê统治者进贡。In ê首都「拉巴城」，会荒废成做「放牧骆驼ê所在」，甚至严重到kui个国家「成做羊群倒ê牧场」，这表示城内ê人民大多数被刣死，á是人民hông掳去贩卖为奴，城内无koh有人khiā起。

第6到7节，上帝beh án-ne严厉惩罚亚扪人，是因为in用幸灾乐祸ê心态teh看待以色列人民ê境遇，连一点点á同情心mā无。上帝ê惩罚就是hō͘ in成做外国人侵犯ê对象，ná亲像以色列民族所遇tio̍h ê情景仝款。

第8节，提起「摩押」国，in tī亚扪ê南边隔壁，死海以东ê所在，南边kah以东相连，东边是阿拉伯大沙漠。

「摩押讲犹大国kah别ê国家lóng无差别」，chit句话表示tī摩押人ê眼中，认为上帝ê选民mā无甚么了不起，这等于是藐视上帝，看bē起上帝仝款。

第9节，「摩押边界ê城镇」，chia特别提起「伯・耶西末、巴力・免、基列亭」等三个主要「城堡」，是设tī死海ê东边，亚嫩河ê北部，lóng会因为hō͘上帝惩罚，chiah-ê城镇会受tio̍h巴比伦军队ê「攻击」，这mā表示摩押会失去边界屏障。

第10到11节，上帝一定「beh惩罚摩押」，有tùi「东边旷野来ê部族」会征服「摩押，连亚扪同齐征服」。结果摩押kah亚扪lóng tī chit两族ê并吞之下，「被列国遗忘」消失。

第12节，开始提起「以东人」ê问题。上帝讲「以东人凶狠地向犹大报复」，chia所指ê「报复」，是teh指耶路撒冷城遇tio̍h摧毁ê时chūn，以东人khiā tī巴比伦人hit边，协同残害以色列人民（参考俄巴底亚书第12—14节，诗篇一三七：7—9），in chit种恶质ê行踏hō͘上帝认为是「罪恶滔天」般ê严重。因为上帝无欢喜人有chit种趁火phah劫、落井下石ê心态á是行为。

第13节，提起上帝决定beh「惩罚以东」，tùi「提幔到底但ê土地lóng tio̍h荒废」，意思是teh指kui个以东人khiā起ê地区，「lóng tio̍h荒废；所有ê人lóng被杀害」，这是真严重ê惩罚。

第14节，指出以色列人民会执行chit项「向以东报复」ê命令，chit句话已经teh暗示上帝会koh再复兴以色列民族。

第15到17节，开始提起有关非利士人ê问题。Chia讲非利士人ê「世仇」，就是teh指以色列人民。为tio̍h beh报复，in「tī仇恨下杀戮了敌人」，表示in杀害以色列人民真chē。因为án-ne，上帝ài beh进行惩罚，方式真清楚，就是beh「消灭」chit-ê族群。甚至「连残留tī非利士平原ê人」，上帝mā lóng m̄ hō͘ in有机会存活落来，因为上帝beh「重重地」、「piàⁿ落大受气」惩罚in，ná亲像in用残酷手段相对待已经落难ê犹大人民仝款。