Chit章真重要，因为chit章是先知以西结受上帝呼召后，tú-tio̍h siōng严重ê冲击，就是耶路撒冷城被围困到hit-ê城被攻破，犹大国灭亡。特别ê是当先知以西结挚爱ê bó͘忽然猝死，却bē-tàng为bó͘举哀，chit种心灵ê痛苦、难堪，hō͘伊无法度言语。

头前一再提起犹大人民所犯ê罪状，现在则明确地指出chiah-ê罪kā为in带来ê严厉惩罚，上帝亲自拣选巴比伦皇帝尼布甲尼撒当做仆人（参考耶利米书廿五：9），带兵来围困耶路撒冷城。

第1到2节，chia清楚记落来巴比伦军队围城ê时间是tī「流亡ê第九年十月初十日」，这tú好是主前588年正月15日。上帝beh先知以西结「记落来今á日这日子」，因为这是苦难ê开始，是「巴比伦王开始围攻耶路撒冷」ê日子。

这日期在列王纪下第廿五章1到2节ê记载是：「西底家背叛巴比伦王尼布甲尼撒，因为án-ne尼布甲尼撒率领全军来攻打耶路撒冷；hit时是西底家在位第九年ê十月十日。In tī城外扎营，绕tio̍h城墙筑垒攻击，一直围困到西底家在位ê第十一年。」

第3到5节，这是用一首简短ê诗歌做譬喻，来形容上帝透过巴比伦军队围城ê譬喻，表明上帝beh惩罚「悖逆ê子民」因为in ê心是硬到极点，听bē落去上帝劝勉ê话。

Chia用「Kā锅khǹg tī火上，锅里贮满水」，chia ê「锅」表示耶路撒冷（参考以西结书十一：3、7、11）。「火」，是teh代表上帝ê惩罚惩罚。

「上等ê肉」、「siōng好ê羊肉」，chiah-ê用句lóng是teh kí上帝ê子民。现在，m̄是只有「上等ê肉」á是「siōng好ê羊肉」，连「特选ê骨头」mā bē放过，这等于是全部lóng tio̍h khǹg入去锅里「煮」。而且iáu koh khah tī「锅下堆满木柴」，chia「木柴」teh代表巴比伦军队，为tio̍h beh hō͘火势猛烈ê意思。

第6到8节，chia指出耶路撒冷是一个「充满凶手ê城」（参考以西结书廿二：3），因为城内发生真chē杀害无辜ê人ê性命。

「生銹无洗过ê锅」，表示已经pháiⁿ到极点，无法度修复ê意思。「銹」一字mā表示恶毒、罪孽之种ê意思。

「内面ê肉」，这是耶路撒冷城内ê以色列人民。「一块块地被夹出来，一块mā不留」，表示城内ê以色列人民会被一个一个掠起来。

「溅tī光滑ê大石上」，表示chiah-ê残害别人性命者，并m̄知家己罪恶chē深，iáu以刣人为乐，无kā被杀害ê人用土埋起来（参考利未记十七：13），反tńg会hō͘害者ê血迹留tī石头壳顶，用来展宝家己杀害jōa-chē人。Chiah-ê被残害者ê呼hoah声音，上帝听见了，他beh伸手替in伸冤，上帝beh亲自替chiah-ê受害者「报复」。

第9到12节，这是第二pái用「充满凶手ê城」chit-ê词句形容耶路撒冷。上帝beh「亲自堆积木柴」，而且是beh继续「添木柴，煽火」，hō͘锅á滚烫得koh khah快、koh khah烈，然后「Kā肉汤煮干，kā骨头烧焦」，完全无存留任何一丝希望ê意思。当锅理ê肉kah骨头lóng煮到彻底了后，tio̍h拚出来。然后kā锅á用焰火烧。为tio̍h是beh kā锅á内ê「銹」去除掉，án-ne「锅就洁净à」。头前讲过，「锅á」代表ê是耶路撒冷。Án-ne，就ē-tàng kā耶路撒冷彻底除掉过去所犯ê罪过，hō͘伊成做一个新ê城，这mā是后来先知以西结讲tio̍h重建新ê耶路撒冷圣殿之背景。

「倒空了ê铜锅」，表示kā耶路撒冷城内所有ê人lóng被赶出去，hō͘城内空无一人。Án-ne，整座耶路撒冷城就变成废墟。

第13节，说明上帝会án-ne严厉惩罚，只有一个原因，是希望完全洁净以色列人民，ē-tàng真心地归向上帝。

第14节，「我beh采取行动ê时机到à」，chit句话表明上帝展开惩罚时刻到à。Ná亲像第1节所提起巴比伦军队已经来围困耶路撒冷城。当上帝惩罚ê时是「绝对bē怜悯，mā不阔容」，无koh hō͘ in任何机会。