Tùi第二十章45节开始，直到第廿一章32节止，先知以西结讲tio̍h上帝会严厉惩罚悖逆ê犹大人民kah亚扪人，而且chit种惩罚lóng是kah「刀剑」息息相关。

Tī前一段经文是用火来描述上帝ê惩罚teh beh来到，而且是非常严重。现在第廿一章则进一步用「刀剑」取代大火烧树林，来表示上帝怎样惩罚悖逆ê犹大ê以色列人民。

第1到5节，tī第二十章46节是讲beh「面对南方」，头前上帝beh先知以西结「面向耶路撒冷，责备hiah-ê圣所」，现在则「面对耶路撒冷」，而且是kah「圣所」ê事件有关。上帝讲beh kah犹大人民「对敌」，原因是in做严重亵渎上帝神圣ê恶质行为（参考八：15—18）。对敌ê方式是beh「拔出剑来」，chit支剑是teh指第19节ê巴比伦帝国ê意思。

注意chit句「无论好人pháiⁿ人lóng刣了了」，而且是「tùi北到南lóng刣」，这并m̄是讲上帝不分好人kah pháiⁿ人，却是讲所有ê人lóng弃sak了上帝，因为无论大街小巷lóng充满tio̍h偶像崇拜ê记号。

第6到7节，koh一pái看tio̍h上帝beh先知用身躯语言传达信息，上帝beh先知以西结「像失望心碎ê人」仝款，发出「haiⁿ-haiⁿ叫」ê声音，而且是beh「tī群众面前haiⁿ-haiⁿ叫」。然后解释伊haiⁿ-haiⁿ叫ê意义，是「pháiⁿ消息」，而且这pháiⁿ消息kā带来众人ê「心慌意乱」、「两手发软」、「双膝pi̍h-pi̍h-chhoah」、「勇气尽失」等四种现象出现。