以西结书 20章1节 到 20章32节   背景资料  上一笔  下一笔
以西结书tùi第二十章开始直到第廿四章,长到五章ê经文中,lóng是teh谈有关耶路撒冷城被巴比伦军队攻陷ê预言。Á chit段经文ê背景应该是tī主前591年到588年所传讲ê信息。

Tī chit第二十章,先知以西结以宗教信仰ê历史为主轴,叙述以色列民族tī信仰上失序ê情形。其实mā thang án-ne讲,先知运动siōng重要ê基础,就是tùi信仰来反省,却m̄是考量政治、经济ê状况,koh khah m̄是军事ê。Tī众先知ê观点中:若是无敬虔ê宗教信仰,就算有真好ê政治领导者,mā会真紧to̍h变质;若是无真坚定ê信仰做基础,经济发展会变成压榨、剥削穷苦人民ê藉口;若无信仰做根基,军事力量真可能会成做统治者滥刣无辜人民ê工具。因为án-ne,先知运动siōng重要ê一件使命,就是hō͘国家、社会、民族ê领导者,lóng ē-tàng tńg来到上帝面前,同时人民mā tio̍h以忠实ê心回应上帝拣选ê疼。

Chit段经文谈及上帝怎样爱以色列人民,m̄-nā kā in带领出埃及ê奴役之地,而且iáu kah以色列人民立约,表示beh赏赐kā in赐福肥ê土地thang安居。M̄-koh当in离开埃及进入旷野开始流荡ê生活了后,每pái经历到iau饿、干渴、瘟疫等侵袭,就一再地发出怨言,甚至认为tńg去埃及比离开koh khah好,chiah-ê lóng teh表示in已经对上帝失去信心。而且koh khah严重ê是,当in进入应允之地后,in ê kiáⁿ孙并无因为顶一代祖先所犯ê错误而知影警醒悔改,反却是跟tòe祖先恶质ê行为去拜偶像弃sak上帝,而且chit种情形是一犯koh再犯,án-ne chiah是上帝siōng-kài忿怒ê原因。

第1到3节,「被放ta̍k ê第七年五月初十日」,这是teh指主前591年七月á是八月10日。是以约雅敬王tī主前597年受掠hit年开始计算。

Chia koh一pái提起「有kóa以色列ê长老」到先知以西结ê「面前坐落来」,in真想beh知影「上帝ê旨意」。In真可能是想beh知影,到底in ài tī巴比伦做奴隶jōa久?先知耶利米bat真清楚表示会长到「七十年」时间(参考耶利米书廿五:11—12)。不过mā有另外一种看法,认为chiah-ê长总是来询问耶路撒冷是m̄是成(chiâⁿ)实会如先知以西结所讲ê会hō͘巴比伦帝国所毁?á是讲上帝ê圣殿被摧毁?因为in一直认为上帝ê圣城kah神圣ê居所无可能被敌人所毁。In án-ne问,是想beh知影到底怎样一回事?m̄-koh当先知以西结向上帝求问启示旨意ê时,上帝ê回答是「m̄准lín求问」,因为chiah-ê犹大人民ê众长老过去一再拒绝听从上帝ê仆人传达ê信息。

第4节,上帝beh先知以西结「宣告in ê罪」,这表示上帝ê审判beh开始。这审判提起in ê祖先早已经弃sak上帝去拜偶像。

第5到7节,chit三节koh一pái提起上帝带领以色列民族ê祖先离开埃及,并且应允kā in赐福流奶kah蜜之地,iáu kah in ê祖先立约,ài in「hiat-ka̍k in所疼ê hiah-ê thang憎恨ê偶像,bē-tàng拜埃及ê假神来玷污家己」,因为这是上帝所m̄准ê事。

第8到9节,chit节指出以色列人民真正ê问题,就是无遵行所立ê约,in「背叛」上帝,无「听从」上帝ê旨意,而chit款tāi-chì情是in早tī埃及时就发生了,上帝原本beh hō͘ in死tī埃及,m̄-koh后来á是带领in离开埃及,因为上帝bat用家己ê名chiù-chōa,讲beh带领in离开奴役in ê埃及。

Chit种为tio̍h维护上帝神圣ê名ê讲法,tī本章第14节、第22节、第44节等等一再出现。换句话讲,上帝绝对m̄准他ê圣名tú-tio̍h到侮辱、毁谤。

第10到12节,上帝「领in出埃及,chhōa in到旷野」,chit句话真重要,因为这清楚说明以色列人民离开埃及了后,m̄是马上就进入hit-ê应允之地,却是先进入旷野。而且是tī旷野漂流长到四十年时间(参考申命记八:2,约书亚记五:4—6,使徒行传七:36),而chit段tī旷野漂流期间,mā是真重要ê一段训练功课,为tio̍h是beh hō͘ in ē-tàng脱胎换骨,成做完全óa靠上帝ê族群,而bē koh再怀念tī埃及ê富裕物质生活(参考民数记十一:4—6)。Mā同时「命令in遵守安息日」,因为会遵守安息日ê诫命,因为上帝ài in用chit种方式来表示「当做咱立约ê记号」(参考出埃及记三十一:12—13、16—17),表明in愿意「成做神圣ê子民」。

第13节,chit节mā有表示一个基本信仰观念:不遵行上帝ê律法诫命,就等于是「玷污了安息日」,原因是安息日tùi án-ne kah上帝立约ê凭据。不遵行上帝ê话,就表示无koh遵守kah上帝所立ê约,真自然tek,就bē想beh去敬拜上帝,听上帝ê话语。上帝本来想beh「倒尽」他ê「大受气,消灭in」,m̄-koh上帝后来无án-ne做因为他有怜悯kah丰富ê疼。

第14节,chit节koh一pái重复第9节所讲ê。

第15到16节,因为án-ne上帝chiù-chōa「不领in」到「hit块流奶kah蜜ê土地」,chit件事是teh指hit群tùi埃及出来,年满二十岁以上ê人,只有二十岁以下ê人chiah ē-tàng进入,原因是in对上帝ê应允无信心,除了连连发出怨言之外,并无切实遵行上帝ê仆人ê教导,甚至是背叛上帝ê旨意(参考民数记十四:28—35,约书亚记五:4—6)。Koh讲,mā因为in「玷污了安息日」,hō͘这原本神圣ê约ê记号蒙上了阴影。

第17节,上帝「可怜」以色列民族,并无tī忿怒中出手惩罚in,因为án-ne chiah无「tī旷野消灭in」。

第18到20节,m̄-koh上帝有「警告」in,当年二十岁以下ê青年,绝对bē-tàng随从旷野民族ê「风俗」,mā bē-tàng「拜偶像来玷污家己」,tio̍h「服从」上帝ê「律法诫命,遵守安息日做神圣ê日子」,用chit种方式来表明kah上帝之间立约ê凭据。

第21节,m̄-koh「hit一代mā背叛了」上帝,m̄-koh上帝仁慈怜悯,因为iáu有一kóa遵守立约ê人所带来ê福气,减少了上帝ê「忿怒」,无kā in全lóng刣了了。

第22节,chit节koh一pái重复第9节、第14节等等。
第23到24节,chia已经暗示了早tī以色列人民iáu tī旷野漂流时代,上帝就有chit种准备,beh严厉惩罚in,hō͘ in「分散到全世界」,原因就是in lóng轻蔑上帝ê话语,对神圣ê安息日采取轻视ê态度。

第25到26节,chit两节经文thang参考罗马书第一章24到32节,表示上帝最后采取ê方式,就是chhut-chāi以色列人民放纵家己ê恶质行踏,包括in「献家己ê大kiáⁿ做牲祭」,学习了当地拜偶像神明ê恶质行为(参考列王记下十六:3、十七:17、廿一:6)。Á chiah-ê行为lóng是当年摩西所严厉禁止ê(参考利未记十八:21,申命记十八:10)。

第27节,上帝指控以色列人民ê祖先背叛上帝,对上帝「不忠」,违背了kah上帝之间所立ê约。因为以色列人民kah上帝ê约,是ná亲像夫妻ê约束ê关系,因为án-ne,对上帝「不忠」,就是对上帝ê一种极大「侮辱」。

第28到32节,chit段经文讲出上帝会拒绝来询求上帝旨意ê长老,就是因为当上帝带领in ê祖先进入「应允kā in赐福ê土地」后,in就一再地tī「大山kah绿树」中起祭坛拜偶像神明,iáu认为上帝看bē-tio̍h,而且tī祭坛上kā家己ê kiáⁿ当做「牲祭烧献hō͘伊所拜ê偶像」,chit种行为差不多就是迦南地人民tī宗教信仰上ê行为,然后现在「iáu敢来求问」上帝ê「旨意」,因为án-ne,上帝tī chia真清楚回答讲:「m̄准lín求问!」chit句回应了chit章第3节所讲ê。

重新查询 专卷研经 以西结书系列
错误回报,请联系comm[@]fhl.net