Chit章是一篇诗歌，mā ē-sái讲是一首「挽歌」。类似chit种「挽歌」，除了耶利米哀歌外，诗篇第廿二篇mā是一首哀歌。

「挽歌」这字，tī希伯来文是「qînâ」字，mā thang当做「哀歌」，是用悲哀ê调子来写做ê诗歌。Thang明白先知以西结tī面对当时恶质ê政治局势，koh看见当时ê政治领袖kah社会菁英lóng无悔意，只知影继续放荡、欺骗、拜偶像、敛财、欺压等恶质行踏，伊屡屡劝勉，m̄-koh soah koh得bē-tio̍h回应，因为án-ne，为tio̍h表明心中ê绝望，伊写chit首哀歌表明对国家前途ê绝望，希望用这种方式来唤醒同胞，对未来景况m̄-thang koh再存任何幻想。

Chit篇诗歌是两首哀歌编辑而成，第一首是第1到9节，这是为君王á是领导者所写ê哀歌；第二首是第10到14节，chit段诗歌是为犹大国teh beh毁灭而写ê诗歌。先知以西结ê chiah-ê哀歌lóng是teh隐喻当时ê政治环境kah现实。

这是第一首寓言诗歌。描述一头大母狮养育了小狮，chit只小狮学会晓了猎食、食人ê后，却被掠tiâu带往埃及去。先知以西结用母狮养育幼狮来形容犹大chit-ê国家ê运命，反应出当时政治ê生态kah危机。Chit种用狮来形容国家、君王ê情形，tī那鸿书第二章11到12节mā出现chit种描述。

第1节，「为以色列ê两个王子唱chit首挽歌」，chia讲「两个王子」，这「王子」指ê是王室，á是国王。两个王子，一是第4节指犹大约西亚王ê kiáⁿ约哈斯hông掳去埃及去ê事，这是发生tī主前609年；二是第5节ê背景对照第9节来看，则可能是约雅敬ê kiáⁿ约雅斤被掠到巴比伦去，时间是tī主前597年。M̄-koh mā有可能是teh指西底家王，则时间是tī主后586年。

第2节，「你老母是母狮」，这是teh指犹大国，用「母狮」来表示所有君王ê老母。

「蹲伏tī雄狮群中」，表示边á lóng是对in虎视眈眈ê凶猛国家，想beh kā chit头母狮独占，这mā显示了当时犹大国ê局势是非常恶质。M̄-koh tī án-ne恶质ê环境下母狮iáu有能力kah办法kā「小狮养大」，表示上帝á是怜悯，透过犹大国chit-ê老母想出所有ê办法照顾、养育chiah-ê「小狮」。

第3节，「一只小狮成做少壮ê狮」，所谓「少壮ê狮」，意思是teh指约西亚ê kiáⁿ约哈斯。Tī主前609年，约西亚王率兵对抗埃及军队，战死tī米吉多（参考列王记下廿三：29），因为án-ne伊年纪kan-taⁿ廿三岁ê kiáⁿ约哈斯hō͘人民膏立做犹大王（参考列王记下廿三：30b—31）。

「学会晓猎取食物，成做食人ê猛兽」，表示狮长大成做猛兽会「食人」，表示kan-taⁿ会做伤害ê事。隐喻tio̍h约哈斯王「仿效伊祖先ê pháiⁿ模样，做上帝看做邪恶ê事」（参考列王记下廿三：32）。

第4节，「列国听见了，kā伊诱进深坑」，这真清楚就是tī约哈斯继任chiah kan-taⁿ三个月时间，埃及帝国就派出军队来攻打耶路撒冷，而chit句「用钩子kā它拖到埃及」，表示埃及kā约哈斯掠去埃及做奴隶，而伊后来就死tī埃及（参考列王记下廿三：34b，耶利米书廿二：10—12）。

第5节，「老母等得心焦绝望」，chit句诗歌真清楚teh描述犹大国人民心中ê不安。

「koh另养一只小狮成做少壮ê狮」，表示约西亚ê另外一个kiáⁿ以利亚敬被埃及国王尼哥任命继任为犹大国王，并kā伊改名ê约雅敬。

第6节，tùi chit节到第9节teh描述ê，若是照第9节ê「带到巴比伦」chit句话来看，这并m̄是指继任为王ê约雅敬kah约雅斤，却是指后来ê西底家王。因为án-ne，先知以西结是略过约雅敬王kah约雅斤王ê时代，直接描述西底家王ê时代。

「少壮ê狮跟tòe其他ê狮四界徘徊」，chit句话描述西底家王并无照约束臣服tī巴比伦ê统治之下（参考历代志下三十六：13），伊四界想办法beh kah埃及联盟来抵抗巴比伦，这就是chit所在所讲ê「四界徘徊」，意思是西底家王想beh脱离巴比伦帝国，无想beh继续当附庸国。

第7节，「破坏城堡，摧毁城市」，这说明西底家王认为结合埃及帝国，就ē-tàng扩展并强化犹大ê军事武力，án-ne，伊就ē-tàng想beh án怎to̍h án怎，m̄-koh chit种情势只有tī开始之初有效，却因欺压邻国而带来koh khah大ê仇恨。

第8节，「列国tùi四面八方来围攻」，这意思是列国对犹大ê倒抛。Chiah-ê过去被它欺压、恐吓过ê国家，lóng趁巴比伦帝国来侵犯ê时，kah跟tòe而来，以东就是其中ê一例（参考俄巴底亚书第12到14节）。Chia ê「thí开罗网」，意思就是teh指犹大军队á是人民，无论án怎躲闪，都无办法躲避chit pái ê灾难，犹大国王西底家被「诱进深坑」，意思是受掠（参考列王记下廿五：1—7）。

第9节，这是teh指西底家受掠后ê情形，伊被「带到巴比伦王hia」，伊ê kiáⁿ被当tio̍h伊ê面刣死，伊家己ê目睭mā被挖出来，然后伊被铜链捆绑拖去巴比伦，mā死tī巴比伦，这就是此节所讲ê「koh khah án怎都听无看tio̍h它ê咆哮」ê原因（参考耶利米书三十九：4—7）。