Chit章真特别，是用葡萄树来做譬喻，说明无结出果子ê葡萄树，最后只有ē-tàng被当做柴火烧而已。因为án-ne，用无结出果子ê葡萄树来表明耶路撒冷，就算隐藏tī树林中，mā tio̍h被拣出来弃sak。

第1到2节，「葡萄树怎样ē-tàng kah别ê树相提并论」，表示葡萄树kah一般ê树无仝；一般ê树，通常lóng thang做建材，m̄-koh葡萄树却只有结果子ê功能而已。先知以西结传出上帝chit种信息，是带有质疑ê意思，主要teh说明以色列人民若是葡萄树，却无结出果子，án-ne它比其他ê树iáu不如。

第3到5节，chit节讲出无法度结出果子ê葡萄树，到底iáu有甚么用途？chia特别提起就算想用它来做成「挂物件ê木钉」mā bē-sái，「只有ē-tàng用来生火」，完全无其它ê功能，表示它是一无是处。

第6到7节，上帝beh惩罚他ê子民，就kah-ná「tùi树林内kā葡萄树拣出来烧仝款」，这就真清楚表示这葡萄树已经无甚么作用à，只有ē-tàng当做柴火烧而已。「即使in逃出一场火灾，有另外一场大火会kā in烧尽」，chit句话真清楚隐喻西底家王当时ê处境，hit时耶路撒冷城被攻陷，伊kah随从护卫lóng tùi城内逃了出来，m̄-koh伊却tī半途被耶路撒冷ê军队追上，巴比伦王tī伊面前刣死伊ê kiáⁿ，iáu kā伊ê目睭挖了出来，然后用铜链锁tiâu伊，kā伊带到巴比伦（参考列王记下廿五：1—7）。

第8节，chit节讲出上帝会án-ne惩罚他ê子民，是因为in对上帝「不忠」，去拜偶像神明，弃sak了上帝，ná亲像bó͘弃sak了家己ê丈夫一般。