Chit章是谈起有关以色列人民ê长老来chhōe先知以西结，虽然chia并无说明in来chhōe先知以西结谈kóa甚么问题，m̄-koh tī第八章1节、第十二章1等处lóng有记载chiah-ê长老来chhōe伊，是想beh了解上帝ê旨意。先知以西结ê回答真清楚，若是以色列人民弃sak上帝，必定会带来灭亡。若是有人ē-tàng得tio̍h生存机会，是因为hiah-ê人对上帝忠实，得tio̍h上帝ê怜悯kah拯救，m̄-koh chiah-ê劫后余生ê人民，并bē-tàng救别人，只有ē-tàng救家己。Chit种观念tī第十八章有进一步ê阐述。

Koh讲，tī chit章经文中特别提起挪亚、达尼尔，kah约伯等三人，主要tī重新解释以色列人民久长以来流传落来ê观念：得救，并m̄是óa靠祖先ê庇荫，chit种观念需要纠正，chit点mā tī行洗礼约翰ê信息中传达出来（参考马太福音三：9）。Ē-tàng得tio̍h上帝拯救ê，唯一ê途径就是认罪悔改，无其他捷径（参考耶利米书十八：7—8），约拿书中mā提出chit种信仰认知。

Chit段经文是谈起上帝beh先知以西结回答chiah-ê来询问伊上帝旨意长老ê内容。先知以西结并无hō͘ in chiah-ê长老安慰á是鼓励ê话，却是koh一pái kā伊谴责in弃sak上帝，去拜偶像神明ê罪行，chiah会致使今á日沦落成做奴隶ê原因。先知以西结强调上帝ê话就是：只有认罪悔改，chiah是得tio̍h上帝怜悯、赦免ê唯一途径。

第1节，chia用「以色列人ê长老」chit位词，代表ê m̄-nā是南国ê长老，却是包含所有以色列人民ê意思。Chia所讲ê「长老」，其实就是全体以色列人民ê领袖，虽然in是tī受掠ê集中营区，á是非常有影响力ê意见领袖。

第2到3节，上帝beh先知以西结回答chiah-ê长老，讲chiah-ê带头ê长老iáu teh「迷恋」、「跟tòe」偶像ê行踏，因为án-ne，就算in想beh了解上帝ê旨意，上帝mā bē「回应in」。Chit种回应等于讲上帝无koh垂听in祈祷ê声音。

第4到5节，chit两节所讲ê「以色列人」是包括北国以色列kah南国犹大ê人民，mā是表示北国以色列会灭亡，以及现在南国面临ê灭亡问题，lóng是kah人民去拜偶像有关。上帝用chit种方式「亲自教示」in，上帝希望用chit种方式「赢tńg来」全体以色列人民对他ê「忠心」。

第6节，希伯来文所用ê「tńg来」，意思是teh指「转向、转离」，chiah-ê用词lóng是teh指「悔改」ê意思。上帝beh他ê子民ē-tàng「弃sak」现在拜ê「偶像」，mā就是hiah-ê hō͘上帝「憎恨ê物件。上帝所喜爱ê，就是他ê子民对他忠诚。

第7到8节，chia第7节thang参考第4节，而第8节thang参考第十三章9节。

Chia讲tio̍h上帝要求ê范围扩大到khiā起tī以色列人民「中间ê外侨」，原因是chiah-ê侨居tī in中间ê人，若是拜偶像，就会影响tio̍h in对上帝ê忠心。In既然「弃sak」上帝，soah koh想beh透过先知明白上帝ê旨意，这是侮辱上帝ê神圣。因为án-ne，上帝beh「亲自教示」、惩罚in，koh khah严厉ê是beh「开除」in，hō͘ in无koh是上帝ê子民。

第9到11节，chit段经文是假先知ê问题，in kan-taⁿ会讲虚假ê话来迷惑人民。Chia真清楚指出，会有假先知出现，是上帝允准假先知去迷惑他ê人民。因为以色列人民已经去拜偶像神明，koh想tùi先知得tio̍h上帝ê旨意。Á chiah-ê先知并无真实传达上帝ê信息，却是为tio̍h取悦人民讲假话，hiah-ê人虽然知影in是假先知，却附kah in所讲ê话。因为án-ne，上帝必定会追究听从假先知ê人民。上帝会án-ne做，是为tio̍h希望chiah-ê弃sak上帝ê子民kah众先知，会知影回转过来，而知影走chhōe上帝ê怜悯、赦免，然后「无koh犯罪而污辱家己」，án-ne，上帝会照所立ê约，承认以色列人民就是他ê子民，他beh做in ê上帝。这mā是先知以西结所强调ê，上帝会用惩罚来筛选忠实ê子民，koh一pái重新拣选。