以西结书 14章12节 到 14章23节   背景资料  上一笔  下一笔
Chit段经文真重要,讲出对上帝信仰ê忠诚,m̄是靠祖先累积ê成果做凭据,却是每一个人一定tio̍h为家己ê信仰态度kah行为向上帝负责。Tī chit段经文mā提起上帝所用ê惩罚是非常严重ê,chiah-ê惩罚包括战乱、饥荒、野兽,kah瘟疫等四种惊人ê灾难,作者希望用chit种警语hō͘大家醒悟过来,而会即时改邪归正,顺服上帝ê教导。

Koh讲,chit段经文mā提起圣经siōng常出现ê代祷功课,ná亲像亚伯拉罕为所多玛、蛾摩拉城ê罪恶代求仝款,希望慈悲ê上帝会赦免犯罪ê人民。Chit段经文mā提起三位tī传说中ê信仰模范生,包括有挪亚、达尼尔,kah约伯这三人,m̄-koh就算是有án-ne信仰楷模者tī,in mā只有ē-tàng救家己,却m̄是因为有in三人,上帝就赦免了所有弃sak上帝去做邪恶ê tāi-chì ê人。

第12到134节,对tī一再悖逆ê子民,上帝最后采取惩罚ê方式,就是用严重ê「饥荒」当做惩罚方式。当人kah cheng-seⁿ lóng面临iau饿ê性命威胁ê时,chiah会发现家己ê软弱、有限,而且in所拜ê偶像神明mā bē-tàng做甚么,kan-taⁿ会hō͘人放sak。

第14节,chit节kah第20节仝款。

Chit节提起「挪亚、达尼尔,kah约伯三个人」,这是古代真有名望ê人,是大家公认ê义人,in lóng有真好ê「义行」。Chia ê「达尼尔」,其希伯来文是「Dani’el」,中文《和合本》用「但以理」,为tio̍h kah圣经中ê「但以理」区别(希伯来文是「Daniyye’l」),所以《现代中文》译本用「达尼尔」chit-ê名字。不过圣经中只有tī chia出现「达尼尔」chit-ê名字,并无记载关系伊ê事迹。先知以西结想beh表达:chit三个人lóng是上帝眼中ê「义人」,m̄-koh就算有in ê代祷,上帝会垂听,in mā「只有ē-tàng救家己」,因为拯救ê恩典kah主权是tī上帝手中,并m̄是来自某一个人。无任何人ē-tàng救别人免tī上帝忿怒ê惩罚。

第15到16节,chia讲上帝会用「野兽」来惩罚悖逆ê子民。即使是有挪亚等「三个人tòa tī hia,in mā无法度救家己ê kiáⁿ;in只有ē-tàng救家己,而土地会变成荒野」,chit点真清楚teh警告已经被掠到巴比伦做奴隶ê以色列kah犹大人民,m̄-thang总是期待有祖先á是信仰伟人ê代求,he是无用ê,只有家己认罪悔改chiah是正途。

第17节,chit节提起「遭遇战乱,锐利ê刀剑」,chiah-ê lóng是teh指战争,表示上帝惩罚ê一种方式。Chia指出严重到「Kā人kah cheng-seⁿ lóng刣了了」,表示彻底毁灭ê意思。

第18节,chit节kah第14节、第16节、第20节等等仝款。

第19节,chit节提起另外一种惩罚,就是「瘟疫」,而且是非常厉害,因为teh传染病「猖獗」之下,死亡会降临hō͘「人kah cheng-seⁿ lóng刣了了」。

第20节,koh一pái重复第14节、第16节、第18节ê句话。

第21节,「战乱、饥荒、野兽,kah瘟疫」,chia讲此四种是「siōng惊人ê灾难」,意思是teh指超过人ê能力thang防止á是降低死亡。Chit节mā特别指出chit四种「惊人ê灾难」是beh降临到「耶路撒冷」,当做上帝惩罚hit-ê城人民ê恶质行为。

第22到23节,当大灾难来临ê时,若「有人佳哉免得,koh救出了伊ê kiáⁿ」,chia先知以西结特别提醒,m̄-thang认为chiah-ê逃出来ê人是khah好ê,á是照上帝ê话去遵行ê,不,只要「注意观察」,就会发现in是「jōa-ni̍h-á邪恶」、败坏,因为án-ne,tùi chiah-ê逃出来ê人ê身上kah行为,tú好thang来证明上帝会án-ne严厉惩罚耶路撒冷,并m̄是无端冤枉人,却是lóng「有理由」,而且chiah-ni̍h严厉ê惩罚是「应该ê」。Chiah-ê人只不过是目nih-á地存活落来。

重新查询 专卷研经 以西结书系列
错误回报,请联系comm[@]fhl.net