以西结书 12章1节 到 12章16节   背景资料  上一笔  下一笔
第十二到十九章是一个新ê段落。Tī chit段落中,ná亲像头前所讨论过关系耶路撒冷城毁灭ê事,koh一pái提出来,为tio̍h是beh希望犹大人民会相信伊传达ê信息,这mā表示人民ê心是刚硬ê,根本就听bē落去先知以西结传讲kā in赐福ê信息。

头前提过先知以西结siōng特别ê所在,就是用身躯语言来表达上帝ê旨意。Chit段经文ná亲像头前第四到五章所扮演ê行动剧般,用这来说明耶路撒冷会遇tio̍h摧毁ê景象,伊用逃亡者通常lóng会带ê行囊来说明hit-ê城teh beh毁灭,人民会四界逃窜来说明。

第1到2节,上帝讲他所拣选ê子民竟然是「悖逆」他旨意ê子民,这「悖逆」一词是teh指心刚硬ê意思,á是故意违抗ê态度。

「in有目睭,却看bē-tio̍h,有耳á,却听无看tio̍h」,这mā是先知以赛亚tī kā伊谴责ná时代ê犹大人民所用ê词句(参考以赛亚书六:9—10)。先知耶利米mā bat用类似ê句话teh谴责犹大人民(参考耶利米书五:21)。耶稣mā bat用引用先知chiah-ê话语来提醒他ê门徒,m̄-thang陷入像先知时代ê犹大人民仝款(参考马太福音十三:13—15,马可福音四:12、八:18)。

第3到6节,是上帝beh先知以西结用另外一种身躯语言ê样式来传达信息。

上帝beh先知以西结「准备流亡ê时所需要ê包袱」,这是teh指亡国后逃亡、流浪各地ê时,tī路上需要ê物件。然后「天乌以前」就tī「大家金金teh看下离开」,表示犹大人民会hông掳去做奴隶。上帝beh先知以西结用chit种行动剧,希望ē-tàng唤醒犹大人民,有可能chiah-ê「悖逆ê人会注意tio̍h」先知以西结chit种行动。M̄-koh真正ê问题是:in并无一定看tio̍h就会明白。「需要用包袱」,mā是先知以西结亲身ê经历,伊真清楚需要带kóa甚么物件。然后上帝beh伊当tio̍h犹大人民面前tī厝内ê「墙上挖一个洞」,续落来是tī众人「目睭前kā包袱背tī肩头,蒙着(tio̍k)眼睛行出去」。Chit种tī墙壁顶挖洞ê动作,tú好象徵着有如小偷the̍h贼利用暗时看bē-tio̍h ê时刻,á是无人想像会tio̍h ê时chūn,á是tī lóng无防卫能力ê时chūn,忽然ná亲像窃贼一般进入厝内,窃行所有ê物件。

Chit段经文mā可能是teh暗示主前586耶路撒冷城被巴比伦军队攻入ê时刻,犹大末代国王西底家kah随从跟tòe逃离出城,后来被发现掠ê景况(参考列王记下廿五:4—7,耶利米书三十九:4—7)。

第7节,等于是kā头前所提起ê,做一个总结,表示先知以西结确实是遵照上帝hō͘伊ê指示去做。

第8到9节,「第二工早起」,这说明前一工ê动作,先知以西结lóng是遵照上帝ê指示去做,然后有人看tio̍h会问先知以西结,m̄-koh并m̄是伊ē-tàng家己解释,因为这是照上帝ê话做,就beh照上帝hō͘伊ê启示去解释其意。

第10节,「针对tī耶路撒冷统治ê领袖kah居民讲ê」,这表示上帝是beh对所有耶路撒冷城ê人民,m̄-nā是领导阶层,包括一般人在内讲chit-ê信息。Chia ê「居民」一词,mā thang表示身边幕僚大臣,是teh指国王身边ê幕僚人员。这koh khah清楚表示:一个领袖身边ê幕僚,tio̍h kah领导者仝款负担仝款ê罪责。因为in是thang讲谏言、扶正国王偏差ê行为,hō͘领袖所做ê决定、策略,是正确ê。

第11到14节,是上帝beh先知以西结kā犹大领袖kah人民讲ê话。

「动作是一种预兆」,而这预兆表示犹大人民会「沦落做难民,做俘虏」,虽然有领袖人物想beh逃亡,m̄-koh in ná亲像蒙着(tio̍k)眼睛ê人仝款,m̄知该往tó位去chiah安全。上帝拣选巴比伦王当罗网,而这罗网就是为tio̍h beh捕掠犹大人民领袖而织成ê,然后kā in「带到巴比伦」chit句话,回应了第12节所讲ê「看bē-tio̍h beh去ê所在」,而且是「iáu无看见hit-ê城就beh死」,chit句话mā讲出了西底家王虽然是hō͘掠到巴比伦,却因为目睭被巴比伦王hō͘刨出来,失明而无法度看见ê意思(参考列王记下廿五:7)。而且「宫廷内所有ê人,包括顾问kah侍卫赶散到各国」,chit句话真清楚说明chiah-ê过去享受高官爵位ê人,taⁿ lóng会成做被优先惩罚ê对象,原因in lóng是过去参与策划á是推动弃sak上帝ê要角,á是扮演重要谋略ê人。而且无论chiah-ê人怎样逃,都无用,因为「人会四界追捕in,刣灭in」,这真清楚teh说明上帝ê忿怒,除了是上帝所beh留落来ê残存对象外,其余lóng无法度闪过上帝ê惩罚。

第13节tī第十七章20节、第三十二章3节koh一pái提起。表示chit款tāi-chì一定会实现。

第15到16节,chit句「in就知影我是上主」tī第20节lóng koh一pái出现,mā是先知以西结一再使用ê句话,表示犹大人民经历过án-ne残酷ê性命境遇了后,chiah会醒悟过来,chit时chūn chiah体会出真正上帝是甚么人,m̄-koh为ê时已晚,因为chit时in已经沦落为他国ê奴隶了。Tī这大灾难中,上帝á是留落来一阵「残存ê人」á是劫后余生chit种信息,说明上帝tī非常忿怒ê中间,mā存怜悯ê心,hō͘ hiah-ê忠心tī上帝ê子民thang保存性命。Á chia mā koh一pái提起上帝惩罚ê方式,是用「战乱、iau饿、瘟疫」这三项。M̄-koh上帝决定beh保存ê chit群劫后余生ê kiáⁿ民,会避开chiah-ê灾难,为tio̍h是beh hō͘ chiah-ê人当见证者,tī「流亡ê各国讲述家己以前所做ê是jōa-ni̍h-á 可恶,并且tio̍h承认」耶和华上帝chiah是真正神。

重新查询 专卷研经 以西结书系列
错误回报,请联系comm[@]fhl.net