Chit段经文记载先知以西结看见第一个异象—「四个活物」，mā详述有关这「四个活物」ê长相。特别tio̍h注意ê是，tī以西结书中一再出现「四」这数字，此数字tī以色列文化中，有「周全」、「东、西、南、北」四方ê意思（参考创世记十三：14）。Tī以西结书中，用来表示「四面八方」（参考十九：8、廿八：23、三十九：17），指全世界ê意思。Mā用来表示「四周」（参考六：5、13、四十：25、29、33、36、四十一：12、四十二：15、四十三：13、四十八：17、35）。 
第4节，先知以西结讲伊注意「观看」有「暴风tùi北方刮来」，是夹带「sìh-nà tùi一堆云层里闪出」。这表示若是无一堆云层遮这sìh-nà，看见ê人恐惊会有性命ê危险。因为圣经作者ài用上帝出现ê时会发生强烈ê闪光，会用厚厚ê云层来遮他发出ê亮光（参考出埃及记十九：16、18、四十：34），免得人因为看见上帝ê面来死去（参考出埃及记三十三：20）。

第5到12节，chit段经文描述chit四个活物ê几种样式：

一是「形状像人」（第5节）。

二是四个活物lóng各有「四张面」（第6节）。这四张面ê长相lóng无仝款，tī「头前ê像人，正pêng ê像狮，tò-pêng ê像牛，后面ê像鹰」（第10节）。Á这「四张面」ê每一张面lóng是「向(ǹg)四方」看kah非常清楚。

三是有「四只翼股」，tī chit四只翼股中，「有一对翼股往上展开，kah附近ê翼股连接，koh有另外一对翼股遮盖家己ê身躯」（第11节）。

四是有「笔直ê腿」，这表示四个活物无法度像人仝款，thang kā腿弯曲，只有ē-tàng挺直地khiā-teh。

五是「脚蹄像牛蹄」，而且会发亮ná亲像擦亮ê铜一般发光。

第13节，chit节真清楚讲出四个活物所代表ê，并m̄是真实ê生物，却是一种象徵性ê形体，teh表示荣耀ê光芒，ná亲像「火烧ê火炭」，「像火炬」一般不断来「冒出火焰，发出闪光」，chit种景象lóng teh说明两种意义，一是上帝来临（参考出埃及记廿四：15—18），所带来ê是赐福、洁净（参考出埃及记廿九：43）。二是上帝ài beh进行审判ê时，mā会出现chit种类似荣光ê景象（参考出埃及记十六：7、9—10、民数记二十：6），所带来ê是严厉惩罚。

第14节，kā此节kah第12节连结做伙看，就会知影chiah-ê活物并m̄是tòe己意行动，却是跟tòe上帝ê旨意、命令而动。而且其速度之快，ná亲像「sìh-nà」一般，无人ē-tàng知影甚么时chūn会达到，mā m̄知会停留jōa久时间。