这是第五个灾难，mā是致使性命死亡ê瘟疫之灾。Tī旧约圣经，先知耶利米一再提起上帝惩罚悖逆ê以色列人，就是用「战争、饥荒、瘟疫」等chit三种（参考耶利米书十四：12、十六：4、十八：21、廿一：7、9、廿四：10、廿七：8、廿八：8、廿九：17）。以色列人离开埃及后，tī旷野mā一再得罪上帝soah tú-tio̍h上帝惩罚所带来ê瘟疫（参考出埃及记三十二：35、民数记十一：33）。

第1到5节，因为埃及国王「心犹原刚硬」，因为án-ne，上帝koh一pái差遣摩西去告诫埃及，特别hō͘埃及王知影，伊所藐视ê「希伯来人ê上帝」ài伊「放以色列人民行」，thang hō͘ in去「敬拜」上帝。Koh一pái说明宗教信仰ê重要性。如果埃及王拒绝，上帝一定会用「惊人ê灾难」，mā就是瘟疫来惩罚伊kah埃及人民。

第4节kah第八章23节仝款，上帝ài kā以色列人tùi埃及人中区别出来，以色列人无亲像埃及人会受tio̍h瘟疫ê灾难。当埃及人ê家畜大量死亡ê时，以色列人ê家畜连一只mā bē减少、死去。

第6到7节，摩西向埃及国王讲完上帝chit种信息ê隔工，埃及人ê牲畜果然大量暴毙，á以色列人却连「一只mā无死」。当埃及王听tio̍h以色列人ê家畜lóng无受tio̍h伤害ê时，伊非常受气，m̄-koh心iáu是仝款「刚硬」。

Chit-ê瘟疫ê灾难thang看tio̍h损失ê虽然是家畜，m̄-koh，埃及ê经济是受tio̍h重创ê。表面上是马、驴、骆驼、牛、绵羊，kah山羊等损失，m̄-koh像马、驴、骆驼、牛等iáu牵涉tio̍h交通、运输，以及种作ê问题，因为in大量死亡á hō͘埃及全国陷入半遂。