出埃及记 8章20节 到 8章32节   背景资料  上一笔  下一笔
这是第四个灾难—苍蝇之灾。这是属tī「耶和华文献」特有ê资料。Tī诗篇第七十八篇45节、第一○五篇31节mā提起此灾难。

第20到24节,上帝koh一pái差派摩西去见埃及王,koh一pái ài埃及国王tháu放以色列人民—上帝ê子民—去「敬拜」他。若伊拒绝,上帝会施行「苍蝇」ê灾难。

第20节强调hō͘以色列人民离开埃及,为tio̍h是beh hō͘ in去敬拜上帝,chit点是出埃及记主轴ê信息,mā thang看出kui本出埃及记,就是一个宗教运动。

第22节讲出一个重要ê信息,以色列人kah埃及人tio̍h区别出来。Tī in所khiā起ê歌珊之地,连「一只苍蝇mā无」。苍蝇是会四界乱飞ê昆虫,却会听从上帝ê指令。因为苍蝇mā是上帝创造之物。连chiah-ni̍h细ê昆虫lóng知影上帝就是性命ê主宰,会听从上帝,á埃及国王kah人民却拒绝听从。上帝会án-ne惩罚埃及国王kah人民,就是beh hō͘ in知影他chiah是「全地ê主」,表示上帝是大地ê主宰,他差遣苍蝇进入埃及人khiā起ê所在。

第25到27节,埃及国王终其尾表示愿意hō͘以色列人民去敬拜上帝,m̄-koh限定tī埃及ê「国境内」去向上帝「献祭」。M̄-koh摩西表示giâu疑,因为宗教信仰差别,会致使埃及人骚扰以色列人民ê献祭,原因是以色列人民献祭thang用牛,á埃及人kā牛当做神明来看,chit点tùi以色列人民后来进入旷野后,bat用金子铸造金牛崇拜ê事件看出来(参考出埃及记三十二:4)。因为án-ne,摩西坚持beh「旅行三工,到旷野」去向上帝献祭。

第28到29节,就án-ne埃及国王只好妥协,伊若无妥当协,苍蝇ê灾难确实造成生活bē-tàng安宁。M̄-koh伊要求无法度行太远,á koh khah重要ê,伊ài摩西为伊向上帝祈祷。摩西答应tī离开埃及ê时chūn,就为伊祈祷。M̄-koh伊提醒埃及王无法度「欺骗」,因为埃及王已经有真chē pái不守诺言à。

第30到32节,埃及王koh一pái欺骗摩西,当苍蝇lóng消失了后,国王ê「心犹原刚硬,不放以色列人民行」。Án-ne等于是欺骗上帝,一定会带来koh khah大ê灾难。	

重新查询 专卷研经 出埃及记系列
错误回报,请联系comm[@]fhl.net