这是第三个灾难，mā是「虱母」之灾。虱母，天主教《思高版本》ê翻译做「蚊á」，mā有其它版本翻译做「蛆虫」之灾。如果以尼罗河下游环境ê沼泽地带来看，讲「蚊á」、「蛆虫」lóng是非常可能ê。 Chit-ê灾难只出现tī「祭司」ê文献中。

第16节，因为埃及国王ê心koh刚硬起来，拒绝履行伊所应允beh hō͘以色列人民离开，去旷野敬拜上帝。因为án-ne，上帝继续打击埃及。Chit-pái beh「hō͘埃及遍地ê尘埃lóng变成虱母」。

第17到18节，摩西叫亚伦用伊手中ê拐「击地」，就án-ne，只要有尘埃ê所在，就有虱母ê灾难出现。M̄-koh仝款ê，埃及国王ê巫师mā施行法术，m̄-koh只造成koh khah chē虱母ê灾难。Ná亲像第七章11节、22节，kah第八章7节所记载巫师所做ê仝款，致使「人kah家畜身上lóng是虱母」，这thang看出灾难之大。

第19节，这是非常重要ê一节，chia讲巫师mā承认in无法度抵挡上帝，只好讲：「Chit件事是上帝做ê！」chit句话原本ê意思是teh指「上帝ê手造成ê」，表示上帝ê手创造一切。其实，巫师ê chit句「这是上帝做ê」，mā teh kā埃及国王讲，in已经无法度kah上帝对抗，国王应该tio̍h知难á退à。

值得注意ê是chia并无讲埃及国王向摩西kah亚伦祈求消除灾难，只有记载「国王ê心犹原刚硬」，表示伊beh继续kah上帝对抗ê意思。