Chit段是描述摩西kah亚伦去见埃及国王了后，国王改变政策，致使以色列人民koh khah痛苦，mā引起以色列人民痛恨摩西kah亚伦。这mā讲出上帝忠实ê奴仆传达上帝ê信息，tú开始之初，往往会因为带来改变á引起性命ê痛苦。

第10到14节，因为是国王直接对埃及监工kah以色列人民ê领班下命令， ài以色列人民家己去载运、chhōe材料，m̄-koh工作数量却无法度tùi án-ne减少，tī chit-ê情况下，in真正是无法度如期交出本来thang交出ê量，结果chiah-ê以色列人民ê领班开始受tio̍h埃及监工严厉ê「鞭phah」。

第15到19节，以色列领班去见国王，in向国王「请求」，mā等于是向国王「求救」仝款。虽然是国王下命令，in认为可能是埃及监工家己ê意思，á是国王听in说明后，会改变政策mā无一定。

M̄-koh埃及国王ê回应却是如监工告知in ê仝款，并且认为in是「pîn-tōaⁿ」、「偷闲」chiah会有chit种想beh敬拜上帝ê念头。严词tńg来绝了以色列人民领班ê请求。Chit时，in chiah醒悟过来，讲「大祸临头了」。

第20到21节，chiah-ê领班看见摩西kah亚伦，责怪in。In无koh相信摩西kah亚伦真正是tùi上帝来差遣，认为in只是假借上帝ê名义乱讲话ê假先知。若无in怎样会带hō͘以色列人民koh khah大ê痛苦？