第三十五章到四十章全部lóng是「祭司文献」ê资料
Tī chit-ê六章中，会发觉内容真熟悉，这是因为头前已经有提起过关系圣幕kah圣幕内ê器皿kah物件ê pái设kah制造方式。Tī chit-ê最后ê六章中，「祭司文献」作品表现出它ê特色，就是对祭典礼仪ê重视。作者真详细记载chiah-ê典章律例，为tio̍h是beh教导以色列人一定会用顶真ê态度敬拜上帝，因为in kui个民族之所以ē-tàng存在，就是有上帝ê怜悯kah赦免。

Chit章到第三十九章就是重复叙述有关圣幕制造ê过程kah规律。

chit三节是关系守安息日ê规定。这mā是十诫ê第四诫，thang参考出埃及记第二十章8到11节。

第1节，摩西一开始就强调这是出tī上帝ê「命令」以色列人一定tio̍h「遵行ê事」。Chia ê「命令」，表示上帝ê话。Mā是性命ê源头（参考约翰福音一：1—4）。

第2节，thang参考第十六章23到30节、第二十章8到11节、第三十一章12到17节等等，lóng记载强调守安息日ê重要性，这表示teh维护性命ê延续。

Ná亲像第三十一章12到13节所提起ê，守安息日，是用来表示kah上帝之间有约ê凭证。换句话讲，遵守安息日，chiah ē-tàng表示是属tī上帝ê子民。因为án-ne，当摩西teh向上帝陈述以色列人是上帝ê子民ê时（参考出埃及记三十三：13），上帝就ài in以遵守安息日来表白。

第3节，chit节讲安息日厝里bē-tàng开炉灶起火煮饭，前一工就beh准备好。Chit点teh降吗哪ê时，就已经教导过（参考十六：23）。