Chit段经文描述摩西带上帝ài伊颁布hō͘以色列人ê诫命法版落山，却看tio̍h以色列人当teh狂欢作乐拜金牛偶像，大忿怒，kā两块诫命法版摔毁tī土脚，同时决定kā参与膜拜金牛偶像ê以色列人刣死，á执行chit项命令ê就是利未族人。

第15到18节，摩西手上the̍h-tio̍h上帝「亲自做ê这两块石版」，顶面刻有上帝颁布ê诫命，带tio̍h伊忠心ê弟子约书亚落山，hit时约书亚iáu认为是teh相刣，m̄-koh摩西已经tùi上帝hō͘伊ê消息知影以色列人背叛上帝拜偶像ê声音。

第19节，摩西kā上帝亲手写ê两块诫命石版「摔tī土脚，摔碎了」，表示以色列人kah上帝ê关系ná亲像án-ne毁坏à。chit-ê诫命就是以色列人kah上帝之间「立性命ê约」ê记号。

第20到24节，摩西kā hit-ê金牛烧毁熔化后，磨成粉，然后kā hiah-ê粉末掖tī水上，要求以色列人民lim落去，用chit种方式来kā以色列人讲，hit-ê金牛偶像是虚假ê神明，人lóng thang kā它吞咽落去，koh有甚么好拜ê？Chit种捣毁偶像成灰ê方式mā tī后来ê犹大约西亚王重演一pái（参考列王记下廿三：15）。

摩西对亚伦非常受气，虽然亚伦解释伊替人民做chit只金牛ê原因，m̄-koh mā因为chit件事，hō͘伊看出亚伦m̄-nā无能力带领以色列人，甚至会「hō͘ in犯chit种重罪」，这mā是后来带领以色列人ê领导权移交到约书亚身上ê原因。所谓「重罪」，是teh指悖逆上帝去拜偶像ê意思。

第25到29节，这是一段相当重要ê经文，讲出信仰ê基本态度—性命ê选择。上帝m̄准他ê子民对他不忠实，这mā是十诫中ê siōng基本诫命，就是第一诫所讲ê：「我以外，不可敬拜别ê神明。」信仰既是性命ê选择，就bē-tàng随便。因为án-ne摩西要求「凡属上主ê人」lóng到伊ê身边，结果「所有利未人就lóng结集tī伊身边」，in lóng听从摩西ê命令，执行「净化」ê惩罚，就án-ne约有三千拜偶像神明ê人被杀。Chit种事件对tī以后以色列人进入迦南地有相当ê教育作用，因为kui个出埃及ê运动，就是用「耶和华宗教」信仰teh带领，因为án-ne，kā信仰内涵厘清是相当重要ê。Mā tùi chit件事，改变了创世记第四十九章第7节，雅各晚年诅咒利未人ê「分散tī以色列全境」，变成分别为圣ê祭司，专心tī圣所事奉祭祀礼仪ê祭司，提升利未族人tī以色列人心中ê地位。