出埃及记 30章1节 到 30章10节   背景资料  上一笔  下一笔
Chit章讲tio̍h ê问题有圣所内面所需要配备ê物件,包括烧香ê坛;洗手kah洗脚用ê铜盆;制造圣油、香等物件ê规矩。

Chit段经文是有关烧香ê坛ài怎样建造ê细则。Chit-ê坛mā称做「金坛」(参考列王记上七:48),因为这是一个用黄金包裹起来坛(列王记上七:48)。

后期ê诗人讲「香」,就ná亲像是上帝子民祈祷ê声音,跟tòe香ê烟,袅袅上升到上帝hia(参考诗篇一四一:2)。是以色列人用来表示「真实ê心,祈祷tī上帝面前」ê一种象徵,表示人ê内心ná亲像「香」仝款有好气味呈到上帝面前。Mā因为án-ne,后来有一个传统,只要是轮值祭司抽签会得thang进入到圣所献香祈祷ê时,民众就会到圣所外面聚集祈祷。Án-ne,in ê祈祷就会跟tòe祭司献祭烧香ê时所出现ê烟往上升到上帝ê面前(参考路加福音一:10)。Chit座香坛是hē tī约柜前帐幔外ê中间,正pêng有供桌,tò-pêng有灯台。

第1到2节,提起chit座香坛ê形状是四方形。材质是金合欢木,kah圣所ê木材仝款。

第3到5节,chit座香坛一定tio̍h用金子包裹起来,kah约柜仝款是thang移动ê。

第6节,香坛一定tio̍h hē tī约柜头前ê帐幔外,á上帝会tī帐帷后面ê约柜出现。

第7到8节,每工ê早起kah beh暗á点香,这香绝对「bē-tàng间断」。献上香,mā有另外一个意义,表示thang用香ê气味消除上帝ê受气(参考创世记八:21)。

第9到10节,提起禁止kā制造家用香ê材料,用来制造烧hō͘上帝用ê香。后来亚伦ê kiáⁿ拿答kah亚比户,因为做chit种事,á丧失性命(参考利未记十:1—2)。

每年有一pái为这香坛举行洁净ê礼仪,一方面表示制造香ê人,可能因为手不清气,用洁净礼来表示赎罪。另外一方面,mā用洁净礼来清理一pái香坛。

重新查询 专卷研经 出埃及记系列
错误回报,请联系comm[@]fhl.net