出埃及记 25章10节 到 25章22节   背景资料  上一笔  下一笔
Tī造圣所ê工作上,事(tāi)先tio̍h讲起有关建造约柜ê细节。约柜内面siōng主要ê是上帝所颁布,而且亲手写ê两块记载诫命ê石版。Koh再参考出埃及第十六章33到34 节:「摩西对亚伦讲:『the̍h一个罐子,放两公升吗哪 tī罐á内,存在上主临在ê所在;这是为咱ê kiáⁿ孙留落来ê。』上主án-ne吩咐摩西,亚伦就照样作à。伊kā罐子 hē tī约柜头前,保存起来。」因为án-ne,约柜内面m̄-nā放诫命ê石版,mā放两公升吗哪。

第10到16节,讲述建造约柜ê kui个细节,包括约柜ê形状、使用ê材料。Chit种「金合欢木」,是一种会发生香味ê木材,mā因为án-ne,约柜就会发生芬芳ê气味,收藏tī内面ê吗哪,bē致使被虫食掉。希伯来书第九章4节讲约柜内面iáu放tio̍h亚伦手中ná根已经发过芽ê杖。

第17到22节,是有关盖tī约柜顶面ê盖(kòa)。Chit-ê盖koh kā它称做「施恩座」,希伯来书第九章5节讲这是「赦罪座」,意思是teh指以色列人民透过献祭,表明忏悔,上帝就怜悯in。因为án-ne,约柜ê盖子就象徵tio̍h上帝ê慈爱、怜悯kah恩典,意思lóng是teh指kah上帝和好。因为约柜内面放ê是上帝ê诫命,是上帝kah以色列人立约ê记号。因为án-ne,盖子顶面雕刻一对「基路伯」,样式真亲像「人面兽身」,而且有翼股ê怪象。Chit种基路伯ê样式thang参考以西结书第一章5到9节。创世记第三章24节讲,当人食了分别善恶ê果子了后,上帝特别差派基路伯固守伊甸园,保护性命树无koh hō͘人食到。因为án-ne,基路伯mā是上帝ê天使、奴仆。Án-ne,约柜盖子上ê基路伯,是teh代表守护约柜ê上帝奴仆。

重新查询 专卷研经 出埃及记系列
错误回报,请联系comm[@]fhl.net