第13到16节，chit段经文提起上帝实现他ê应允，hō͘以色列人民有肉食，tī beh暗á ê时刻，他差遣鹌鹑飞来，mā hō͘以色列人民tī天光ê晨间看见一层薄薄像霜仝款ê物件，chit种物件民数记第十一章7到9节形容是「芫荽子」，是种kah露水同齐落落来，thang kā它磨碎á是捣碎成粉，然后煮一煮做成饼。M̄-koh chit种物件ná亲像申命记第八章3节所讲ê，he是以色列人民ê祖先从来无看过、食过ê食物。Mā因为án-ne，以色列人民彼此问讲：「这是甚么？」chit句问话就是后来「吗哪」ê意义。诗篇ê作者讲「吗哪」是「天使ê食物」（诗篇七十八：25）。摩西讲这是上帝hō͘ in ê食物，m̄-koh ài in每一个人「各取所需要ê，每家ê每一个人只thang捡取两公升」。

第17到19节，当以色列人民lóng听从摩西ê吩咐出去捡了后，后来成（chiâⁿ）实经历到：捡多ê无剩，捡少ê mā不缺，每一个人所捡ê tú tú好是伊所需要ê。Tùi chia in学习tio̍h知足ê信仰功课。

第20到21节，每一个团体中，lóng是会有故意不听话ê人，chit种人lóng是用行动来表示不遵守团体规律，这tī信仰团体里，就真hō͘人头壳痛。以色列人民中间就有人对上帝ê应允表示怀疑，虽然已经亲目睭金金看见鹌鹑kah吗哪tī目睭前，in iáu是不听摩西所讲ê，只捡取每人每工所需要ê量to̍h ē-sái。In宁可捡得多，以备隔工无降落吗哪，á是鹌鹑无koh出现。M̄-koh in多捡ê，却lóng腐败à。