出埃及记 13章17节 到 13章22节   背景资料  上一笔  下一笔
是由「耶和华文献」、「以罗伊文献」,kah「祭司文献」等三种资料交织编辑而成。

Tùi第17节到第十四章31节,lóng是记载有关上帝怎样保护以色列人脱离埃及ê追兵。除了云柱kah火柱之外,siōng出名mā一再被以色列人提起ê就是过红海ê神迹。Tùi第17节开始,直到申命记结束,lóng是记载以色列人tī旷野漂流ê经过,chit-ê漂流就长到四十年时间。

第17到18节,因为惊以色列人tú-tio̍h困难就会对出埃及ê艰辛路径产生iáu豫,所以上帝亲自带领in行比较远ê路,mā是比较安全ê路径,免得受tio̍h非利士人ê骚扰。

注意第18节,chia提起in行ê路线是「红海」。Chia ê「红海」,是teh指「芦苇之湖」ê意思,整片是沼泽地区,并m̄是指现今「红海」。Koh讲,chit节讲以色列人出埃及ê时chūn,「已经武装好,准备随时作战。」chit种写法kah-ná无jōa正确。In原本是奴隶,无可能有武器thang随时准备作战。比较khah正确ê讲法是,in出埃及ê时,带tio̍h兵器,á chiah-ê兵器真可能就是tī in出埃及ê时,随手the̍h ê防身武器(请参考十二:36),即使无埃及ê追兵,in tī经过ê路途中,mā会tú-tio̍h想beh抢夺in ê人。另外一方面,根据第六章26节,in出埃及ê时,已经真有组织à。

第19节,chit节回应创世记第五十章25节记载约瑟临终前ê交带,ài kā伊ê骨骸带出埃及。后来in进入迦南地了后,kā约瑟埋葬tī示剑(参考约书亚记廿四:32),mā就是雅各用一百块银á向示剑ê老父哈抹ê后代买来ê土地(参考创世记三十三:18—20)。

第20到22节,以色列人离开埃及进入旷野ê沙漠地带,这是早暗温差相当大ê地域,因为án-ne,日时头上帝用云柱遮tio̍h阳光,hō͘ in bē因为án-ne被日曝所伤,暗时真冷,上帝用火柱照亮in,hō͘ in会得thang保暖,而且上帝是「行tī in头前」,hō͘ in跟tòe行。这ná亲像顾羊人带领羊群仝款,行tī羊群头前,hō͘ in thang行正确ê路径。

重新查询 专卷研经 出埃及记系列
错误回报,请联系comm[@]fhl.net