出埃及记 12章1节 到 12章11节   背景资料  上一笔  下一笔
Chit章是用「祭司文献」为主轴,包括ê资料有第1到20节、第28节、第40到41节、第43到50节。然后有「耶和华文献」ê资料,包括第21到27节、第29到34节、第37到39 节。第三种资料比较少,是「以罗伊文献」ê资料,只有第35到36节。另外第42 kah 51 节是编者附加上去ê。

Chit章siōng主要是记载以色列人tī摩西kah亚伦ê带领下,终其尾行出埃及。相配合ê,就是记载两个重要ê节期,一个是Pôaⁿ过节,另外一个是除酵节。Á chit两个节期连接做伙,有时会kā它称做除酵节,有时会用Pôaⁿ过节来说明。

Tùi chit段经文teh绍介Pôaⁿ过节tio̍h注意ê事项,á是讲遵守Pôaⁿ过节ê规律,mā thang看出「祭司文献」ê特色,就是对祭祀礼仪、律法条文、数字等非常重视。

Tùi第1节ê「tī埃及」chit-ê词,就ē-tàng看出有关Pôaⁿ过节kah第15到20节ê除酵节,lóng是siōng早ê节期,早kah tī埃及ê时chūn,就已经有一个雏(chhu)形ā。

第2节提起出埃及ê hit-ê月(名叫「亚笔月」,参考十三:4)beh做一年「月份ê开始」。因为Pôaⁿ过节是tī春分了后ê月圆以后,因为án-ne,通常lóng是tī三到四月之间。Hit时是百花齐放,一切看起来lóng充满性命ê气息。Kah巴勒斯坦地区ê人秋收了后,准备过冬ê暗雾岁末真无仝款。以色列人民用chit种方式来表示:一个新性命ê起头,就是充满希望。用chit种方式来区别in kah埃及人无仝款,也kah中东地带ê人有差别。 

第3到11节讲tio̍h有关准备Pôaⁿ过节各种tio̍h注意ê事项,包括宰杀羊只,而且thang kah左邻右舍ê人同齐享用。Á宰杀羊羔ê时间是tī日头落山ê时chūn(参考申命记十六:6),这表示一工ê开始,因为以色列人是tùi日头落山开始计算一工ê时间。因为án-ne,mā thang án-ne讲,出埃及事件表明ê乃是性命ê重生。

第7节,chit节讲beh用宰杀羊ê血抹tī门框顶,当做天使巡视ê记号。这mā是teh表示tùi埃及人中间分别出来。

第9节规定羊只有ē-tàng用烘ê,无法度用煮ê。原因是:煮ê时chūn,就一定tio̍h切做块状,若无,无可能有hit种大ê锅á。若是用烘ê,chiah ē-tàng保持kui只完整。

第11节讲「这是上主ê Pôaⁿ过节」,chit句话非常重要,表示这是属tī上帝ê工作。任何人想beh改变是无可能ê。


重新查询 专卷研经 出埃及记系列
错误回报,请联系comm[@]fhl.net