Chit段经文ē-sái讲是使徒保罗写ê书信中非常特别ê一段，伊kā信仰看做是一场战争，ài有随时准备赴战场ê心理准备。原因是诱惑人弃sak上帝ê魔鬼随时会侵入到人ê身上。因为án-ne，伊kā一个基督徒看做ná亲像一个战士仝款，是穿插「全副军装」上战场去作战。

第10节，tio̍h先注意，使徒保罗tī chia所谈ê战争，基本上是kah用武力上战场无相仝，chia所讲ê是一种象徵性ê讲法，是teh指心灵ê层面。Chia ê「主」是teh指耶稣。这清楚teh说明做一个坚强ê基督徒，并m̄是óa靠家己ê能力，却是óa靠耶稣，chiah ē-tàng得tio̍h坚定ê信心。

第11到12节，chit两节是siōng重要ê经文。使徒保罗kā对抗魔鬼看做是战争，chit种战争是属灵性命存亡之战。人ê性命一定tio̍h结连tī耶稣内面，因为只有连结tī耶稣内面，chiah ē-tàng tńg来到上帝面前（参考以弗所书三：12）。Á魔鬼主要ê工作就是想出所有ê办法hō͘人离开耶稣。因为án-ne，使徒保罗提醒以弗所教会ê信徒，对抗魔鬼诱惑siōng好ê方式，就是kā家己「武装」起来，kah-ná teh对抗性命ê敌人仝款，需要「全副军装」。

注意，这「全副军装」m̄是人家己设计ê，是上帝设计供应ê。因为第12节讲敌人m̄是一般血肉之躯ê人，却是邪灵界ê气力，它是超越人ê气力所ē-tàng抵挡。Tī第一章21节，使徒保罗讲koh活ê耶稣已经「统治超越一切灵界邪恶ê执政者、掌权者、统治者，kah主宰；伊超越现世kah来世一切ê名号。」án-ne，使徒保罗ài基督徒穿「上帝所赐ê全副军装」，其实就是耶稣，因为只有伊chiah有超越邪灵ê气力。

第13节，提起án-ne「全副武装」ê装备，为tio̍h是beh准备「tī险恶ê日子里」用ê。换句话讲，诱惑人离开上帝ê气力，是随时lóng teh chhōe thang渗透ê机会进入人ê心灵中。因为án-ne，需要随时准备穿适当ê装备，以备hit日来临ê时，随时thang派上用场。

第14到17节，chit段经文看使徒保罗kah-ná是一个身经百战ê勇士仝款，其实伊写chit封phoe ê时tú hông关tī罗马监狱中，因为án-ne，每工看tio̍h当时siōng坚强ê罗马军人穿ê军服kah手持ê武器，用chiah-ê所看tio̍h ê景象来描述一个基督徒，如果beh成做「福音ê精兵」，就应该有chit种类似罗马英勇ê战士仝款，是穿插「全副军装」，包括整套ê武器在内。伊Tī chit段经文中引用罗马军人ê装备，来形容基督精兵应该有下列ê装备：
一、以真理作腰带（14节a）。Chia所讲ê「真理」指ê是真实ê意思，mā就是使徒保罗一再强调ê诚实。

二、以正义作护胸甲（14节b）。Chia「正义」指ê是正直、圣洁ê意思。

三、宣扬和平ê福音作鞋á（15节）。甚么是「和平ê福音」？就是teh指用疼为基础，是牺牲、奉献ê疼，mā就是耶稣tī十字架上ê疼。Mā因为有chit种ê疼，tī耶稣ê十字架里，大家lóng成做「成做一体」ê共同体，因「基督亲自kā和平赐hō͘咱」（参考以弗所书二：14）à。

四、the̍h信心当盾牌（16节）。盾牌，这是古代战士必备ê武装器具，用来保护身躯免受tio̍h敌方武器ê攻击。「信心」是对上帝ê óa靠，m̄是óa靠家己ê聪明才智。箴言ê作者án-ne讲：「上帝ê 话ta̍k 句lóng 有经过锻炼，见若óa 靠他ê 人，他就做in ê藤牌。(全民版)」（箴言三十：5）

五、以救恩作头盔（17节a）。头盔是用来保护头部ê，古往今来，军人lóng一定tio̍h带头盔chiah ē-tàng上战场。为甚么使徒保罗tī chia ài beh特别提起救恩ê事？除了保守派ê犹太人基督徒要求外邦人基督徒守割礼chiah ē-tàng得救ê事外，iáu有就是当时有真chē基督徒因为受tio̍h迫害往生，有人传出chit种疑问讲：真正有koh活mah？真正有得救ê恩典mah？为tio̍h chit种事，使徒保罗写hō͘哥林多教会ê书信中，特别提起死人koh活ê事（参考哥林多前书第十五章），ná亲像伊写hō͘罗马教会ê书信中所讲，基督徒是kah耶稣同死，mā同koh活（参考罗马书六：8）。基督教信仰siōng大ê特质就是讲tio̍h死人koh活。使徒保罗tio̍h用弗所教会信徒会koh活当做保护siōng重要ê头部，免得因为听tio̍h有人放出「另外一种福音」就会失去准则。

六、以上帝ê话作圣神所赐ê宝剑（17节b ）。宝剑，这是攻击ê武器，任何军人无法度kan-taⁿ有保护身躯ê防卫武器，iáu一定tio̍h配备攻击敌人ê武器chiah ē-tàng得胜。只有上帝ê话语chiah真正ē-tàng攻击敌人。因为他ê话语是真理，是公义ê气力，mā是siōng好ê保护网。希伯来书ê作者讲：「上帝ê 话是活ê，koh是有功效ê，比一切双面利ê 剑khah利，ē-tàng插入，甚至破开人ê 灵kah 魂，以及骨节kah 骨髓，koh ē-tàng 判断人心内ê 欲望kah 心思意念。(全民版)」（希伯来书四：12）有上帝ê话，就是对抗敌人siōng好ê利器。

第18到20节，一个基督徒有顶面所讲chiah-ê武器装备了后，iáu是无够ê，因为信仰中非常重要ê一件事，就是祈祷。祈祷是kah上帝对话，是走chhōe明白上帝旨意siōng好ê途径。会祈祷ê人，chiah是谦卑ê人，只有骄傲ê人拒绝祈祷。使徒保罗认为抵挡魔鬼siōng好ê方法，就是常常祈祷，祈求上帝ê帮助。伊mā讲祈祷是beh随从圣神ê带领，chit点是非常值得注意ê，因为圣神mā是祈祷ê灵（参考撒迦利亚书十二：10），会kā人心中无法度用语言讲述出来ê话语带到上帝面前。使徒保罗写hō͘罗马教会ê书信mā讲过：「圣神mā 亲像án-ne，tī 咱软chiáⁿ ê时kā 咱扶持。咱m̄ 知应该tio̍h án 怎祈祷chiah 好，m̄-koh，圣神家己用人ê 话bē-tàng 表达ê 吐气teh 替咱祈求。 鉴察人ê 心ê 上帝知圣神ê 意思，因为圣神是照上帝ê 意思来替信徒祈求。(全民版)」（罗马书八：26—27）圣神是咱kah上帝之间对话siōng好ê桥梁kah力量。