以弗所书 2章11节 到 2章22节   背景资料  上一笔  下一笔
Tī耶稣内面,无论是外邦人,á是犹太人,lóng会成做一体,这就是使徒保罗真重要ê信仰告白。Mā就是讲:耶稣m̄-nā hō͘所有ê人tńg来到上帝面前,kah上帝和好,mā hō͘所有ê族群结合做伙。人tī耶稣内面,ē-tàng超越种族ê界线,mā超越文化、历史、地理、传统等所带来ê隔阂。咱thang讲chit点to̍h是使徒保罗一再强调讲ê:「无论甚么人,若kah 基督结联,就是新创造ê 人;旧ê tāi-chì 已经过去,taⁿ lóng 变做新ê。(全民版)(哥林多后书五:17)这中心信息就是tī-chia。

第11到13节,tī chia,使徒保罗特别提起外邦人原本m̄是上帝选民,m̄-koh却tī耶稣内面而kah上帝有亲密ê关系。这是因为耶稣ê死所带来ê救赎恩典。

第14节,chit节真重要,使徒保罗讲因为耶稣ê死,已经hō͘外邦人kah犹太人tī耶稣内面「成做一体」。Chia所讲ê「平安」,就是大家所熟悉ê「Shalom」ê意思。「平安」,指ê就是无koh有惊惶ê意思。犹太人会beh kā家己kah外邦人区隔出来,主要原因是惊惶接触tio̍h in,认为in是无清气ê人,惊惶kah in做伙会引起上帝ê受气。M̄-koh,使徒保罗讲m̄免koh再有chit种惊惶,因为耶稣已经kā「平安」赐hō͘所有信伊ê人,而这「平安」成做犹太人kah外邦人之间siōng重要ê结合剂,并且mā因为chit种结合做伙ê平安,kā原本隔离、分裂ê「墙」hō͘推倒à。

第15到18节,tī chit段经文中,使徒保罗一再强调藉tio̍h耶稣ê十字架,m̄-nā终止了犹太人kah外邦人之间ê对敌形势,而且beh hō͘二者lóng tńg来到上帝面前。

第19到22节,成做「新人」,这是使徒保罗思想ê中心,伊teh传福音事工中一再努力beh传述一个重要信息:tī耶稣内面,无论是外邦人á是犹太人,lóng是上帝ê一家人,无所谓犹太人á是外邦人ê分别。因为耶稣乃是教会ê元首,教会是耶稣ê身躯,因为án-ne,所有信靠耶稣ê人,lóng是建基tī耶稣ê基础上。无耶稣,就无结合ê中心点,有耶稣,就无所谓外邦人kah犹太人ê分。


重新查询 专卷研经 以弗所书系列
错误回报,请联系comm[@]fhl.net