传道书 7章1节 到 7章29节   背景资料  上一笔  下一笔
Tùi第七章开始到第九章中,作者kā重点khǹg tī「好名誉」,以及「生」kah「死」chit两个主题上。Tī第七章则真亲像箴言仝款,传道书作者收集一连串ê谚语,tùi chiah-ê谚语mā thang看出社会中共同ê基本性命价值kah态度。

第1到6节,传道者lóng是用相对词句,而且是比较khah性ê字「赢过」来表达作者对性命价值ê判断,án-ne容易hō͘读者清楚思路ê方向。

「好名誉赢过珍贵ê香水」;香水洒tī人ê身上,通常会往下流,m̄-koh,好ê名誉却会往上提升,而且传播ê范围会扩大。而且,香水ê气味kan-taⁿ会teh雾ê附近散发,m̄-koh好ê名誉却会传播到超越人ē-tàng想像ê所在。「死ê日子赢过出世ê日子」,chit句khǹg tī chit节下半,tú好回应ê上半句所讲ê。因为一个人死去,chiah ē-tàng评断出伊ê名誉,所谓「盖棺定论」。一个人可能活teh ê日子非常风光,m̄-koh tī死后却无得tio̍h好ê名声,伊生前ê风光景象,ná亲像雾tī全身ê香膏油一般,香味四溢,m̄-koh却khah输好ê名声thang继续久长。Chit种现象tùi独裁者身上thang看tio̍h chit种见证,反tńg是被独裁者陷害ê义人,往往名垂青史。

「有丧事」kah「有宴会」,成对比ê现象。去前者ê厝,赢过去后者ê厝,tī下半句作者解释了原因,因为到丧家去,会hō͘人tùi迷糊中醒悟过来,知影无论家己jōa-ni̍h-á有权势,总有án-ne ê一工,iáu是仝款会死亡。

「忧愁赢过欢乐」,原因是忧愁ē-sái「心智koh khah敏锐」,因为tī苦难中会hō͘人对性命ê理解koh khah深刻。人类共同ê性命经历,是因为tú-tio̍h苦难,chiah会对性命有koh khah深刻ê体验,teh诠释对性命ê意义ê时就koh khah有影响力。

第4节ê「愚戆人」kah「明智人」是相对ê。「欢乐」是目nih-á ê,ná亲像诗人所讲ê,人ê一生即使活到八十岁,所得tio̍h ê「只是劳苦愁烦」(参考诗篇九十:10)。明智ê人会清楚知影「寿命有限」,当人知影家己ê性命有限ê时,就会晓珍惜、把握,bē浪费时间tī hiah-ê不必要ê事物上。

第5节讲「明智人ê责备」必定是真实,chit种责备比kan-taⁿ会讲谄媚ê话koh khah有益tī性命。因为「愚戆人ê赞扬」就是teh指谄媚ê话,he kan-taⁿ会hō͘人失迷、陷入堕落ê网中,一点帮助mā无。

第6节是流行tī中东地带ê一句谚语。古ê时中东地带因为chē属荒野地带,刺phè chē,普遍被当做柴火,火烧得紧,耐烧热点低,而且火烧时常会发生真大ê爆裂声。因为án-ne,有chit句谚语是用来形容「虚假」、「不实在」,意思是讲:一个人kan-taⁿ会讲,bē做。

第7节,「欺诈」kah「o͘-se」是仝款ê意思。做一个人看起来真「明智」,m̄-koh伊却无用「明智」来帮助人,颠倒,却用来「欺诈别人」,chit种人就是「愚戆人」。仝款ê,一个人接受「o͘-se」,kan-taⁿ会「损pháiⁿ家己ê品格」。Chia ê「品格」,所代表ê是一个人ê「德性」。

第8节,「tāi-chì ê终局赢过开端」,原因是「终局」ē-tàng看出成果。「忍耐赢过傲慢」,chia ê「忍耐」有含谦卑ê意思。若án-ne,谦卑相对tī「傲慢」。Á傲慢人ê心中无上帝(参考诗篇十四:1)。Chit种人ê性命会亲像无根ê树,真紧lian去,mā ná亲像糠粃被风吹散,消失无踪(参考诗篇一:4)。

第9节,chit节thang参考哥林多前书第十三章4到7节。Chia ê「受气」,是teh指tùi性命经历ê困扰中所发出「愤怒」(参考传道书一:18、二:23)。

第10节,chit节thang参考以赛亚书第四十三章18节。如果讲「往昔ê日子」比chit-má好,表示chit-má是退步ê,等于承认家己无长进。

第11到12节,chit两节是tī回应第10节所讲ê「往昔ê日子」。因为chia讲「有性命ê人」,就是teh指chit-má活teh ê人。Á chit-má活teh ê人「应该有智慧」,表示活teh ê人应该清楚家己kah性命ê主上帝之间ê关系。「产业」,表示财富ê意思。旧约圣经ài用「产业」表示kah上帝有密切关系ê对象。Án-ne讲起来,「产业」mā是teh表示一个kah上帝有约ê关系ê对象。Chit种人,应该是属tī认bat上帝救恩ê人。所以认bat上帝ê人,会知影上帝就tī伊身边teh庇护伊,hō͘伊无koh惊惶敌人á是威胁性命ê人侵犯。因为有智慧ê人,会知影怎样óa靠上帝来击退威胁性命ê气力,而这绝对m̄是用「金钱」thang换来得tio̍h ê。

第13节,thang参考第一章15节a句。

第14节,「喜乐kah患难lóng出tī上帝」,这表示性命ê生á是死,lóng是tī上帝ê旨意中进行。「将来beh发生ê事甚么人ē-tàng预知?」chit句话thang参考以赛亚书第四十一章22到23节、26节、第四十三章9节。一个真正认bat上帝ê人,就会知影每件事ê背后lóng有上帝奇妙ê旨意在其中。M̄-koh人永远无法度预先明白上帝ê旨意。

第15节,tùi chit节开始,传道者koh开始探讨一个不时hō͘人讨论ê性命问题:为甚么好人lóng是tú-tio̍h真chē困境,而pháiⁿ人却是万事顺利,甚至飞黄腾达?约伯记作者提出chit种问题,诗篇第七十三篇ê诗人mā有chit种问题。其实,传道书作者beh表明一个基本认bat:性命掌握tī上帝手中,甚么人作恶?甚么人行善?上帝非常清楚,人行善á是行恶kah寿命长短无直接关系,也kah性命ê境遇无直接关连。一般箴言lóng是讲善有善报、恶有恶报,m̄-koh tī chia传道书作者却提出无仝ê看法,mā是伊tùi「观察了真chē事」了后ê心得而发见,chit种善有善报、恶有恶报并m̄是性命ê定律,实际上mā会发生「好人行善,反tńg早死,pháiⁿ人作恶,倒享长寿」,tī诗篇第七十三篇mā有chit种见解。M̄-koh先知以西结提出无相仝ê看法,认为上帝是希望hō͘ hiah-ê作恶ê人有机会悔改(参考以西结书三十三:11),因为他是慈悲ê上帝。

第16节,chia所谓「行善过度」,意思是teh指人自认为tī善事顶面lóng做kah比别人chē koh好,án-ne,真容易掉落tī自认为义ê陷阱中。「自作聪明」,这是siōng容易hō͘家己受伤害ê愚戆者chiah会有ê表现。

第17节,「pháiⁿ」kah「狂妄」,这lóng是一种罪ê表现。二者lóng显示出心中根本to̍h无上帝chiah会有chit种心态。

第18节,「两种极端」,是teh指第16到17节。「只要敬畏上帝」,是teh指心中随时lóng认定上帝chiah是性命ê主宰,án-ne,人teh做任何事情ê时lóng会谨慎,m̄敢夸耀家己ê才华、能力,mā bē愚昧到自认为真聪明。

第19节,「智慧hō͘人ê帮助」,因为智慧是teh指认bat上帝。认bat上帝ê人所得tio̍h ê气力,是thang「赢过十个长官对城市ê贡献」。

第20节,chit节thang参考列王记上第八章46节ê「无人不犯罪ê」chit句话。约伯记第十五章14到16节,以及箴言第二十章9节lóng有类似ê话。诗篇ê诗人甚至讲,tī上帝眼中,世间无一个「行善ê人」(参考诗篇十四:3)。台湾俗语有类似ê话:「鼻孔朝下,无一个好人。」

第21到22节,「m̄-thang kā别人ê话lóng khǹg tī心上」,chit-ê话是teh指别人ê批评,甚至是有损尊严ê话。就听tio̍h来自奴仆ê侮辱ê时,tú好讲出主人必定有严重ê错误。仝款ê,当咱想beh侮辱别人ê时,mā tio̍h提醒家己bat有过受侮辱ê心境。

第23节,「用我ê智慧」,表示人用家己所知影ê一切,想beh追求真实tùi上帝来赏赐ê智慧,m̄-koh却发见家己所知影ê真有限,而且发见智慧kah人ê距离「真远」。

第24节,「甚么人ē-tàng探测性命ê意义?」这并m̄是人ê智慧所ē-tàng理解ê,因为性命是上帝创造ê,太奥秘à。因为án-ne,只有tńg来到上帝里chiah有办法知影。

第25节,传道者讲伊原本是想beh「走chhōe智慧」来解答心中ê giâu疑,结果m̄-nā无chhōe-tio̍h智慧,反tńg「发见邪恶是无知,愚昧是疯狂」。

第26节,「有kóa cha-bó͘人比死亡惊人」,这是teh指in会诱惑cha-po͘人去做违背上帝旨意ê事,ná亲像tī伊甸园中,cha-bó͘人诱惑cha-po͘人kah伊同齐食上帝禁食ê果子仝款。只有「蒙上帝欢喜ê人ē-tàng逃脱」,意思是teh指tī上帝面前khiā立会tiâu,á是hō͘ 上帝看做是义人ê人,因为上帝会赏赐hō͘ chit种人有智慧,知影怎样抗拒cha-bó͘人ê诱惑,而脱离灾难。

第27节,传道者会án-ne讲,因为伊是经过一段时间思考chiah「一点一点发见出来ê」。「tī千名男子中,我thang chhōe-tio̍h一个可敬佩ê,m̄-koh tī cha-bó͘-gín-á中,一个mā chhōe bē-tio̍h」,chit句话ê意思,其实是teh指cha-po͘人kah cha-bó͘人lóng仝款,chhōe bē-tio̍h有智慧ê人。Cha-po͘人用「一千」比「一」,表示少到可怜,差不多不存在。Á cha-bó͘人mā仝款,世间差不多看bē-tio̍h真正有智慧ê cha-bó͘-gín-á。

第29节,chit节ê意思是teh指:上帝创造人kah万物ê时,原本只希望人用他赋予 ê形像,好好á管理世界,m̄-koh人却m̄知满足,hō͘原本单纯ê世界因为人ê私beh而变kah一团混乱。

重新查询 专卷研经 传道书系列
错误回报,请联系comm[@]fhl.net