传道书 5章1节 到 5章20节   背景资料  上一笔  下一笔
Chit章讲tio̍h有关信仰ê问题。真少人会注意tio̍h宗教信仰ê问题,一直环绕tī人性命中,无法度分开。特别是tī以色列民族,宗教信仰是一切ê中心,in m̄-nā以宗教信仰成做kui个民族立国ê基础,mā用宗教信仰建构人kah人之间ê关系。Tī chit章中,ē-tàng看出传道者表达一个真重要ê观念:正直kah单纯,是敬畏上帝ê基础。若是无敬畏上帝ê心,人所有ê一切,m̄-nā无利益,反tńg有害,甚至可能延祸到下一代。

    第1节,「你到上帝ê殿去,tio̍h小心。」chia所谓「上帝ê殿」,是teh指敬拜上帝ê场所。M̄-koh kui个大地lóng是上帝创造ê,而且他是无所不在ê上帝。因为án-ne,无论任何地方,lóng ē-tàng成做敬拜上帝ê殿。Chit-ê意思是任何地点、时刻,lóng tio̍h心存敬畏。「tio̍h安静学习,赢过hiah-ê不明是非ê愚戆人去献祭」,chit句话已经清楚表明,到敬拜上帝ê所在siōng重要是注意听上帝ê话语。 

第2节,「开嘴以前tio̍h先想看māi」,所谓「开嘴」,意思是teh指祈祷。祈祷是kah上帝讲话,bē随便讲讲了事,这是非常错误ê心态。「m̄-thang chhìn-chhái向上帝下愿」,chit句话thang参考箴言第二十章25节。Á「用不着喋喋不休」,意思是teh指话真chē。Á这mā是耶稣所讲ê,祈祷无需要án-ne(参考马太福音六:7)。

第3节,chit节其实就是tī谈祈祷应该有ê态度。「事务繁多,恶梦mā chē」,chia所讲ê「事务繁多」,是teh指人心ê bē满足,想beh tī物欲生活上追求koh khah chē,chit种人,最后只有hō͘家己心神耗费koh khah chē,而结局恶梦连连。另外一方面,「事务繁多」mā是teh指心不专心斟酌,却是心有旁骛,chit种祈祷m̄-nā bē有结果,反tńg是一种对上帝ê不敬。「言语chē,就容易显出愚戆」,有敬虔心灵ê人,祈祷ê时并无会刻意讲真chē话,因为伊深知上帝会垂听敬畏并敬拜他ê人ê祈祷(参考约翰福音九:31)。

第4到5节,chit节thang参考申命记第廿三章21到23节。圣经记载几则下愿koh还愿ê故事,亲像:雅各(参考创世记廿八:20—22、三十五:6—7、14);先知撒母耳ê老母哈娜(参考撒母耳记上一:11、24—28);士师耶弗伊(参考士师记十一:30—31、34—40)等,lóng tī说明向上帝下愿,就一定tio̍h还愿,án-ne chiah是正确ê下愿态度。若是不真实ê下愿,倒「不如不下愿」来得实在。

第6节,chit节主要teh说明讲话一定tio̍h有所约束,m̄-thang随便讲亵渎上帝ê话。因为上帝是审判者,他鉴察人ê心思意念。Á人ê话,往往是tùi心内意念发出来。换句话讲话一定tio̍h诚实。若无,kan-taⁿ会「招惹上帝ê忿怒」。

第7节,chit节是整段头前六节经文ê总结,传道者用「敬畏上帝」chit句话做结尾。如论是做事、讲话,lóng一定tio̍h用敬畏上帝ê心,mā就是一定tio̍h用诚实做基础,án-ne chiah ē-tàng留存永远。

第8节,chit节thang参考第四章1节。作者真清楚,有权势ê人会用伊ê权势来迫害人民,chit款tāi-chì自古以来,人ê世界并无因为教育普及有改变,反tńg因为知识koh khah chē,欺压贫困人民ê手段koh khah细腻,有真chē「官官相护」ê事件,因为án-ne,看见chit类ê事mā「免得惊奇」。

第9节,「甚至君王mā óa靠田地ê出产来供应」,chit句话真清楚说明欺压农民ê结果,是伤害家己而已。因为有农民chiah有食物。因为án-ne,好ê君王会重视土地公平正义。Tī chia mā thang kā「田地」看做是「国家」。换句话讲,侵占别人ê国家,kan-taⁿ会为家己带来损失,bē有任何利益。

第10节,「贪爱钱财ê人总m̄知足」,使徒保罗讲chit种行为就是「拜偶像」(参考以弗所书五:5,歌罗西书三:5),而贪财是万恶ê根源(参考提摩太前书六:10)。「贪」这字ê另外一面,就是自私。Á「羡慕财富」ê人,chiah会kā性命耗费teh追求财富,结果就算是财富满满,却得bē-tio̍h上帝ê赐福(参考路加福音十二:20),chit种性命mā是「空虚」。

第11节,chit节讲出一般人看「富有」,就是óa靠伊食饭ê人真chē,m̄-koh真正富有,是tùi性命ê知足建构起来。却m̄是tùi数字jōa-chē来判断。

第12节,chit节thang参考传道书第四章4节。「劳工」kah「有钱人」,是相对ê人物。前者是靠家己ê劳力thàn钱,却ē-tàng心安理得「困kah香甜」。相对ê,有钱人若是用不正当手段夺取、欺压别人得tio̍h财富,这kan-taⁿ会为家己带来koh khah chē ê烦恼、愁苦,甚至「无法度成眠」。

第13节,这是「累积财富」对人ê性命所带来ê灾「害」,无任何益处。这mā是俗语所讲ê:财富chē,并无一定是福气。

第14节,「经营不善」,指ê是灾害带来ê结果。Chit种灾害,是teh指人用不正当手段夺tio̍h来ê,表面上看起来thang hō͘下代kiáⁿ孙得tio̍h真chē,结果却「丧失一切」,甚至会遗害后代。

第15到16节,chit两节thang参考约伯记第一章21节,提摩太前书第六章7到8节。性命是tī上帝手中,上帝hō͘人空手出世,mā hō͘人空手tńg去。人ê性命是来自土粉,mā会tńg来归土粉(参考诗篇九十:3,传道书三:20)。

第17节,「乌暗、悲愁、操心、病痛,kah怨恨」,chiah-ê用词ê意思lóng仝款,是teh指人tī所经历性命ê苦难(参考诗篇九十:10)。

第18到19节,「上帝所赐目nih-á ê一生」,chit句话thang参考诗篇第三十九篇5节、第九十篇9节。作者认为人活teh ê日子里,ē-tàng「lim食,享受tī日头下脚辛劳得来ê成果」,就是性命siōng大ê幸福(参考传道书二:24)。因为上帝赏赐性命hō͘人,就是beh hō͘人享受ê。Kah-ná tī伊甸园中,人thang享受园内所有ê一切。

第20节,续落去tī第19节,既然是tùi上帝来ê恩赐,即使性命是「目nih-á」,mā m̄免「烦恼」,意思是teh指m̄免担心夜间会困bē去。

重新查询 专卷研经 传道书系列
错误回报,请联系comm[@]fhl.net