传道书 3章1节 到 3章22节   背景资料  上一笔  下一笔
Tī第一到二章先绍介chit位传道者自认真有智慧,ē-tàng掌控性命,m̄-koh家己却发见无论án怎努力,甚至更换生活方式,结果lóng失败。Chit时chūn,传道者开始tùi生活kah自然界ê定律来反省,koh khah明明确知影性命无法度靠家己ê气力改变,因为伊发见其中是用上帝ê「律」tī运行。

Chit章thang分做两个段落,一是第1到8节,传道者认为每件事lóng有上帝ê计画kah时间表。二是第9到22节,ài人学会晓谦卑,知影家己ê有限kah脆弱。

第1节,传道者讲「天下万象lóng 有它ê 期, 万项事lóng 有它ê 时。(全民版)」,作者认为会án-ne有「定期」出现,是因为时间是上帝所创造ê,因为án-ne,时间mā tī上帝ê掌握中,人ê气力无法度改变上帝ê时间表。所谓「性命ê时间表」就是án-ne体会出来ê。

第2到8节,tùi第2节开始到第8节,作者用十四则例,讲出廿八个「ê时」,说明规律ê重要性,而且tī chit廿八个规律中,lóng是用相对词表达。

「生有时,死有时」,这真清楚讲出性命ê出现kah消失,lóng有上帝ê旨意。

Tùi chit句「栽种有时,拔除有时」开始,到第3节ê「拆毁」kah「建造」,lóng是teh描写人类行为ê两极性。「栽种」,这ē-tàng指掖种。每一种作物lóng有其生长时间,tī无适当ê时间掖种,植物成长ê效果就会变差,甚至无法度生长,因为无仝ê季节,气候ê变化mā无仝。「拔除」,就是teh指收割。果子提早收成,成熟度会不足,m̄-koh太晚采收则会过熟而落果,甚至腐烂。

「杀害」kah「医」是对应型态,同第2节ê「生」kah「死」之间ê差别仝款。「杀害」,这是teh指杀害性命,可能kah战争有关系。当战争出现,就会有「拆毁」ê景象出现,m̄-koh「拆毁」了后mā时常会有「建造」,ná亲像耶路撒冷城kah圣殿,tī主前586年被拆毁,然后koh重新「建造」起来。「医」是teh指救治破病á是受伤者,hō͘伊免tī死亡。战争后ê修复工作继续不断来teh进行。人类ê愚昧tú亲像是án-ne显示出来,发动战争破坏,然后chiah来透过医修复。

「啼哭」kah「欢笑」对应,然后用「哀恸」kah「舞蹈」对应。Chiah-ê lóng kah人ê感情、感受等有密切关系,是属tī人ê情感。

第5节提起ê事是比较khah无容易明白ê一节。原文本是teh指「hiat tàn」石头kah「堆聚」石头,可能是teh指一种游戏,á是耕田整地?á是亲像《现代中文》译本ê「同房」kah「分房」?m̄-koh chit种「hiat tàn石头」kah「堆聚石头」mā用来形容拆毁kah重建ê工作;拆毁已经不堪使用ê厝,然后建造新ê厝,mā就是hiat tàn kah堆聚石头ê意思。M̄-koh chit种hiat tàn kah堆聚之景象,mā常见teh相刣ê时chūn,摧毁敌方ê建筑物、桥梁,á是任何障碍物。M̄-koh当占领者为tio̍h beh防卫,就需要堆聚石头为障碍,来预防止敌方进攻。

另外一方面是tī巴勒斯坦地区真重视婚姻,举行婚礼通常lóng是kui个村落ê大事。因为án-ne,所有少年人会聚集同心协力为teh beh新婚ê男子建造新ê厝,当新婚夫妇进新ê厝,就ná亲像台湾俗语所讲ê「进洞房」,因为án-ne mā会描写为「同房」。「分房」则是teh指长大ê gín-á结婚成家,就是tùi父母「分房」出来。「亲烧热」kah「冷淡」,前者讲出热情欢迎ê状态,而后者讲出人之间产生「距离」,mā就是分房后ê情景。

「chhōe」原本是teh指「获取」,tú好kah「遗失」相对应,kah「保存」kah「弃sak」是仝款ê意思。

「拆裂」kah「缝补」是鲜明ê对应句。以色列人民tī亲人往生ê时,会用拆裂衫裤ê方式来表示哀伤(参考创世记三十七:34)。拆裂衫裤mā teh表示卑贱ná亲像癞koê病人仝款,是人见人厌ê对象(参考利未记十三:45)。「拆裂」,mā ē-tàng用来表示「分裂」ê意思(参考列王记上十一:30—31)。「缝补」mā当做遮掩ê意思,ná亲像人犯罪了后,发见家己赤身露体,就赶紧the̍h无花果树ê树叶遮掩家己(参考创世记三:7)。相对tī头前ê「拆裂」表示分开、分裂,tī chia mā thang用来当做「复合」ê意思(参考以西结书三十七:17—19、22)。续落来ê「缄默」kah「言谈」,mā是相对字词。「缄默」mā常用来表示悲痛哀伤到极点(参考约伯记二:13,耶利米哀歌三:28)。「言谈」,指ê是高谈论阔,滔滔不絶ê讲话。

「疼」kah「恨」就ná亲像「战争」kah「和平」,lóng是属tī相对ê词。Chia ê「疼」kah「恨」,并无kā重点khǹg-tī私人层面,而比较khah是关系民族、部落,甚至是国家kah国家之间ê关系。Án-ne,kah下半句ê「战争」kah「和平」就thang对称。「战争」kah「和平」,tī人类ê历史上一直重演。

第9节,「一切ê劳苦」,指ê是头前2到8节所叙述ê,说明一切lóng有上帝ê旨意在其中,既然án-ne,作者反问人「一切ê劳苦有甚么路用neh」?是teh指人bē明白chiah-ê事ê缘由。Chit时,就会感叹人ê劳苦意义何在?

第10节,「咱负荷沉重ê担子」,表示上帝并无hō͘人知影顶面所讲chiah-ê景况,hō͘人感叹性命ê空虚、辛劳,却lóng无所得。

第11节,chit节是chit章经文ê中心,讲出上帝创造án-ne有「秩序」ê生存环境,人ê问题是无法度清楚明白上帝ê用意。上帝「为万事特定适当ê时间」,这是tùi创世记第一章所记载有关上帝创造时间ê记事来看,说明有特定ê时间teh运转,而且是运转得非常稳定。就tī chiah-ê继续无停ê时间运转之下,传道书作者讲这是创造主上帝为tio̍h beh hō͘人有「永恒ê意识」,知影上帝teh掌管一切,m̄-koh并m̄是ài人完全明白。这mā表示人真oh明白上帝ê旨意,除非有上帝亲自启示。

第12到13节,传道者改变一个生活态度,既然无法度成做永恒ê主宰,只有ē-tàng目nih-á存在ê时,倒不如退一步tńg来掠tiâu chit-má ê每一刻。「lim食,享受辛劳ê成果」,这是人手上所ē-tàng掠tiâu、掌握ê,无法度放弃,因为chiah-ê lóng是「上帝ê恩赐」。因为án-ne,ē-tàng享受这目nih-á ê辛劳成果,mā是一种幸福(参考二:24)。

第14节,当人kah创造万物ê上帝相比,人是jōa-ni̍h-á ê渺小、不足、脆弱、有限。Á相对tī上帝,他是「永远长存」。因为tī上帝手中,无过去、chit-má,á是将来。因为他是永恒ê主宰,无受时间、空间ê限制。有限ê人根本无法度改变永恒ê上帝所创造ê一切。

第15节,chit节真清楚讲出以前发生过ê事,chit-má koh继续发生,在世间无新鲜事,原来这是「上帝hō͘仝款ê事重复出现」,是有上帝ê旨意在其中,m̄是无缘无故。

第16节,chit节mā是约伯记ê主要议题:为甚么好人会受苦难?相对ê问题是:为甚么作恶ê人飞黄腾达?作者发见在应该有「公道kah正义」ê所在,却出现「邪恶」。伊讲:「tī chit世间,应该有公道kah正义ê所在,反tńg有邪恶」,chit句话讲出人对无合理ê事物有无力感。用圣经作者普遍ê话语,就是「罪恶」。Tī无公义ê社会中,chit种罪恶siōng明显出现ê所在就是法庭,法庭内出现无公义ê审判。

第17节,「是好人,是pháiⁿ人,上帝lóng tio̍h审判」,chit句话thang参考启示录第二十章12节。「每件tāi-chì,每种行为lóng有特定ê时间」,chit句话thang参考本章第2到8节。表示每一件事lóng有上帝参与其中。因为án-ne,bē-sái公义、不守公道,lóng会成做hō͘ 上帝严厉惩罚ê原因。

第18节,「上帝teh考验咱」,为tio̍h是帮助人koh khah明白,而且愿意顺服上帝ê旨意。「人不比兽高明」,chit句话表示人常违背上帝ê旨意,反tńg其他受造物lóng会听从。

第19节,chit节紧接上句话,说明kui个受造物lóng有仝款结果,因为án-ne,人不比其它受造物koh khah伟大,mā不比其它受造物koh khah聪明,而且siōng后面对ê结果仝款,lóng有死亡teh thèng候。

第20节,thang参考创世记第二章7节、19节等等。人kah兽类lóng是用地上土粉造出来ê,mā「lóng tio̍h归回土粉」。

第21节,chit节清楚表明审判ê主权tī上帝,m̄是人。因为人是受造物,无审判性命ê权柄,只有上帝chiah有审判万物ê主权。

第22节,作者koh一pái强调,人ē-tàng「享受伊辛劳ê成果」是siōng好ê事,mā是上帝赏赐hō͘人ê「运命」,这就是享受,chit种句话重复出现(参考五:18、九:9)。



重新查询 专卷研经 传道书系列
错误回报,请联系comm[@]fhl.net