Tùi第一章开始到第二章5节ê chit段经文，连续提起北国以色列附近ê几个国家kah族群ê问题，上帝发出怒吼ê声音，表示他beh审判叙利亚、非利士、泰尔、以东、亚扪、摩押，以及犹大等。而且lóng讲in「koh再三犯罪」表示上帝已经是忍无thang忍，chiah决定beh下手惩罚。

第1节，先知ê作品开始lóng会有一个特点，是先绍介先知ê背景。Chia讲上帝启示先知阿摩司ê时间ê是tī「乌西雅做犹大王，约华施ê kiáⁿ耶罗波安二世做以色列王期间」，乌西雅是tī主前792到740年当犹大王。Á北国以色列是tī耶罗波安二世ê时代，伊是主前793年到753年主政ê时代。先知阿摩司则tī主前760年到750年间，得tio̍h上帝启示出来传达信息ê时间，chit时mā是北国以色列ê王耶罗波安ê末期。Chia特别提起「大地动前两年」，m̄-koh并m̄知详细时间，只知影tī乌西雅王治理ê时代，bat发生过大地动（参考撒迦利亚书十四：5）。M̄-koh圣经作者mā ài用「大地振动」来表示上帝ê愤怒kah惩罚（参考以赛亚书廿九：6，耶利米书十：10，阿摩司书八：8，那鸿书一：5），ná亲像耶稣被钉死tī十字架上ê时chūn，mā bat发生大地动（马太福音廿七：51）。

    Chia讲先知阿摩司是「提哥亚」ê顾羊人，这是设tī耶路撒冷南部ê一个小村落。罗波安王kā该村落kah其它附近几个村落lóng改成做防卫耶路撒冷ê防卫村镇（参考历代志下十一：6）。

    第2节，chit节是一首短诗，形容上帝发出「怒吼」ê气，这是惩罚ê气，结果「牧场ê草枯干；迦密山ê青草变黄」。迦密山，这原本是非常肥ê地区，mā是北国以色列siōng茂盛ê地区，kui片山坡地lóng种植tio̍h橄榄树、葡萄树，mā是siōng适宜顾羊群ê所在，不时会hō͘用来kah巴珊、沙仑等地并列提起土地ê肥、美丽（参考以赛亚书三十五：2，耶利米书五十：19）。M̄-koh上帝ê受气一出，连这美丽青翠ê所在mā会变色走样，一切lóng会失去性命现象。

    第3到5节，chit段经文是提起上帝beh惩罚叙利亚，而「大马士革」是该国首都，这国家长久以来lóng kah以色列国对敌。Chia讲tio̍h大马士革人「用残酷ê刑罚虐待基列人」。基列，这是设tī加利利以东ê以色列境内，kah叙利亚隔邻，土地非常肥，mā因为án-ne常遇tio̍h附近国家ê觊觎。先知以利沙就bat指出叙利亚会用残酷手段对待以色列人民（参考列王记下八：12）。因为án-ne，上帝beh用「火烧哈薛王ê王宫」，并且beh「捣毁大马士革ê城门」，chit句话真清楚表示上帝beh毁灭叙利亚chit-ê国家，果然tī先知阿摩司讲出预言了后约二十年，主前732年，chit项事成真à。Hit年亚述帝国皇帝提革giú・比列色进兵大马士革，「Kā利汛王刣死，并且kā人民掠到吉珥」（参考列王记下十六：9）。

    「Koh再三犯罪，我一定会kā in处罚」chit句话，一直出现tī chit章ê每一个段落经文ê起头，表示上帝是忍无thang忍chiah会施行惩罚。Koh讲，这「犯罪」一词，tī希伯来文ê意思是「背逆」，指违背上帝ê教示、旨意。

    第6到8节，chit段经文是提起有关「非利士人」ê问题，因为in kā掳来ê邻国人民贩卖hō͘以东人做奴隶。

    Chia提起「迦萨」城，这是非利士人ê五大城市之一。其他四个城市是：亚实基伦、亚实突、以革伦、迦特。Á迦萨是这五个城市中siōng大ê，mā是贩卖奴隶ê中心。Chia讲迦萨人「俘虏了邻国ê人民，卖hō͘以东人做奴隶」，这Tī圣经时代虽然是真普遍ê一种通例，m̄-koh却m̄是上帝所ē-tàng接受ê行为。因为án-ne，上帝决定beh惩罚in，方式是「火烧迦萨ê城墙，摧毁它ê宫殿」。续落来tī第8节提起「亚实突」、「亚实基伦」，kah「以革伦」等三个城市，m̄-koh却无提起「迦特」城。

    第9到10节，chit两节是关系「泰尔」chit-ê城ê问题，in仝款是kā附近友邦ê人民贩卖hō͘以东人做奴隶。

    「泰尔」，是腓尼基人ê主要城市，mā是迦南人ê kiáⁿ孙。Chia讲「in m̄遵守kah友邦签订ê条约」，是因为tī大卫王kah所罗门王ê时代，以及后来ê亚哈王，in lóng kah以色列人民保持非常友好ê关系（参考列王记上五：1、12，列王记上十六：31—32）。Tī圣经时代签约lóng是以神明当见证者。Chia特别khah强调讲泰尔kah以色列签约，m̄-koh却无遵照所立ê约，这表示in根本不kā上帝看tī眼内。因为in看见以色列渐渐衰微落来，就背叛所签订ê「约」，而且kā以色列人民卖到「以东」去做奴隶，in ê行为kah非利士人仝款，这是上帝所不允准ê行为。因为án-ne，上帝ê惩罚就是「摧毁」，hō͘ chit种人民受tio̍h过去in对待别人ê方式所带来ê苦难。

    第11到12节，chit两节提起「以东人」ê问题，讲in用残酷ê手段对待孕妇。

    「以东」，chit族群是以扫ê kiáⁿ孙（参考创世记三十六：1），kah以色列人民是同父异母兄弟，是真近ê亲族关系。圣经提起chit两个族群时常吵架，ná亲像世仇一般彼此仇恨。Tùi第9节thang知影，以东人mā参与贩卖以色列人民为奴ê事件。

    不过chia有一个问题，因为tī先知阿摩司时代，以东是属tī犹大统治区，无可能发生贩卖奴隶，á是kah以色列人民对敌ê情况。因为án-ne，有kóa圣经学者认为chit段经文有可能是后来tī编辑圣经ê时附加上去ê，背景是发生tī主前586年ê时，当巴比伦王尼布甲尼撒摧毁南国犹大耶路撒冷ê时，犹大人民为tio̍h逃避战祸tùi城里逃出来，以东人m̄-nā无伸手援助，颠倒ê是kah巴比伦人khiā做伙欺侮tùi耶路撒冷城逃出来ê犹大人民。先知俄巴底亚指出以东被惩罚ê原因是in ná亲像强盗趁火抢劫仝款ê pháiⁿ（参考俄巴底亚书10—14节）。Tī诗篇第一三七篇7节mā有记载chit种事。这就是此节所提起ê，讲以东人「不仁不义，用刀剑迫害in ê亲族以色列人」。

    「提幔」城是以东国ê首都，土地肥，人口chē，是当时中东地区非常出名ê经贸城市。Á「波斯拉」，chit-ê城是以东ê要寨，防御ê工事做得非常坚固。如果chit-ê城市被「摧毁」了，mā表示以东就会失去屏障，无法度守tòa。这mā说明了只要是上帝出手打击，即使有siōng坚固ê城堡，mā难挡上帝ê愤怒。

    第13到15节，chit段经文提起「亚扪人」ê问题。

    「亚扪人」，in kah摩押人lóng是罗得kah cha-bó͘-kiáⁿ乱伦生落来ê kiáⁿ孙。讲起来，in mā是以色列人民ê亲族，m̄-koh，in对待家己ê亲人却是非常ê残忍。Tùi士师ê时代起，in就一直kah以色列人民对敌（参考士师记三：13、十：9、十一：4），bat被大卫王phah败而臣服（参考撒母耳记下十二：29）。M̄-koh tī所罗门王ê时代恢复独立ê王国，kah基列相比邻，m̄-koh时常入侵基列。

    Chia提起亚扪人用残忍ê手段对待基列人，chit种剖开「孕妇ê腹肚」，是一种断绝in子嗣ê做法，因为án-ne m̄-nā hō͘孕妇丧失性命，伊腹中ê胎儿mā会死去。

    「拉巴」，这是亚扪ê首都，to̍h是今á日约旦ê首府安曼。In用残酷ê手段对待别人，家己会因为án-ne tam-tio̍h战争带来ê极大苦难，因为战争ê惨状会像「狂风暴雨」摧毁in。Tī上帝愤怒ê惩罚下，亚扪ê「国王kah官长lóng tio̍h流亡」，这kah第5节、第二章3节所记载ê仝款，chiah-ê国家、族群ê领导者lóng tio̍h被刣死。