因为使徒保罗表明家己有罗马公民身分，致使chit位罗马指挥官心内开始操心起来。伊需要查明到底是发生甚么重大ê事。因为án-ne，伊召「祭司长kah全议会做伙」开会，hō͘使徒保罗khiā tī in面前，án-ne thang听双方说明。

第廿三章1到3节，chit段是使徒保罗先发言表明家己ê做tāi-chì为人，lóng是「清白」。M̄-koh伊chiah讲完，就被「大祭司亚拿尼亚吩咐侍从」phah伊ê嘴巴。Chit位大祭司亚拿尼亚是tī主后47年被设立ê，任职12年，tī主后66年被犹太人游击队暗刣死亡。理由是伊亲罗马政府，贪婪成性，为tio̍h钱出卖犹太人，只因为为tio̍h beh取悦罗马统治当局。使徒保罗对遭遇chit种回应真无欢喜，伊指责亚拿尼亚是「粉饰ê墙」，意思是teh指伊虚假，外表好看而已。伊并且诅咒亚拿尼亚会hō͘上帝「phah」，因为当大祭司，却无「根据律法审判」。

第4到5节，议员中有人替大祭司讲话，认为使徒保罗无礼貌，使徒保罗mā承认家己咒骂大祭司m̄-tio̍h，随时表示因为m̄-bat大祭司。

第6到10节，使徒保罗发见在chiah-ê议员中间，有ê是撒都该派ê人，mā有法利赛派ê代表。因为án-ne，伊先表明家己是「法利赛人」，而且老父mā是法利赛人。然后伊讲hō͘人掠来见官，是因为伊teh传「ǹg望死人koh活」ê信息。Chit种讲法至少表明三点意义：
（1）使徒保罗相信耶稣koh活ê事实，而这mā是伊亲身ê经历。
（2）使徒保罗mā期待伊ē-tàng因耶稣ê koh活而koh活。
（3）伊一生ê传道工作就是teh见证耶稣koh活ê信息。因为撒都该人mā是犹太人siōng koân议会三股主要力量之一（另外两股代表是经学教师kah民间ê长老）对死人koh活ê事一向持m̄信ê态度，in mā m̄相信「有天使kah神灵」。因为án-ne，当in听tio̍h使徒保罗讲相信死人koh活ê事，就kah相信有死人koh活ê经学教师当场吵了起来。结果原本beh审问使徒保罗ê事m̄-nā无法度进行，反tńg是「争吵jú来jú剧烈」。相信有koh活ê法利赛派之经学教师，就表示「查bē出」使徒保罗有任何错，同时表示使徒保罗讲ê话可能有「神灵á是天使」启示，其实chiah-ê经学教师án-ne讲，是利用使徒保罗teh对抗撒都该派ê人，并m̄是in chiâⁿ实查证过使徒保罗无「任何错处」。因为罗马指挥官mā听m̄-bat chiah-ê，看in两派ê人吵得chiah-ni̍h厉害，只好命令兵丁kā使徒保罗带tńg来营房保护。

第11节，koh活ê主koh一pái显chit-má使徒保罗身边，鼓舞使徒保罗「ài有勇气」，并且启示使徒保罗「一定tio̍h tī罗马」为主做见证。因为chit-ê启示，使徒保罗决定上诉到罗马法庭。