使徒行传 2章14节 到 2章42节   背景资料  上一笔  下一笔
Chit段经文thang讲是众使徒siōng早ê见证词。

第14到16节,「彼得kah其他十一个使徒khiā起来」见证讲,in并无lim酒,因为hit时chiah上午九点钟。

第17到21节,这十二个使徒引用约珥书第二章28到32节。先知约珥对tùi巴比伦奴隶之地tńg来到耶路撒冷ê犹太人所讲,指上帝kā重建in,hō͘犹太人有新ê性命力。众使徒kā chit种话用来勉励早期ê信徒,mā是teh表示因为信靠koh活ê耶稣,会hō͘人ê性命重建起来。因为上帝差遣耶稣来到世间,就是beh重建犹太人,成做新ê选民。Á相信耶稣ê人就是耶稣beh拯救ê对象,hō͘伊成做新ê子民。其实,使徒用chit种方式teh宣讲,mā有一个重要ê用意:beh hō͘犹太人知影耶稣就是先知预言beh来临koh是in期待已久ê拯救者。

第21节,原本约珥是「呼求上主ê名」,chit-má使徒kā它改成做「呼求主名」,意思指只要向耶稣呼求,就会得tio̍h救恩。

第22到28节,这是众使徒见证ê第二部分。Tī chit段宣告中,众使徒真清楚kā耶稣传「上帝国度」ê信息,kah伊死tī十字架上ê信息连结做伙。换句话讲,tio̍h传扬耶稣,就tio̍h tùi伊死tī十字架上ê事开始。Á十字架是teh代表性命ê苦难,m̄-koh却hō͘人看tio̍h上帝ê救恩。

第25到28节ê chit段诗歌,是引用诗篇第十六篇8到11节。Chit段诗篇通常hō͘人认为是大卫王tī预言拯救者to̍h是teh beh来临ê诗歌。主要teh说明,一般人所经历ê性命之死,耶稣mā有。M̄-koh耶稣并无死后停留tī阴间,伊ê身躯m̄-nā无腐烂,却是成做得救ê通道,hō͘新ê性命得tio̍h喜乐。

第29到35节,这是第三段见证。Chia众使徒特别强调一个敏感ê问题,就是犹太人siōng喜爱、尊崇ê大卫王,伊就算真伟大mā是死去,而且埋葬。相对tī耶稣,m̄-nā无死,而且是有koh活。这是「上帝已经hō͘伊有koh活」,chiah-ê使徒就是为耶稣koh活ê事做见证ê人。

第30节,是引用诗篇第一三二篇11到12节、17到18节,另外mā thang参考以赛亚书第十一章1节等等。

耶稣m̄-nā有koh活,伊是升天到上帝ê正pêng,tī hia领受圣神ê气力。Á chit-má众使徒就是因为耶稣ê圣神充满而讲话。

第34到36节,chia ê诗歌是引用诗篇第一一0篇1节,说明大卫mā尊称chit位拯救者就是伊ê「主」。Á chit位「主」就是耶稣,他有koh活。

第37到39节,chit段经文mā成做今á日教会劝人悔改ê内容。彼得ài大家「悔改,并且tio̍h奉耶稣基督ê名受洗」,thang hō͘「罪得tio̍h赦免」,án-ne就会领受圣神。换句话讲,有悔改认罪ê人,透过洗礼会得tio̍h上帝hō͘ in性命ê气力,这是上帝所应允beh赏赐ê恩典。

第40到42节,大家lóng深受感动,因为án-ne,一下á受洗ê人就有「三千人」,chiah-ê人m̄-nā受洗,而且「专心向使徒领教,参加团契生活,分享爱筵,同齐祈祷」,早期教会就án-ne开始有雏形,信徒增加长ê速度ē-sái讲是非常ê快。


重新查询 专卷研经 使徒行传系列
错误回报,请联系comm[@]fhl.net