使徒行传 17章16节 到 17章34节   背景资料  上一笔  下一笔
「雅典」,这是当代欧洲社会ê思想中心,mā是kui个希腊文化思想ê重镇。Tī in眼光中,犹太人明明是就是「未开化」ê草芥民族。因为án-ne,当in看tio̍h使徒保罗传福音ê时,当地人ê反应是「这行江湖ê teh乌白讲kóa甚么」、「伊kah-ná teh传讲外国ê鬼神」等,chit种话mā是表明in非常看bē起使徒保罗kah西拉等人所传讲ê福音。Ē-sái讲是圣神teh做工ê时,即使tī人看起来真「低贱」ê事,mā是真高贵。

第18节,chia提起「伊壁鸠鲁派kah斯多亚派ê哲学家」,这两派lóng是当时雅典哲学界ê主流。前者创立tī主前306年,主张宇宙万物lóng是由「永恒ê原子」所组成,m̄是上帝创造ê。人tio̍h努力tùi上帝管辖ê惊惶中脱离出来。M̄相信有神,主张信仰会hō͘人迷信、惊惶,而结婚会hō͘人失去自由,因为án-ne反对婚姻关系。后者,是由哲诺(Zeno)chit-ê人所创。伊因tī「斯多亚」教册,因为án-ne,就用chit-ê名称说明伊ê思想主张:认为理性chiah是一切ê中心。神明是世界ê灵魂,充满tī kui个宇宙中,有泛神论ê倾向。人tio̍h努力工作,来减少欲望,因为欲望kan-taⁿ会带hō͘人koh khah chē ê烦恼。

第19到21节,当in听使徒保罗所传讲ê信息了后,开始感觉兴趣,想beh了解koh khah chē,就带伊到「亚略・巴古ê议会上」,hō͘伊继续见证福音ê信息。有人对使徒保罗所传讲ê信息感觉「非常奇异」,因为án-ne in想beh「知影究竟是甚么意思」。

第22到31节,chit段经文记载是使徒保罗ê讲道词。Thang分做三点来看:(1)上帝是创造ê上帝,宇宙万物ê主(第24节)。(2)上帝就tī咱中间,kah咱同在,咱是上帝ê子女(第29节)。(3)上帝希望人弃sak罪恶( 第30节),án-ne chiah有koh活ê ǹg望(第31节)。结果有人接受使徒保罗传讲ê信息。

第32到34节,虽然有人反对,mā有人看bē起使徒保罗所传ê福音信息,m̄-koh iáu是有人听mā信了,koh khah可贵ê是,受tio̍h感动而加入见证福音ê同工,chia特别绍介有「亚略巴古ê议员杜尼修,koh有一个名叫大马哩ê妇人,kah另外一kóa人」。M̄-thang放弃传讲福音信息ê机会,无论tī甚么所在,只要传讲,必定会有人听,因为传福音ê工作就是圣神ê工作。

重新查询 专卷研经 使徒行传系列
错误回报,请联系comm[@]fhl.net