撒母耳记下 8章9节 到 8章18节   背景资料  上一笔  下一笔
Chit段经文是kā大卫作以色列王了后ê所有战绩做一个简短ê结语。虽然是轻描淡写,m̄-koh作者用「上主hō͘大卫所向无敌,到处得胜」,chit句话讲出上帝kah伊同在所得tio̍h ê祝福。

第9到10节,tī琐巴北pêng有一个小国叫「哈马」ê,伊ê王叫「陀以」,听讲大卫phah败琐巴ê事件,伊担心大卫会乘胜追击,引兵北驱直入其国境,因为án-ne,为tio̍h表示伊愿意顺服,免得战争造成koh khah大ê损伤。伊派出家己ê kiáⁿ「约兰」当特使,带贵重ê金、银、铜等制成之礼物去当献礼hō͘大卫。古代中东社会,若是派家己ê kiáⁿ当特使去kah有对敌关系ê对象讲和,有两种含意:一表示诚意kah顺服,二表示即使因为án-ne而一定tio̍h留落来kiáⁿ当「人质」mā愿意。

第11到12节,大卫kā所有掳获ê战利品、进贡品等「lóng献hō͘上主,做敬拜ê路用」,表示大卫对上帝ê忠心,以及说明大卫确实真清楚,chiah-ê tī伊身上所得tio̍h ê胜利战绩,并m̄是伊ê,却是上帝ê帮助chiah得tio̍h ê。因为án-ne,kā siōng好ê礼物献hō͘上帝,等于是teh表明伊顺服上帝。Chia特别记落来被大卫phah败ê国家、族群,包括有「以东、摩押、亚扪、非利士、亚玛力」等。这差不多涵盖了所有tī巴勒斯坦ê大族。因为án-ne,mā thang讲kui个巴勒斯坦地区lóng tī大卫统治之下à。

第13到14节,chit两节记载大卫征服了以东人,并且派驻军队进入以东,表示以东完全在大卫ê统治之下。因为tī盐谷有chē kah「一万八千」ê以东人被大卫军队所杀害,mā因为án-ne hō͘ chit-ê山区ê民族就án-ne跋一下peh bē起来。M̄-koh在列王纪上第十一章14到22节记载tī大卫统治时代,以东王室ê人bat逃到埃及,并且利用埃及成立「流亡政府」,并m̄是完全lóng「顺服」tī以色列ê统治。Á tī大卫往生后,所罗门统治时代,以东一直是一个不安定ê地区。一直到主前845年犹大约兰王执政时代,以东chiah chhōe-tio̍h机会脱离犹大ê统治(参考列王记下八:20)。Tùi被大卫phah败到脱离犹大统治来独立,时间经过大约有160年时间。可见大卫tī败了以东,而且大屠杀chiah-ni̍h chē以东人,iáu会派军队「驻军」tī以东境内,就thang明白kah以东境内局势一直不安定有关。其实,以东人是以扫ê后代,mā是非常强猛ê狩猎民族。

第15到18节,chit段经文ē-sái讲是为大卫王朝一份简单ê「内阁」名单。作者特别强调讲大卫「秉公行义」治理以色列国。最后一句话写tio̍h:「大卫ê众kiáⁿ lóng作祭司。」chit句话比较正确ê讲法应该是「官员」,而且高级官员。照历代志上作者ê写法是:「大卫ê众kiáⁿ tī王ê左右担任重要职务。」

重新查询 专卷研经 撒母耳记下系列
错误回报,请联系comm[@]fhl.net