撒母耳记下 7章18节 到 7章29节   背景资料  上一笔  下一笔
Chit段经文是大卫tī听tio̍h先知拿单传出上帝hō͘ in伊应允ê话了后深受感动,随时进入khǹg约柜ê圣幕中,用祈祷讲出chit段伊心中感恩ê话。Chit段经文mā同时记载tī历代志上第十七章16到27节。

第18到21节,大卫进入圣幕,因为内面khǹg tio̍h约柜,表示上帝临在ê所在,因为án-ne chia用「到上主面前」chit-ê词。面对tio̍h上帝,大卫知影tio̍h谦卑落来,伊讲家己「真无配得」、「家族mā不配」,因为大卫原本是一个顾羊人,hō͘ 上帝指示先知撒母耳膏立伊作以色列人民ê王。虽然上帝知影伊真有限koh软弱,m̄-koh上帝iáu是beh拣选伊、眷顾伊,hō͘伊清楚知影上帝án-ne做,就是beh教导伊,hō͘伊成做一个好ê「牧者」带领以色列人民。 

第22到24节,chit段经文mā是大卫ê信仰告白,伊表明对上帝ê认bat:独一无二ê上帝,是无thang比并ê上帝。Tī chia,大卫用siōng简单ê词句讲出上帝tī以色列历史中,所行siōng重要ê事件—出埃及、入旷野、进迦南地。伊讲这是上帝tī以色列民族身上所做「伟大奇异ê事」。第24节,chit节是回应第14节上帝对大卫ê应允,说明上帝kah他ê子民kah立ê约,是立「永远ê约」(参考创世记九:16、十七:7、13,民数记廿五:12,撒母耳记下廿三:5,耶利米书三十二:40)。Koh讲,「永远」,chit-ê词一再出现tī第25节、第26节(两pái)、第28节、29节等等。Chit-ê词mā说明上帝是永恒ê,tī他ê内面等于得tio̍h永恒ê性命仝款,而这「永恒ê性命」mā是耶稣tī约翰福音中教导ê中心主题。

第25到27节,tī chit段经文中,大卫祈求上帝实现所应允ê诺言。伊会án-ne chit种祈求,并m̄是伊m̄相信上帝亲自透过先知拿单对伊所讲ê话,却是因为上帝ê应允大过伊所ē-tàng承受ê重。因为án-ne,伊用祈祷恳求上帝实现chiah-ê应允。Á chit种祈求,mā tú好显示出人ê软弱kah有限,对tī上帝ê恩典lóng是抱tio̍h怀疑kah不安ê心。Mā有另外一种看法,认为大卫ân-ân掠tiâu上帝ê应允m̄放,透过祈祷向上帝表明一定会得tio̍h上帝所应允beh hō͘伊kah伊ê kiáⁿ孙ê福气。第26节ê chit句「上主—万军ê统帅是以色列ê上帝」,表示上帝就是以色列ê带领者、统治者、指挥官。Á这tùi过去上帝帮助大卫phah败非利士人、亚玛力人等战役thang看出,只要有上帝ê应允出兵,必定会phah赢。大卫表示伊会án-ne祈祷,是根据上帝对伊ê应允。大卫ê意思是表明家己并无贪婪,á是过份ê祈求。却是因为有上帝ê应允在先前,伊chiah敢án-ne祈求上帝实现所应允ê一切。

第28到29节,大卫讲上帝对伊所应允ê是非常「奇妙」ê。因为这是一般人oh得tú-tio̍h ê奇异恩典。Chia大卫用「至koân」kah「独独」,除了表明chit位拯救以色列人出埃及ê创造者,是独一ê上帝外,mā teh说明上帝有独有特殊ê作为。(b)「永远信守你ê诺言」,真清楚,强调上帝是「信实」ê神。Teh祈祷ê最后,大卫koh一pái为伊ê后代祈求上帝继续施恩。

重新查询 专卷研经 撒母耳记下系列
错误回报,请联系comm[@]fhl.net