Chit章记载大卫想tio̍h象徵tio̍h上帝同以色列民族做伙ê记号—约柜。伊决定kā它引进耶路撒冷，ē-sái讲是非常明智ê一种决定。因为，一个社会若是无敬虔ê宗教信仰，单有强力ê政治领导者，mā真紧会失去平安、稳定ê社会秩序。古往今来ê世界，lóng仝款有chit-ê问题。chit-má大卫已经kā宫廷迁入此城，并且kā耶布斯人lóng驱离出城，hit-ê城chit-má只有以色列人khiā起，因为án-ne，迁徙约柜入城，mā等于是teh建构hit-ê城成做敬拜耶和华上帝ê中心，这mā是为甚么hit-ê城后来会hông称做「圣城」，á是「上帝ê城」ê原因。因为约柜是以色列人民看做有上帝kah in同在ê记号。因为án-ne，当约柜引进耶路撒冷后，hit-ê城此后成做名符其实ê「政教合一」ê城市，mā为后来所罗门建造圣殿注入一股ê催生力，而这mā为以色列人民ê信仰生活，建立完整ê祭司制度，kah敬拜礼仪ê模式。Koh khah重要ê，是透过约柜迁徙入耶路撒冷城，hō͘以色列原本一直存在tio̍h「南kah北」裂痕，因为án-ne而会得thang修复亲密结连做伙。

Chit段经文讲大卫决定用盛大ê阵势去迎接约柜入耶路撒冷城，m̄-koh却发生意外。理由是冒犯上帝ê神圣，为甚么会án-ne，是真值得注意ê一件事。Chit段经文mā同时出现tī历代志上第十三章。

第1到5节，chit段经文thang看出大卫为tio̍h beh迎接约柜入城，确实是非常慎重其事，共计派出三万精锐部队引chhōa，可能是为tio̍h beh防范外族人忽然来入侵搅扰Chit时ê约柜是停khǹg tī「基列・耶琳」，是tùi先知撒母耳时代就一直停khǹg tī亚比拿达ê厝里，并且由亚比拿达ê kiáⁿ以利亚撒看守（参考撒母耳记上七：1）。chit-má大卫王决定kā它迁徙到耶路撒冷城。大卫kā约柜khǹg tī一台「新车」上，teh表示「圣洁」、「纯真」ê意思。然后由亚比拿达ê两个kiáⁿ—乌撒kah亚希约领导tio̍h。Kui个队伍ná亲像迎接军队凯旋tńg来，á是庆祝农作物丰收等仝款ê欢喜方式，弹奏tio̍h各种乐器，包括有「竖琴、七弦琴、铃鼓、响板，kah铙钹」等，除了「响板」外，其余chia所记载ê乐器，差不多lóng是以色列人民厝里就有ê乐器，mā是in siōng常用来teh敬拜上帝ê乐器。

第6到8节，chit段经文描述运送约柜ê过程中，发生意外，作者无说明是甚么原因致使「拉车ê牛差一点á绊倒了」。有kóa圣经学者认为是：大卫chit pái ê迎接约柜，并无事先徵询上帝ê旨意。另外有kóa学者认为这是因为kah摩西律法所规定移动约柜应该有ê规矩相违背有关。照民数记第四章5到6节、15节等等记载ê规定，移动约柜ê时，应该tio̍h先tī约柜顶面加上幼路ê皮盖，然后koh再用一块纯蓝色ê布铺Tī顶面，最后chiah由众祭司扛扛移动。Á chit-má是用牛车，m̄是用人来扛，显然对移动约柜ê态度无够顶真。这mā是当「乌撒就伸手扶tòa上帝ê约柜」，表示伊做出了严重违背摩西律法规定ê动作。因为民数记第四章15节讲「摸tio̍h」了约柜ê人一定会死。Tī圣经ê时代，神圣ê物件，特别是用来象徵tio̍h上帝同在ê约柜，hit种严肃kah神圣ê记号，绝对m̄是一般人thang用手摸tio̍h，这mā是为甚么摩西律法上就顶真规定，一定会有祭司ê身分，而且规定某一个家族成员chiah thang。M̄-koh mā可能是因为牛车差一点á绊倒ê时，民众ê惊kah gāng去、恐慌，乌撒家己mā真可能因为án-ne而惊惶过度致死。因为是大卫安排chit-ê tāi-chì，因为án-ne，大卫对tī上帝惩罚乌撒ê事，真无掠做当然，有表示无欢喜。伊原本是beh荣耀上帝，m̄-koh上帝却hō͘ chit件事发生问题，hō͘ chit件原本大卫认为thang真光彩、荣耀、喜乐ê事，演变成悲伤、懊恼ê结果。M̄-koh mā因为发生chit件事了后，chiah hō͘大卫警觉tio̍h一定tio̍h小心翼翼进行第二pái移动约柜，m̄是家己欢喜就好，却是知影小心谨慎。这mā说明，约柜，这象徵tio̍h上帝显现、同在ê圣物，并m̄是甚么人有国王权柄爱怎样就thang怎样。

第9到11节，大卫经历过chit pái ê事件了后，mā会感觉惊惶，深恐因为对神圣ê圣物有所不敬，而koh一pái造成伤害。伊知影这是一件非常严肃、神圣ê事，bē-tàng大意，m̄敢轻举妄动，而需要重新细腻规划。伊决定改变方式，先kā约柜停留tī俄别・以东三个月时间，上帝mā因为án-ne赐福hō͘俄别・以东ê厝。