撒母耳记下 4章1节 到 4章12节   背景资料  上一笔  下一笔
Tùi撒母耳记下第四章他施波设被暗刣ê事件,就thang看出押尼珥ê重要性,至少伊稳定了北部以色列ê军心,会继续拥护扫罗ê政权。M̄-koh押尼珥被杀害后,其他ê军事强人就想beh抢功,m̄-koh chit两位重要军官所做ê事,却是大卫所讨厌ê行为。作者透过chit种方式teh说明一件事:bē-tàng杀害无辜ê,chit点mā是圣经非常重要ê教导。特别是拥有权力者若是会杀害无辜ê,ná会造成社会ê混乱kah不安。Koh khah严重ê是án-ne ê行踏,等于teh藐视上帝创造性命ê荣耀kah尊严。

第1到3节,chit段经文先提起他施波设kah以色列人听tio̍h押尼珥被谋刣了后,lóng恐慌不安,ná亲像头前所讲ê,押尼珥确实是北部以色列ê领导者,却m̄是他施波设。Chia mā先绍介他施波设身边ê两位重要军官—巴拿kah利甲。

第4节,「米非波设」,chit-ê名原本是teh指「米力・巴力」(参考历代志上八:34),意思是teh指:巴力ê敌人。编者kā chit节编辑tī chia,用意beh说明扫罗家siōng优先继承王位ê人,并m̄是他施波设,却是约拿单。M̄-koh,约拿单战死战场,而hit时米非波设因年纪chiah kan-taⁿ五岁而已,无可能继承王位,加上伊ê奶妈带伊逃亡ê时,不慎跋倒而hō͘伊因为án-ne变成瘸腿,根本就无条件kah siōng小ê a叔他施波设á是其他有意争夺王位ê人争权。chit-má他施波设已经统治以色列七年了,米非波设mā应该是十二岁,作者特别beh hō͘读者知影,就算chit-má米非波设想beh继承王位,mā会因为尚且年轻,而容易被拥有军权ê 将领所挟持。

第5到8节,他施波设身边ê两位军长巴拿kah利甲,利用炎热ê中昼侵入伊寝室刺杀伊,可见当时ê军队已经bē稳定。而且刺杀ê手段非常残忍,in是kā他施波设ê头割落来,然后手the̍h头颅去见大卫,chit种情形ná亲像hit位亚玛力人割落扫罗ê头仝款(参考一:10)。In对大卫讲he是伊ê「仇敌扫罗ê kiáⁿ他施波设ê头」,其实,tī大卫ê心中,扫罗并m̄是伊ê仇敌,是扫罗kā大卫看做是仇敌,因为án-ne扫罗chiah会一直想beh杀害大卫ê行动。颠倒,大卫一直尊崇扫罗是上帝所拣选ê君王,因为án-ne,伊一再强调上帝拣选ê君王m̄-nā bē-tàng刣(参考撒母耳记上廿四:6、10、廿六:9),却是只有ē-tàng保护。为tio̍h án-ne,当巴拿kah利甲kā他施波设ê头带来hō͘大卫ê时,iáu认为是替大卫报仇。M̄-koh大卫kah他施波设之间根本lóng无仇恨thang讲。

第9到12节,大卫m̄-nā无接纳in ê作法,甚至严厉责备in chit种bē-tàng原谅ê行踏。大卫指「永生上主chiù-chōa」,表示chit位上帝是永活ê上帝,他亲目看tio̍h chit两位军长所行ê恶质ê行为。因为án-ne,人ê任何动机kah行为lóng无法逃过上帝ê目睭。大卫强调他施波设是「无辜ê人」,chit-má,chit两位军长竟然是侵入国王ê厝,teh beh tī困落眠中ê国王刣死,koh khah是罪bē-tàng赦。因为án-ne,大卫责备in是「罪大恶极ê人」。值得注意ê是,大卫ē-tàng处理chit两位军长ê恶质行踏,却无法度处置约押抗命ê行为。理由是chit两位军长,并无真正实力,为tio̍h án-ne ê时ê北部以色列已经因押尼珥往生而失去战斗力。M̄-koh约押是南部犹大ê主kā,犹原拥有极大ê军权。Koh讲,大卫称他施波设是「无辜ê人」,并无讲伊是上帝所拣选ê君王,kah伊一再称呼扫罗是「上帝所拣选ê君王」,真无仝款。显然ê,他施波设tī大卫眼中,地位并无高。M̄-koh大卫iáu-koh认为chit种谋害人ê事,是bē-tàng原谅ê,何况是谋害家己ê国王,koh khah是罪bē-tàng赦。就án-ne大卫下命令kā chit两位军长处死,而且是用接近分尸ê极刑。然后大卫kā他施波设埋葬tī「押尼珥ê坟墓内」,表示kā它埋葬tī以色列ê国家墓园。然后,kā chit两位军长ê尸体「挂tī希伯仑ê池旁」,chit种处理尸体ê方式,kā它称做「曝尸」,是一种严厉惩罚被处死ê人(参考约书亚记八:29),用来表示chit-ê人ê后代kiáⁿ孙,bē有幸福、安定ê生活,这mā是圣经时代中东地区ê社会,侮辱被处死者了kiáⁿ孙ê方式(参考列王记上十六:4)。

重新查询 专卷研经 撒母耳记下系列
错误回报,请联系comm[@]fhl.net