撒母耳记下 3章2节 到 3章21节   背景资料  上一笔  下一笔
Chit章记载押尼珥已经意识tio̍h若情势继续落去,会完全失去生存ê机会,因为án-ne决定私下kah大卫谈判和解。M̄-koh,押尼珥将军因为bat杀害大卫身边ê猛将亚撒乌,为tio̍h án-ne事约押一直想beh替小弟亚撒乌报仇。果然就tī伊kah大卫谈妥和解条件了后,tī tńg去厝里途中反被约押派人押tńg来而刣死,报了小弟亚撒乌ê仇(参考三:26—28、30)。M̄-koh mā因为约押刣死押尼珥,hō͘大卫警觉tio̍h伊已经无法度管辖、约束约押。因为án-ne,tī伊临终前交带后事ê时,特别交带kā chit-ê tāi-chì记tī备忘录里,hō͘伊ê kiáⁿ所罗门利用宫廷内部斗争ê机会刣死约押(参考列王记上二:31—34)。Chiah-ê lóng说明一个重要ê中心主题:m̄是tùi上帝来拣选、膏立ê君王,lóng bē为国家带来真正和平、安定。

Chit段经文描述押尼珥计画带兵投效大卫ê经过。伊是一个会一时风驶一时船ê幕僚,原本是「拥护」他施波设为王ê,m̄-koh后来却私落去chhōe大卫谈投降ê事。这是背叛他施波设。

第2到5节,是一份简单ê族谱,chit-ê族谱thang参考历代志上第三章1到3节。清楚kā大卫ê kiáⁿ依大细ê次序排列出来,作者用chit种方式,主要teh表达一个意思:tī大卫厝内有资格继承王位顺位ê名单。M̄-koh值得注意ê是所罗门ê名chit时iáu未出现。Chia所列出来ê kiáⁿ,lóng是大卫tī希伯仑作犹大王ê时chūn所生ê。一直到第五章13到16节koh一pái出现一份新ê族谱,记明大卫作以色列王了后,tī耶路撒冷所生ê kiáⁿ,chit时chiah有所罗门ê名出现。Tī chit份简短ê族谱中,并无说明第3节所提起ê「基述王达买ê cha-bó͘-kiáⁿ玛迦」,mā就是押沙龙ê老母,是甚么时chūn,á是tī甚么情况之下,成做大卫ê bó͘,以及第4节ê「哈甲」、「亚比伊」、「以格拉」等等chiah-ê bó͘是tùi何而来,chiah-ê lóng欠缺资料。虽是短短四节经文,却讲出大卫娶米甲了后,至少koh娶六个bó͘。若是koh加上第五章13节所记载ê,讲大卫「到à耶路撒冷后koh选了真chē妃嫔」,却无说明娶jōa-chē位,m̄-koh已经thang看出大卫iáu感不足,最后koh发生一件伊计画谋害部下乌利亚,夺取in bó͘拔示芭ê事件等,án-ne已经讲出大卫ê pháiⁿ模样,是后来所罗门败坏ê主因。Á chiah-ê记录mā为后来宫廷ê内斗留落来了一则伏笔。Koh讲,chit份简单族谱并无kā米甲列tī名单中,原因可能是大卫kah米甲无生儿育女,mā有可能后来米甲被伊ê老父扫罗改嫁hō͘拉亿ê kiáⁿ帕提有关(参考撒母耳记上廿五:44)。

第6节,chit节讲出以色列民族分裂ê一个远因。北部ê以色列人因为他施波设被押尼珥将军所控制有关。因为án-ne,作者特别tī chia加上chit句「押尼珥元帅ê势力jú来jú大」,来形容伊已经拥兵自重,而且无受以色列王他施波设ê控制,因为án-ne chiah会「不断来争战」。 

第7到11节,tùi chit段经文thang看出押尼珥ê权柄之大kah嚣张ê态度,已经大大超过他施波设所ē-tàng驾驭。伊虽然不满押尼珥ê嚣张,m̄-koh却无办法制裁伊。Á押尼珥mā当tio̍h伊ê面chiù-chōa讲,beh带兵去投效大卫,这hō͘他施波设m̄敢出声。

第12到16节,经过一阵子ê深思熟虑了后,押尼珥chiâⁿ实采取行动beh背叛伊ê主人他施波设去投效大卫ê阵营。伊派心腹去大卫hia讲,如果大卫kah伊立联盟ê约,伊就会帮助大卫统一以色列全国。就án-ne大卫同意押尼珥ê提议,问题是:大卫为甚么肯hō͘押尼珥做chit种动作?真可能是:大卫认为án-ne ē-tàng减少真chē不必要ê「争战」,thang避免造成koh khah chē以色列同胞ê伤害。Á过去带兵kah大卫争战ê,就是押尼珥。因为án-ne,伊来归降等于kui个北部以色列lóng投降仝款。大卫则提出另外一个条件, ài押尼珥kā伊ê前bó͘米甲带tńg来。大卫会提出chit-ê条件真可能有一个用意:beh hō͘以色列国ê人民认同大卫是扫罗王ê kiáⁿ婿,án-ne,大卫tī继承王位ê身分上会koh khah合理化。Á米甲mā是他施波设ê阿姊。

其实,大卫chit-ê要求说明伊已经准备好势,beh统治北国以色列ā。伊会对他施波设提出chit-ê要求,mā是beh hō͘他施波设用国王ê身分正式承认米甲原本就是大卫ê bó͘。Á当大卫提出chit-ê要求ê时,他施波设只有ē-tàng照办无法度拒绝。他施波设只有ē-tàng硬kā米甲tùi「帕铁」身边带走,而chit件归还米甲hō͘大卫ê行动,显然是由押尼珥执行。因为án-ne,当in行到接近希伯仑ê边界ê时,押尼珥下命令ài帕铁离开米甲。

第17到19节,为tio̍h beh达成kah大卫立盟约ê动作,押尼珥去对北部以色列族群ê长老说明chit件事。然后mā走去到便雅悯支派去游说,这是因为便雅悯支派是siōng拥护扫罗ê族群,因为扫罗就是出tī便雅悯支派ê人(参考撒母耳记上九:21)。结果mā得tio̍h便雅悯支派ê人ê同意。押尼珥kā chit pái游说ê结果带去希伯仑向大卫报告,目的是beh hō͘大卫知影伊所做ê努力kah成果。Án-ne,tī南kah北两地ê以色列人联合起来了后,有可能伊就thang被看做是主要功臣之一。

第20到21节,当伊游说各支派成功了后,就带北部支派ê代表二十个长老去见大卫,而大卫则用siōng热情ê方式,设宴款待chiah-ê代表,这mā是立约应该有ê仪式之一,用来表示欢迎kah接纳。押尼珥当tio̍h chiah-ê代表讲beh「号召全以色列来拥戴」大卫做王。这mā说明in无koh拥护他施波设做王,等于是废了他施波设仝款,至少部队bē koh再支持他施波设,hō͘伊无koh是北部以色列ê国王。Á大卫回应押尼珥ê酬劳,是「保证押尼珥ê安全」,因为押尼珥án-ne做,等于背叛他施波设。Koh讲,押尼珥mā真清楚知影约押对亚撒乌被刣ê事件,当teh等机会beh报仇。因为án-ne,大卫答应hō͘ in保证「安全」,这mā是in彼此之间立盟约ê一个附带条件。

重新查询 专卷研经 撒母耳记下系列
错误回报,请联系comm[@]fhl.net