Chit段经文是描述押尼珥归降大卫tńg去厝里途中，被大卫ê大将约押派人去追tńg来，并且kā伊掠tńg来刣死，报了亚撒乌被刣之仇。M̄-koh约押chit种行踏hō͘大卫寒心，m̄-nā为押尼珥亲自主持葬礼，而且为押尼珥写一首挽歌，最后，大卫tī临终chìn前iáu特别交带伊ê kiáⁿ所罗门一定ài会记得，mài hō͘约押「善终」。因为约押chit种行踏，等于teh宣告，伊ē-tàng m̄听大卫ê话。

第22到25节，当约押kah大卫ê臣仆出兵，lóng phah赢tńg来，并且带tńg来真chē战利品，hit时押尼珥已经kah大卫结盟成立，因为án-ne，当约押相刣胜利tńg来，有人向伊报告chit件盟约ê事后，伊质问大卫为甚么án-ne做？伊认为押尼珥是来欺骗大卫王ê。其实约押会án-ne讲，是因为对押尼珥刣死亚撒乌ê事无法度释怀，一直想办法beh报仇。不过，另外有一种讲法，认为约押无欢喜押尼珥加入大卫阵营，原因是押尼珥会成做伊ê「竞争者」，chit-má koh带北部以色列来归顺，大卫必定会重视伊。加上押尼珥mā是一个勇kā，chit对约押ê地位kā造成威胁。

第26到27节，约押离开大卫就随时去追逐押尼珥。押尼珥因为无kā约押追缉伊ê事想清楚，认为已经有大卫ê保证，必定是安全ê。因为án-ne，当约押假做beh kah伊秘密谈话ê时，伊一轻松落来就被约押刺杀死，替小弟亚撒乌报了仇。

第28到30节，chit件杀害押尼珥ê事件传到大卫后，大卫无法度忍受，诅咒约押kah伊ê后代。Thang看出大卫心中ê恨。