撒母耳记下 24章1节 到 24章9节   背景资料  上一笔  下一笔
Tī大卫执政ê时代,m̄-nā发生第廿一章ê旱灾,mā发生第廿四章chia所提ê「瘟疫」,这lóng teh表示虽然大卫是上帝所赐福、拣选ê君王,m̄-koh并无表示一切lóng安然无事,mā是会tú-tio̍h极大ê困境kah灾难。Á tī chiah-ê大灾难来临ê时,怎样去走chhōe解决之道?án-ne chiah是一位领袖呈现出来ê信仰内涵。

Chit件发生tī大卫治国期间ê瘟疫灾难,mā同时记载tī历代志上第廿一章1到28节,表示确实有发生过chit件灾难,后来大卫恳求上帝怜悯kah赦免,而hō͘瘟疫会得thang解除。M̄-koh因为瘟疫ê缘故,已经造成高达七万以色列人民死亡。

Chit段经文记载大卫命令约押去进行人口调查,m̄-koh约押迟疑,而大卫却执意ài beh进行chit件人口调查ê事件。Chit件记事thang对照历代志上第廿一章1到7节所记载ê来看。

第1到2节,撒母耳记讲「上主koh向以色列人发大受气,所以激动大卫来对敌in」。M̄-koh作者并无说明到底发生甚么事,á是以色列人民有甚么无好ê行为,hō͘上帝会koh一pái发出大受气?koh讲,chia有一个真重要ê介系词「koh」,表示这是续接第廿一章1到14节所发生ê旱灾之灾难后无久所发生ê事件。

Chia讲大卫决定去调查人口,是因为上帝「激动大卫来对敌」以色列人民。M̄-koh历代志作者认为是「撒旦对敌以色列人,hō͘大卫定意进行户口普查」。值得注意ê是chia用「上帝激动」,表示上帝hō͘大卫kā心内中ê意念hō͘暴露出来,hō͘伊隐藏不住,并m̄是大卫本来无chit种企图,其实伊是有chit种用意,这thang tùi第10节ê描述看出来。因为án-ne,历代志作者ê用句就真清楚表示,这是大卫受tio̍h撒旦控制有ê结果。

原本统计人口,对一个国家来讲是非常重要ê事。因为这kah徵兵、抽税有密切关系。民数记第一到四章lóng有记载以色列人出埃及进入旷野了后,bat进行一pái全面性ê人口普查。耶稣降生ê hit年,罗马皇帝就bat下令进行户口普查(参考路加福音二:1)。后来大卫晚年透过chit项人口调查,徵召人民当义务劳工,并且为tio̍h án-ne iáu设立了「劳工部长」(参考二十:24)。Á所罗门则发挥了chit项「徵召劳工」ê政策非常「成功」(参考列王记上五:13、15)。大卫命令约押去执行chit项全国人口普查ê工作。

第3到4节,约押所讲ê chit句「为甚么ài做chit项事neh」,就thang看出伊对大卫chit项命令有淡薄á有意见。历代志上第廿一章3节甚至加上约押讲了chit句「做chit项事hō͘全民犯罪」,可见chit件事并m̄是出tī上帝旨意,却是大卫家己想beh做ê事。因为án-ne,约押认为大卫chit pái想beh清查人口,背后一定有无好ê动机。即使约押已经提出警告,大卫iáu是「坚持beh约押kah伊ê部属服从伊ê命令」去做chit件招惹民怨ê事。值得注意是,大卫并m̄是beh行政官去执行chit项命令,而是beh约押kah伊ê部下去执行,这已经teh暗示chit项人口调查确实是kah相刣ê计划有关系,因为需要动员thang用兵力。

第5到9节,真详细地描述约押kah伊ê部下去执行大卫chit项调查人口之政策,而伊mā确实彻底地完成chit项命令。Chit项人口普查所花费ê时间,共计长到「九个月koh二十工」。约押提出调查结果ê报告是:以色列thang带「武器ê壮丁总数八十万」,而tī犹大则有「五十万」。Chia所讲ê「带武器ê壮丁」,意思是teh指「二十岁以上ē-tàng作战ê cha-po͘人」(参考民数记一:3、18、20)。M̄-koh这数字kah历代志所登录ê人口无仝;tī历代志登记ê人数是「以色列ē-tàng相刣ê壮丁有一百一十万名;犹大ē-tàng相刣ê壮丁有四十七万名。」历代志作者特别说明约押「无调查利未支族kah便雅悯支族ê人数」,理由是「因为伊无赞成王ê命令」。约押án-ne做mā有另外一种理由,一是利未族人lóng是属tī祭司族,in本来就m̄免参与军事行动。Á无对便雅悯族ê人民进行调查,真可能是为tio̍h避免koh一pái发生分裂ê事件(参考二十:1)。

重新查询 专卷研经 撒母耳记下系列
错误回报,请联系comm[@]fhl.net