撒母耳记下 22章1节 到 22章31节   背景资料  上一笔  下一笔
Chit首诗歌差不多kah诗篇第十八篇仝款,只是tī诗篇第十八篇只有50节,tī撒母耳记则有51节,加出来ê chit节是撒母耳记下廿二章第1节,tī诗篇是用「说明」á是「简介」方式编辑,并无算是经文本身。

Chit首诗篇有一个lóng受讨论ê问题:到底是先有诗篇第十八篇,iáu是先有撒母耳记下第廿二章?toh一个是比较原始ê版本?这问题到chit-má都无明确ê定论。有bē少诗篇ê学者认为,chit首诗歌thang来确定是出tī大卫ê手笔,因为这是大卫teh歌颂上帝ê救恩而写ê诗歌。Ná亲像第1节所讲,这是大卫teh颂赞上帝救伊脱离「仇敌kah扫罗之手」而写ê。如果chit首诗歌确定是大卫所写ê诗歌,án-ne,chit首诗特别是teh描述伊带兵出征真chē族群,建立以色列帝国ê时期,四界出世入死ê征伐,若无上帝ê带领kah庇护,伊ê性命无办法得tio̍h安全。Á ná亲像第1节所讲ê,大卫ê仇敌mā包括了一再想出所有ê办法beh追杀伊ê扫罗,因为扫罗认为只要有大卫tī teh,伊就无法度顺利kā王位传hō͘家己ê kiáⁿ约拿单。扫罗就bat因为约拿单替大卫讲话,而怒骂约拿单无了解情况(参考撒母耳记上二十:31)。撒母耳记上tùi第十九到廿六章,清楚记载扫罗想beh尽一切办法beh除掉大卫,都无成功。因为上帝tùi中庇护ê缘故,chiah致使大卫ē-tàng脱离扫罗ê迫害。

有一种讲法认为会kā Chit篇诗歌编辑tī-chia,是因为chit首诗歌siōng ē-tàng代表大卫ê心境:伊是一个心胸开朗,有勇气kah智慧ê君王。

这部分ē-sái讲是对上帝ê感恩。诗人感谢上帝tī伊tú-tio̍h仇敌围困ê时,伸手来拯救伊。

第1到4节,诗歌ê开始就讲chit首诗歌是大卫写ê,而且特别强调是tī大卫「脱离扫罗kah其他仇敌ê手ê时」写ê。Chia讲「其他仇敌」,是teh指所有kah大卫有过战事ê外族人,m̄-koh并无包括伊ê kiáⁿ押沙龙。因为chit首诗歌应该是写tī押沙龙叛乱chìn前,mā就是大卫统治kui个以色列民族了后ê时代。Tùi这几节诗歌中thang看出大卫用kúi-nā种方式,包括有「岩石kah堡垒」、「避难所」、「盾牌」、「力量」、「要塞」等来形容上帝是伊性命中siōng好ê óa靠,hō͘伊脱离仇敌ê攻击kah威胁。

第5到7节,tī chia大卫用「死亡ê水涌」、「毁灭ê急流」、「阴间ê绞索」、「坟墓ê网罗」等词句,来形容伊tī性命ê旅途中,有kúi-nā-pái tú-tio̍h几近「死亡」ê威胁,m̄-koh lóng因为上帝奇妙ê带领chiah得适ê时地化解危险而ē-tàng存活落来。Á tī hiah-ê几近死亡ê威胁中,大卫讲伊siōng好ê óa靠对象,就是上帝;chit位上帝会垂听苦难者祈求ê声音。伊用「拟人化」ê笔法,写出上帝有「耳á」,会垂听人ê祈祷声音。

第8到16节,是teh回应第7节所歌颂ê,大卫向上帝祈求,上帝便垂听伊祈求ê声音,随时就有具体ê回应。Tùi chit段诗歌thang看tio̍h上帝显现ê景象,是kui个天地lóng变了色,甚至连山kah地lóng摇动。Chiah-ê景象包括了出现乌云、冰雹、sìh-nà,ná亲像in出了埃及进入旷野后,行过红海ê时,上帝用大风吹开了海水,kui个红海ê海底就裸露出来,thang hō͘以色列人民顺利而平安地行过去(参考出埃及记十四:19—29)。Á当以色列人民行到西奈山脚ê时,in虽然无亲目看见上帝,m̄-koh tùi听见轰轰ê雷声响,看见山顶上有浓烟升起,以色列人民就清楚知影he是上帝「亲自降临」ê景象(参考出埃及记十九:16—19)。类似chit种描述ê诗歌,mā一再出现tī诗篇中,亲像诗篇第五十篇3节、第七十七篇16到19节、第九十七篇2到5节、第九十九篇1节。圣经作者mā不时用天地变色ê景象来描述上帝显现而且进行审判。其实大卫tī chia并m̄是beh讲述以色列人出埃及ê故事,而是beh见证每pái以色列人民tú-tio̍h敌人ê侵犯,面临亡国,甚至人民可能会hō͘敌人掠去ê时,上帝亲自出来为chit-ê民族、国家解围。因为án-ne,伊引用了祖先出埃及ê经历,来描述上帝施行奇妙ê拯救,hō͘以色列民族会得thang脱离险境。

第17到19节,是大卫teh见证上帝tī伊siōng危急ê时刻,伸手拯救伊脱离仇敌杀害ê危险。Tī以色列人民ê观念中,大水就是邪恶势力ê聚集处,表达出来ê意义就是混乱、危害性命。诗人形容chiah-ê仇敌lóng ná亲像大水一般ê强大,佳哉,有上帝庇护chiah幸免tī难。

第20到25节,tī chit段诗歌中,诗人m̄-nā用相对句型,亲像第22节ê「遵行」kah「背叛」、「遵守」kah「弃sak」。Mā用对应句,亲像第21节,伊讲tio̍h家己ê「正直」,上帝ê回应就是「赐福」,hō͘伊ê「无辜」得tio̍h补偿,koh亲像「正直」kah「清白」是对应句。诗人表示伊知影上帝会为「无辜」者伸冤,mā会照人ê「正直」,用仝款ê恩典报偿hō͘人。不过大卫讲伊一直遵守tio̍h上帝ê律法,「m̄-bat弃sak伊ê命令」,tùi chit句thang看出chit首诗歌是写tī大卫tī犯奸淫罪chìn前。当伊犯淫乱罪了后,chit句话就无法度成立。

第26到28节,第26节mā ē-sái讲是非常重要ê一节诗歌,大卫tī chia特别提起上帝会「以信实待信实ê人」。「信实」,tī圣经中所表达ê意思是teh指上帝一定会「守约」。上帝kah人之间有约,不管人怎样看待约,上帝一定会坚持守tiâu他kah人所立ê约,chit-ê认bat是非常重要ê。「信实」mā有另外一个意思,是teh指上帝ê「慈爱」。甚么人用慈爱来见证上帝ê慈爱,上帝mā会用仝款ê慈爱来赐福chit种人。大卫mā用chit-ê词teh见证:上帝绝对bē亏待遵行他ê旨意ê人。诗人mā讲纯洁ê人,上帝回应ê方式mā是「纯洁」,m̄-koh若是邪恶者,上帝就会敌视chit种人。值得注意ê是上帝会伸手拯救「卑微ê人」,m̄-koh却会「敌视并贬低高傲ê人」。

第29到31节,chia ê「明灯」kah「乌暗」是对应话句。「明灯」,表示性命ê希望(参考诗篇廿七:1),表明上帝拯救ê意思(参考以赛亚书九:2)。相对ê,「乌暗」就是teh表示性命陷入死亡ê威胁,性命ê希望幻灭。当大卫kā家己委身tī上帝手上ê时,每pái伊出征,上帝就会赏赐hō͘大卫够额ê气力抵抗强敌,甚至降服对敌者。

第31节,为第2到30节chit段诗歌做一个结语。主要teh表明:上帝ê话是可靠ê,ná亲像一面盾牌,óa靠上帝ê人,一定会得tio̍h庇护。因为他坚守任何民族、国家kah他之间所立ê约。

重新查询 专卷研经 撒母耳记下系列
错误回报,请联系comm[@]fhl.net