撒母耳记下 21章15节 到 21章22节   背景资料  上一笔  下一笔
有关大卫带领以色列人民kah非利士人之间ê战事,tī撒母耳记中ê记录非常chē,tùi伊年少时chūn phah倒歌利亚(参考撒母耳记上十七:41—54)开始,续落来tī第十八章30节大卫每pái带兵对抗非利士人,lóng有「辉煌ê战果」。Á当大卫继位为以色列ê王了后,非利士人随时来挑衅,m̄-koh mā是hō͘大卫phah败(参考五:17—25),后来撒母耳记下第八章1节,虽然是真简单ê一节,m̄-koh用了「大卫koh再攻击非利士人,phah败in,结束loh in tī chit块地上ê统治」chit句话,说明非利士人tī大卫统治期间,已经m̄是以色列人ê主要外患tio̍h。因为án-ne,chit段资料真可能就是第五章25节ê延续。

第15到17节,chit段经文是大卫攻打非利士人战役ê总论。作者用「大卫疲乏了」chit句话,说明大卫已经无koh少年力壮,尤其是面对高大强猛ê非利士人,需要少年ê一代来接棒。Chia讲有一个「巨人」名叫「以实・比诺」,伊真亲像歌利亚,伊「想刣死大卫」,佳哉有「洗璐雅ê kiáⁿ亚比筛过来协助」,真无简单chiah地chiah kā「以实・比诺」刣死。后来大卫身边ê辅佐大臣要求大卫以后mài koh再kah in出征,「免会得thang色列ê灯火被熄灭」。Chit句「免会得thang色列灯火熄灭」,意思是无希望大卫王朝因为án-ne瓦解、毁灭。「灯」,表明家庭、家族,á是种族ê意思。

第18到19节,这是第二场战役,地点是tī「歌伯」,chit-ê所在真靠近基色。这是另外一个非利士巨人名叫「撒弗」,这巨人名tī历代志上第二十章4节所记载ê名是叫「细派」。Á第三场战役ê地点mā是tī歌伯,chit pái ê主kā是「伯利恒人睚珥ê kiáⁿ伊勒哈难」,伊刣死了一个「迦特人歌利亚」。Tī历代志上第二十章5节soah讲,被刣ê是「迦特人歌利亚ê兄弟拉哈米」。

第20到21节,这是第四场战役。地点是tī「迦特」,chit-ê城是非利士人五个城市中ê一个。Chia并无讲出「巨人」ê名,历代志上第二十章6节只有讲伊是「古早时巨人ê后代」。Chit-ê巨人来「向以色列人挑战」,án-ne ná亲像当时歌利亚向以色列人挑衅ê行动仝款(参考撒母耳记上十七:4、16、23)。Á chit pái出来应战ê,是「大卫ê兄哥示米亚ê kiáⁿ约拿单」,伊kā chit-ê巨人刣死。

第22节,chit节为chiah-ê战役做一个总结,认为chiah-ê非利士人,lóng是属tī「迦特人」,in lóng是「巨人ê后代」。若是「巨人」所表示ê是强猛壮硕,án-ne,大卫身边有迦特人做侍卫军(参考十五:18),mā thang想像会tio̍h,in是大卫siōng好ê侍卫,战力并无输hō͘扫罗时代ê便雅悯人。

重新查询 专卷研经 撒母耳记下系列
错误回报,请联系comm[@]fhl.net